Leviticus 24 in Sunwar
1 मिनु परमप्रभु यावेमी मोसा कली
2 “गे इस्राएली आन कली ‘बत्ती गेना हना यो ब्रपाइश्शा वोइक्चा कली गेपुकीमी तेल रवा आ फल रे तुप्शा सेल्शो तेल चाक्कीन। प्रस्थान २७:२
3 मिनु हारूनमी बत्ती कली ग्रुम्तीक ताम्बु आगा, फारशो वा आ ङोंइती वोइक्चा माल्ब। मेको परमप्रभु यावे आ ङोंइती नाक्दो रे सुनी सम्म गेना हना यो ब्रचा माल्ब। मेको इन कली गेना हना यो पतीके बाक्ब।
4 मेकोमी परमप्रभु यावे आ ङोंइती क्येख सुन के सेल्शो बत्ती दातीक तारी गेना हना यो वोइक्चा माल्ब।
5 गे रिम्शो फस चाक्शा, बार ओटा शोब्ले चोवो। शोब्ले का एफाह का के २० भाग थम रिम्शो फस के दुम्चा माल्ब। एफाह पुक्तीके का बाक्ब। एफाह का २२ लिटर रिक्ब। मेको के २० भाग ४.४ लिटर खोदेंशो बाक्ब।प्रस्थान २५:३०
6 मेको शोब्ले परमप्रभु यावे आ ङोंइती क्येख सुन के टेबल आ तार ६, ६ ओटा ख्रोप्शा वोइक्चा माल्ब।
7 मेको निक्शी ख्रोप्तीकेमी का का पा रिम्शो धूप वोइक्चा माल्ब। मिनु मेको शोब्ले आ पा ङा मेको धूप मीम चोशा परमप्रभु यावे कली चढ़ेचा माल्ब।
8 मोपा हारूनमी नेल्ल नाइक्तीक नाक्ती मेको शोब्ले कली परमप्रभु यावे आ ङोंइती वोइक्चा माल्ब। मेको इस्राएली आन कली मेको गेना हना यो पतीक नु लीब कबल बाक्ब।
9 मेको शोब्ले हारून नु आ तौ चच आन कली बाक्नीम। मेकोपुकीमी मेको शोब्ले चोव़खो बाक्तीकेमी बाक्शा जचा माल्नीम। मारदे हना मेको शोब्ले परमप्रभु यावे कली मीम चोशा चढ़ेशो रे नेल्ल क्येङा चोव़खो हारून नु आ तौ चच आन भाग बाक्ब’ दे अरेवो” देंत।
10 मिनु इजीप्ती आफ नु इस्राएली ममा पाइश्शो मुर का बाक्माक्त। मेको मुर इस्राएली आन दातेमी जाक्शा, इस्राएली का नु तुम्मुसा बाक्त।
11 मिनु मेको इस्राएली ममा आ तौमी परमप्रभु यावे आ नें थिशा, सराप पवा बाक्त। मिनु मुरपुकीमी मेको कली मोसा आ बाक्तीकेम चाक्गमे बाक्त। मेको आ ममा आ नें शेलोमीथ बाक्माक्त। मिनु मेको दान आ थर ङा दिब्री आ तमी बाक्माक्त।
12 मिनु मेको मुर कली चाक्शा, परमप्रभु यावे आ मिम्शो मतुइक्तमे सम्म चोक्शा वोदमे बाक्त। गन्ती १५:३४
13 मिनु नोले परमप्रभु यावेमी मोसा कली
14 “मेको सराप पाइब कली मुर आन बाक्तीक रे लाङगा ग्रुंइदीन। मिनु मेको आ नेक्था बाक्ब मुर नेल्लेमी मेको आन गुइ आ पिया तारी वोइक्चा माल्नीम। मिनु मेको नोले नेल्लेमी मेको कली फुल्लु आप्शा साइक्चा माल्नीम। गन्ती १५:३६; ब्यवस्था १५:५; प्रेरित ७:५६
15 मिनु गे इस्राएली आन कली ‘सुम आ परमप्रभु कली सराप पाइबा, मेको आ पाप राइब।
16 परमप्रभु यावे आ नें आ पर्बम मरिम्शो लोव़ पाइब साइक्चा पुंइसीब। इस्राएल ङा मुर बाक्त हना यो, अर्को रागी ङा मुर बाक्त हना यो, सुम परमप्रभु यावे आ नें आ पर्बम मरिम्शो लोव़ पाइबा, मेको साइक्चा पुंइसीब। प्रस्थान २०:७; मत्ती २६:६५-६६
17 सुमी मुर का कली साइक्बा, मेको साइक्चा पुंइसीब। प्रस्थान २१:१२
18 सुइमी बस्तु भाव कली तुप्शा साइक्तु हना, मेको आ पा ङा अरु गेचा माल्ब। ब्रोंइशो बस्तु आ पा ङा ब्रोंइशो बस्तु गेचा माल्ब। प्रस्थान २१:३३-३७
19 सुइमी आ नेक्था ङा मुर कली आ खोइल जिक्ताक्व हना, मेको यो आ खोइल जिक्चा पुंइसीब।
20 जिक्तीके आ पा ङा जिक्तीके, मिक्च आ पा ङा मिक्च, ख्रुइ आ पा ङा ख्रुइ, सुमी सु कली मार पाइबा, मेको यो मो पाइक्चा पुंइसीब। मेको कली यो मो पाइक्चा माल्ब। प्रस्थान २१:२३-२५
21 सुइमी बी ब्यफ, क्यारश भेडा आन कली तुप्शा साइक्तु हना, मेको आ पा ङा अर्को गेचा माल्ब। तन्न मुर साइक्ब कली चहिं, साइक्चान माल्ब।
22 आंम रागी ङा मुर नु अर्को रागी ङा मुर आन पर्बम खाल का ङा ऐन कानुन दुम्चा माल्ब। मारदे हना गो परमप्रभु यावे, इन परमप्रभु नङ’ दे शेंचा माल्नेवे” देंत। लेवी १९:३४; प्रस्थान १२:४९
23 मिनु मोसामी इस्राएली आन कली मेको लोव़ शेंदीमी नोले मेकोपुकीमी मेको सराप पाइब कली मुर आन बाक्तीक रे ग्रुंइशा, फुल्लु आप्शा साइक्तेक्म। मिनु परमप्रभु यावेमी मोसा कली अरेशो खोदेंशो पा इस्राएली नेल्लेमी पाम्तेक्म।