Judges 11 in Sunwar
1 गिलाद सहर ङा येफ्ता ठेयब नु बोल्यो लडाइ पाइब मुर बाक्माक्त। मेको गिलाद आ तौ तेल्लेम रे पा थिशो बाक्माक्त।
2 मिनु गिलाद आ मीशेमी यो मेको के शुश तौ थिशो बाक्माक्त। मिनु मेकोपुकी कोल्शो दुम्शा, येफ्ता कली खेरमे बाक्त। मेकोपुकीमी येफ्ता कली “आंइ आफ आ खिंमी इ के मारेइ यो अङस मबाक्ब। गे अर्को मीश आ तौ नवे” देंमा बाक्त। उत्पत्ती २१:१०
3 मोपतीके येफ्ता मेको आ लोक्बपुकी रे पा ब्रोंइचा कली प्रोक्शा, तोब रागीमी लशा बाक्शो बाक्माक्त। मिनु मरिम्शो पाइब मुरपुकी मेको नु गारशा, रोइक्थ, लमा बाक्त। न्यायाधीस ९:४; १सामुएल २२:२
4 मिनु इच्का नोले अम्मोनीपुकीमी इस्राएली नु लडाइ पामे बाक्त।
5 मिनु लडाइ दुम्मेनु, गिलाद ङा खाल्पापुकीमी तोब रागीमी बाक्शो येफ्ता कली ब्रथ लमा बाक्त।
6 मेकोपुकीमी येफ्ता कली “पिन, आंइ लडाइ पाइब आन ठेयब मुर दुमीन। मिनु गो अम्मोनी नु लडाइ पने चाप्नीकी” देंमा बाक्त।
7 मिनु येफ्तामी मेको गिलाद ङा खाल्पा आन कली “गेपुकीमी आं कली मदाक्थु, आं आफ आ खिं रे खेरतीनी। मुल श्येत जनी ना मारदे आं कली ब्रेत्नीनी?” देंमाक्त।
8 मिनु मेको खाल्पापुकीमी येफ्ता कली “मोपतीके गो इन कली ग्रुम्थ जाक्तक। मुल गोपुकी नु गाक्कीन। मिनु अम्मोनी नु लडाइ पा ग्राशा, गिलादमी बाक्ब नेल्ल आंइ ठेयब मुर दुमीन” देंमा बाक्त। न्यायाधीस १०:१८
9 येफ्तामी मेको आन कली “गेपुकीमी आं कली अम्मोनी नु लडाइ पथ लेम्शा लाइक्तीनी नु परमप्रभु यावेमी मेको आन कली आं गुइमी गेप्तु हना, इन ठेयब मुर दुम्नुङा?” दे माइक्मी बाक्त।
10 मिनु गिलाद ङा खाल्पापुकीमी येफ्ता कली “परमप्रभु यावे गो आंइ दातेमी सांकछी बाक्ब। गो इन देंशो खोदेंशो पाइनीकी” देंमा बाक्त।
11 मिनु येफ्ता गिलाद ङा खाल्पापुकी नु लमाक्त। मेकेर ङा मुरपुकीमी मेको कली ठेयब मुर नु लडाइ पाइब आन ठेयब मुर सेल्मे बाक्त। मिनु येफ्तामी मिस्पामी परमप्रभु यावे आ ङोंइती मेको लोव़ नेल्ल शोव़ङा बाक्त। न्यायाधीस ११:२९; न्यायाधीस १०:१७
12 मिनु येफ्तामी अम्मोनी आन पिप कली “गे मारदे आंइ रागी कली लडाइ तोथ पीनीनी? गे नु आंइ दातेमी मार मरिम्शो बाक्बा?” दे हिल्लो पचा कली मुर सोइक्ता बाक्त।
13 मिनु अम्मोनी आन पिपमी येफ्ता आ मुर आन कली “इस्राएलीपुकी इजीप्त रे जाक्शा, अरनोन खोला रे यब्बोक नु यर्दन खोला सम्म आंइ रागी लाइक्तेक्म। मेको रागी सिक्सी पा लेत्तीन” दे लोव़ सोइक्ता बाक्त।
14 मिनु येफ्तामी लेंशा मुर सोइश्शा अम्मोनी आन पिप कली
15 “येफ्ता आ लोव़ मार बाक्त देंशा हना, इस्राएलीपुकीमी गेनायो मोआबी आन रागी नु अम्मोनी आन रागी मलदेम। ब्यवस्था २:९,१९
16 इस्राएलीपुकी इजीप्त रे कुशा, गोरशो रागी रे लल समुन्द्र गे कादेश सहरम जाक्दीम्मा बाक्त।
17 मिनु एदोम ङा पिप कली ‘इन रागी ङा लां लचा गेकी’ दे लोव़ सोइक्त्मे बाक्त। तन्न एदोम ङा पिपमी मेको लोव़ नेंसीन मनेना बाक्त। मिनु मोआबी आन पिप कली यो लोव़ सोइक्तमे बाक्त। तन्न मेको यो मबिस्से बाक्त। मोपतीके इस्राएलीपुकी कादेशमी बाक्मा बाक्त। गन्ती २०:१४-२१
18 मेकेर रे एदोम नु मोआब रागी हिरशा, गोरशो रागी रे मोआब आ नां दाप्तीक गे लमा बाक्त। मिनु अरनोन खोला आ नेक्था ताम्बु कीङमे बाक्त। मोआबी आन रागी मओव़म। मारदे हना अरनोन मोआब आ सांद बाक्माक्त। गन्ती २१:१३
19 मिनु नोले हेश्बोनम बाक्शो एमोरी आन पिप सीहोन कली ‘इन रागी ङा लां रे पा आंइ रागी सम्म लचा गेकी’ दे लोव़ सोइक्तमे बाक्त। गन्ती २१:२१-३१
20 तन्न सीहोनमी इस्राएली आन कली मेकेर रे लाइनीम, दे थमा मसुदा बाक्त। मिनु मुर नेल्ल कली खुप्शा, याहासमी आन ताम्बु कीशा, इस्राएली नु लडाइ पामे बाक्त।
21 मिनु परमप्रभु यावे, इस्राएली आन परमप्रभुमी सीहोन नु आ मुर आन कली इस्राएली आन गुइमी गेमी बाक्त। मिनु मेकोपुकीमी मेको आन कली ग्राशा, आन रागीमी बाक्शो एमोरी आन रागी आंम के सेल्मे बाक्त।
22 मेकोपुकीमी अरनोन खोला रे पा यब्बोक खोला सम्म नु गोरशो रागी रे पा यर्दन खोला सम्म एमोरी आन रागी आंम के सेल्मे बाक्त।
23 मोपा परमप्रभु यावे, इस्राएली आन परमप्रभुमी आंम मुर आन कली रिम्शो पचा, दे एमोरी आन कली खेरा बाक्त। मुल एको रागी लेंशा ताक्चा मगारनीनी।
24 इन देवता केमोशमी इन कली गेशो ताइनीनी ममाइ ङा? परमप्रभु यावे, आंइ परमप्रभुमी मार गेबा, गो यो मेको ताइनीकी। गन्ती २१:२९
25 मुल मार, गे मोआबी आन पिप सिप्पोर आ तौ बालाक क्येङा रिम्शो बाक्नीनी? मार, मेकोमी इस्राएली नु जिशा, मेको नु लडाइ पवा ङा? गन्ती २२:२; यहोसु २४:९
26 इस्राएलीपुकी सहे सां बर्स सम्म हेश्बोन नु आ एर ओंथ ङा गाउंपुकी, आरोएर नु मेको आ एर ओंथ ङा गाउंपुकी नु अरनोन आ नेक्था ङा सहर नेल्लेम बाक्मा बाक्त। मारदे मेको क्येङा ङोंइती इन के मसेल्नी?
27 गोपुकीमी इन कली मारेइ यो मरिम्शो मपशो। तन्न गेपुकीमी आं कली लडाइ तोशा, मरिम्शो पाइनीनी। मुलाक्ती परमप्रभु यावेमी इस्राएली नु अम्मोनी आन दातेमी निसाफ पाइब” दे येफ्तामी अम्मोनी आन पिप कली लोव़ सोइक्ता बाक्त।
28 तन्न अम्मोनी आन पिपमी येफ्तामी सोइश्शो लोव़ मारेइ खोदेंशो मलाक्माक्त।
29 मिनु परमप्रभु यावे आ सोक्तीम येफ्ता कली सुमा बाक्त। मिनु गिलाद नु मनस्से आन रागी लाक्शा, गिलाद ङा मिस्पा जाक्दीम्माक्त। मिनु मेकेर रे अम्मोनी आन रागी लमाक्त। न्यायाधीस ६:३४
30 येफ्तामी परमप्रभु यावे कली कबल का पवा बाक्त। मेकोमी मार कबल पवा बाक्त देंशा हना “परमप्रभु यावे, गे अम्मोनी आन कली आं गुइमी गेतीनी हना, २सामुएल १५:८
31 गो अम्मोनी रे रिम्शो पा आं खिं लेत्ती हना, सु आं खिंमी नेल्ल क्येङा ङोंइती गो नु ग्रुम्थ जाक्बा, मेको इन के दुम्ब। गो मेको कली चोशा चढ़ेनुङ” दे कसम जवा बाक्त। २राजा ३:२७
32 मिनु येफ्ता अम्मोनी नु लडाइ पथ आइक्ची हांम शोक्शा लमाक्त। मिनु परमप्रभु यावेमी अम्मोनी आन कली येफ्ता आ गुइमी गेवा बाक्त।
33 मेकोमी आरोएर रे मिन्नीथ नु आबेल-केरामीम सम्म २० ओटा सहर खतम सेला बाक्त। मोपा इस्राएलीमी अम्मोनी आन कली ग्रामा बाक्त।
34 मिनु येफ्ता आ खिं मिस्पामी लेम्माक्त। मिनु आ तमी खैजडी ताप्शा, सिल पना पन मेको कली ग्रुम्थ जाक्माक्त। मेको आ तमी का ला बाक्माक्त। अरु आल मबाक्मा बाक्त।
35 मिनु येफ्तामी आ तमी तवा चोटीन आ वा खाक्शा “आं तमी, आं थुं जिक्तीवी। शुश श्येत गेप्तीवी। गो परमप्रभु यावे कली कसम जाता। मिनु मेको कसम मखाप्थु मदुम्नुङ” देंमाक्त। गन्ती ३०:३
36 मिनु आ तमीमी “आं आफ, परमप्रभु यावे कली कसम जाइतीनी हना, कबल पशो खोदेंशो पा आं कली पने। मारदे हना परमप्रभु यावेमी इन जोरी सत्रु अम्मोनी नु क्येक्क लेश्शो बाक्ब।
37 तन्न आं कली शिशी पन। महिना निक्शी सम्म आं कली प्रोनीन। आं वारचपुकी नु एको डांडाम हिरनुङ। गो कन्नेमी बेक्चा माल्ताक्यी, दे रोंका पचा तङल” देंमाक्त।
38 मिनु येफ्तामी “लावो” देंशा, आ तमी कली महिना निक्शी सम्म प्रोना बाक्त। मिनु मेको आ वारचपुकी नु डांडा लशा ङा मीन आ कन्नेमीन बाक्शा बेक्चा माल्शो आ पर्बम ङाक्माक्त।
39 मिनु महिना निक्शी नोले मेको लेश्शा जाक्माक्त। मिनु येफ्तामी परमप्रभु कली आ पशो कसम खबा बाक्त। मिनु मेको मीश आल कन्नेन बेक्माक्त। न्यायाधीस ११:३१; ब्यवस्था १२:२९-३१
40 मेना रे इस्राएल ङा तमी नेल्लेमी बर्स बर्समी ४ नाक्त सम्म गिलाद सहर ङा येफ्ता आ तमी कली मिम्शा, रोंका पाइनीम।