Job 5 in Sunwar
1 मिनु एलीफाजमी “मुल ब्रेश्शा कोव़ङीन। इन कली सुम लोव़ लेप्बाक्मा? गे सु कली ‘वारच पाइय्यीनी’ दे ब्रेत्नीनी?
2 गाइक्तीकेम मूर्ख आन कली साइक्ब। मिनु गेहे पतीकेम मारेइ मजोक्ब आन कली साइक्ब।
3 गो मूर्ख आन शाक्श थोक्शो तशो बाक्नुङ। तन्न गो कालेमीन मेको आन खिं कली सराप चीले पाइक्ता। भजन संग्रह ३७:३५-३६
4 मेको आन आल कोव़ब मुर मबाक्नीम। मेकोपुकी ठेयब लाप्चोम साइक्चा पुंइसीनीम। मेको आन कली प्रोंइब सुइ मबाक्ब।
5 शोव़लु बेक्शोपुकीम मेको आन खुप्शो मारेइ मारेइ नेक्नीम। आन जचा थोव़क चू आन दाते रे यो खुप्शा योल्नीम। तूतू दाक्शोपुकी मेको आन शोंप तशा वाल्नीम।
6 मारदे हना श्येत जतीके फुरक रे मजाक्ब। खप रे श्येत मग्रूब।
7 मुरपुकी श्येत जचा कली जरमेसीनीम। मेकोपुकी मी आ फिलीङगो खोदेंशो पा जाम्नीम।
8 गो मेको नङ हना, गो परमप्रभु कली मलु वा। आं पुंइशो लोव़ परमप्रभु कली देंङ वा।
9 मेकोमी ठेयब, रुप्ने मचाप्चा ङा नु छक लाक्चा ङा गेय हिक्ने मचाप्चा ङा पा पाइब। अय्युब ९:१०
10 मेकोम खप कली रेउ यिपाइक्ब। मिनु रू कली ब्वाक्कु सोइक्ब।
11 मेकोम महिक्सीशो मुर आन कली ठेयब सेल्ब। मिनु रोंका पाइब आन कली लेंशा ग्येरपाइक्ब। भजन संग्रह ७५:८; लूका १:५२
12 मेकोम मरिम्शो मिम्शा पाइब आन कली आन मिम्शो मदुम्पाइक्ब। मिनु मेकोपुकीम आन मिम्शो पने मचाप्नीम।
13 मेकोमी आंम कली जोक्ब तुइक्ब मिम्शा गेय पाइब कली आंम गेयमी मेको कली ग्याइक्पाइक्ब। मिनु आन मरिम्शो मिम्शो रीब पा खतम दुम्ब। १कोरिन्थी ३:१९
14 मेको आन कली नाक्तीन छिङछिङ दुम्ब। मिनु नाक्ती उइक्थ दुम्मेनु, मेकोपुकी नाक्दो खोदेंशो पा सुल्शा गाक्नीम। यसैया ५९:९-१०
15 तन्न मेकोम मारेइ मथीब आन कली आन मरिम्शो लोव़ रे प्रोंइब। मिनु सक्ति पाइश्शो आन गुइ रे प्रोंइब।
16 मोपतीके प्रुङग आन आस बाक्ब। मिनु ठीक मपाइबपुकीमी आन शोव़ ख्रेप्चा माल्नीम।
17 परमप्रभुमी ठीक सेल्चा पुंइसीशो मुर ग्येरसीशो बाक्नीम। मोपतीके नेल्ल क्येङा ठेयब सक्ति पाइश्शो आ शेंशो आइक्च ममिम्तीन। भजन संग्रह ९४:१२; हितोपदेस ३:११
18 मारदे हना मेकोमी गार सेल्ब। मिनु मेकोमीन फ्रेंब। मेकोमी तुप्ब। मिनु मेकोमीन सापाइक्ब। ब्यवस्था ३२:३९; होसे ६:१
19 मेकोमी इन कली ६ खेयप श्येत दुम्त हना यो, प्रोंइब। ७ खेयप ङा श्येतमी इन कली मथीब। भजन संग्रह ३७:२४; हितोपदेस २४:१६
20 मेकोमी अन्काल दुम्मेनु, इन कली बेक्चा रे प्रोंइब। मिनु लडाइ दुम्मेनु, तरवार रे प्रोंइब।
21 मेकोम इन कली शुक्शी पाइब रे प्रोंइब। मिनु खतम दुम्तीक नाक्त जाक्मेनु गे हिंचा ममाल्नीनी।
22 खतम दुम्तीके नु अन्काल जाक्मेनु, गे रिश्शा बाक्नीनी। मिनु गे ब्वाकी ङा जन्तु आन क्येङा हिंचा ममाल्नीनी।
23 इन रूमी फुल्लु मबाक्नीम। मिनु ब्वाकी ङा जन्तुपुकीम इन कली श्येत मगेनीम। यसैया ११:६-९; होसे २:२०
24 गे इन ताम्बु मारेइ मदुम्शो बाक्ब दे तुइश्शो बाक्नीनी। मिनु गे इन क्यारश भेडा कली हिक्शा कोव़नीनु, का यो मजाम्शो बाक्नीम।
25 इन चच युइ शुश दुम्शो बाक्नीम। इन आल घांस खोदेंशो पा शुश दुम्शो बाक्नीम।
26 गे खूशो दुम्शा बेक्नीनी। बाली नाली ओंइची ना खोदेंशो पा, इन नाक्त जाक्ब।
27 गोपुकीम एको आन पर्बम हिल्लो हिक्सी पाइतक। मिनु नेल्ल थमा बाक्ब। मोपतीके एको नेनीन। मिनु तुइक्तीन” दे एलीफाजमी अय्युब कली मदा बाक्त।