Jeremiah 50 in Sunwar
1 परमप्रभु यावेम बेबीलोन नु कल्दी आन रागी आ पर्बम येरमीया कली लोव़ पाप्तु। यसैया ४६:१
2 मार लोव़ पाप्तु देंशा हना “रागी रागी ङा मुर आन दातेमी एको लोव़ नेंपतो। छेदर पोक्शा नेल्ल आन कली नेंपाइश्शा ठेयब सेंदा पा देनो। लोव़ का यो मख्रुइक्तो। बेबीलोन ब्रुत। बेल देवता मुने दोक्त। मेरोदक देवता सुर्ता पाइब। मेको आन मूर्ति मुने दोक्नीम। मेको सुर्ता पाइनीम। बेल बेबीलोन सहर ङा देवता बाक्ब।
3 उत्तर रे रागी का ङा मुरपुकीम मेको कली लडाइ तोइनीम। मिनु मेको आ रागी श्येत्थ सेल्नीम। मेकेर सुइ मबाक्नीम। मुर नु जन्तु नेल्ल प्रोक्नीम।
4 मेको नाक्ती इस्राएल ङा मुरपुकी नु यहूदा ङा मुरपुकी काथा ङाक्ना ङाक्न परमप्रभु यावे, आन परमप्रभु कली माल्थ गाक्नीम। येरमीया ३१:९
5 मेकोपुकीमी ‘सियोन गे लतीक लां ते बाक्बा?’ दे हिल्लो पाइनीम। मिनु ‘इन गाक्शो लांन बाक्ब’ देंनीम। मेकोपुकीमी गेना हना यो लीब मप्रेंतीके कबल पा परमप्रभु यावे कली जिम्मा गेंसीनीम। येरमीया ३२:४०
6 आं मुरपुकी जाम्शो भेडा खोदेंशो बाक्तेक्म। मेको आन गोठलापुकीम मेको आन कली हेंथे गाक्पाइश्शो बाक्तेक्म। मिनु मेको आन कली डांडा मेर हिरपाइश्शो बाक्तेक्म। मेकोपुकी डांडा पहाड सम्म हिरसाक्म। मिनु आन गोठ प्रेंताक्मे। येरमीया २३:१
7 मेको आन कली थिप्बपुकीम मेको आन कली नेक्तेक्म। मिनु मेको आन जोरी सत्रुमी ‘गो दोसी मनकी। मारदे हना मेकोपुकीमी परमप्रभु यावे कली पाप पाम्तेक्म। मेको आन ठीक पा जोतीके नु आन किकी पिपी आन आस पशो, परमप्रभु यावे बाक्त’ देंतेक्म।
8 बेबीलोन रे प्रोक्कीन। कल्दी आन रागी प्रोनीन। मिनु क्यारश भेडा आन कली लां कोंइब बोका खोदेंशो दुमीन। येरमीया ५१:६; यसैया ४८:२०
9 मारदे हना गो उत्तर रे ठेयब रागी रागी ङा लडाइ पाइब आन कली बेबीलोन आ पर्बम क्युक्शो बाक्नुङ। मेकोपुकी लडाइ पचा कली सासीनीम। मिनु मेको कली लडाइ तोइनीम। मेको आन ब्रा थाम्पा लडाइ पस जोक्ब मुर खोदेंशो बाक्नीम। मेकोपुकी मोशा मलेत्नीम।
10 मोपा कल्दी रागी रोइक्चा पुंइसीब। मिनु मेको कली रोइक्ब नेल्ल रूनीम” दे परमप्रभु यावेम देंत।
11 परमप्रभु यावेम “गे ग्येरसीनीनी। शुश ग्येरसीने। गे आं शोंप रोइक्ब बाक्नीनी। दांइ पाइब मगिक्शो बी खोदेंशो पा प्रेनीनी। गे शारा खोदेंशो पा ग्रीनीनी।
12 इन ममा थाम्पा मुने दोक्ब। इन कली जरमेब शिशी मताइब। मेको इन रागी रागी आन दातेमी नेल्ल क्येङा आइक्च दुम्ब। मेको मुर मबाक्तीके सोव़शो रागी नु गोरशो रागी दुम्ब।
13 परमप्रभु यावे आ चुरतीकेमी मेकेर सुइ मबाक्नीम। मेको थम श्येत्थ रागी दुम्ब। बेबीलोन रे पा गाक्ब मेको तशा हिंनीम। मिनु मेको आ श्येत तशा शुक्शी पाइनीम। येरमीया ५१:३७
14 गे लिब्रा आप्बपुकी, बेबीलोन आ एर ओंथ इन बाक्तीकेम राप्शा बाक्कीन। ब्रा कली का यो महेक्थु आप्पीन। मारदे हना मेकोमी परमप्रभु यावे कली पाप पाप्तु।
15 मेको आ एर ओंथ नेल्ल बाक्शा, ठेयब सेंदा पा ग्रीङीन। मेको इन कली जिम्मा गेंसीब। मेको आ बोल्यो दरवार एत्तेक्म। मेको आ गारो प्रेत्चा पुंइसीशा दोक्तेक्म। मारदे हना मेको परमप्रभु यावे आ क्येक्क लेश्शो बाक्ब। मेको कली क्येक्क लेत्तीन। मेकोमी अरु आन कली पाइश्शो खोदेंशो पा मेको कली यो पतीन। प्रकाश १८:६
16 गे बेबीलोनम वांचेर शोक्ब आन कली खेरीन। मीशो अन्न रिक्ब आन कली खेरीन। खतम पोक्ब तरवारम पतीके नेल्ल आन कली आन आन खिं ङा मुर आन बाक्तीके लेश्शा लचा गेने। मेको नेल्ल आन आन रागी प्रोक्चा माल्नीम।
17 इस्राएल गुप्सपुकीम खेदा पा एर ओंथ ब्रपाइश्शो भेडा खोदेंशो दुम्शो बाक्ब। मेको कली ङोंइती अस्सुर ङा पिपम दाक्तु। मिनु नेल्ल क्येङा नोले बेबीलोन ङा पिप नेबुकदरेसरमी मेको आ रुश नेल्ल नेक्तु” देंत।
18 मोपतीके मुर नेल्ल आन परमप्रभु यावे, इस्राएली आन परमप्रभुमी “गो बेबीलोन ङा पिप नु मेको आ रागी कली अस्सुर ङा पिप कली सजाइ गेशो खोदेंशो पा, सजाइ गेनुङ। २राजा १९:३५
19 गो इस्राएल कली आं कली योव़तीकेम लेश्शा चाक्नुङ। मिनु मेको कारमेल नु बाशान मेर जोइब। एफ्राइम नु गिलाद ङा पहाड मेर मेको आ शोव़लु बेक्शो रूब।
20 मेको नाक्ती इस्राएल आ मरिम्शो पशो माल्शा कोव़शा हना यो, मथिंसीब। यहूदा आ पाप माल्शा हना यो, मथिंसीब। मारदे हना गो आं प्रोंइशा वोइश्शो लीशो आन कली आन पाप माफ गेतामी। येरमीया ३३:७-८
21 मेराथाइम रागी कली लडाइ तोने। पेकोद आ मुर आन कली लडाइ तोने। मिनु नेल्ल खतम पोक्कीन। गो इन कली अरेशो खोदेंशो पा, नेल्ल पने” दे परमप्रभु यावेमी देंत।
22 लडाइ ङा रेयके नु ठेयब खतम दुम्तीके आन नेक्था बाक्ब।
23 दोपा रागी नेल्ल ङा घन जिक्शा फस दुम्मे, मोपा बेबीलोन रागी रागी आन दातेमी शुश हिंचा ङा दुम्ब। येरमीया ५१:२०
24 बेबीलोन, गो इ कली ब्वारद का दाइक्ताक्ङ। गे मतुइक्थु ग्याइक्चा पुंइसीनेवे। मिनु इ कली थिश्शा, ग्याइक्चा ताइतक। मारदे हना गे परमप्रभु यावे कली मरिम्शो पशो बाक्ते।
25 परमप्रभु यावेम आ या वोइक्तीक खिं रोक्तु। मिनु आ चुरशो ङा या ग्रुंइताक्व। मारदे हना मुर नेल्ल आन परमप्रभु यावेमी कल्दी आन रागीम गेय का पचा माल्ब।
26 मेको आ एर ओंथ नेल्ल रे लडाइ पथ जाक्कीन। मेको आ अन्न वोइक्तीक खिं रोक्कीन। मेको कली अन्न खोदेंशो पा तेलीन। मेको कली मारेइ मलीशो खतम सेलीन। मेको के मारेइ मलील।
27 मेको आ सांढे ब्यफ नेल्ल सतीन। मेको आन कली क्योरचा कली लतीन। आबी, आबी, मेको आन नाक्ती जाक्त। मेको आन कली सजाइ गेतीक नाक्ती जाक्त।
28 मिनु परमप्रभुमी “नेनीन, बेबीलोन रे प्रोक्ब मुर नु मेकेर बाक्ब अर्को रागी रे प्रोक्शो मुरुम सियोनम ‘परमप्रभु यावे, आंइ परमप्रभुमी क्येक्क लेप्ब। आ खिं आ पर्बम क्येक्क लेप्ब’ दे नेल्लेम नेंचा ङा पा शेंनीम।
29 बेबीलोनी आन कली लिब्रा आप्बपुकी ब्रेत्तीन। लिब्रा आप्ब नेल्ल आन कली ब्रेत्तीन। मेको आ एर ओंथ नेल्ल ताम्बु कीशा मुर आन कली तेक्कीन। मेकेर रे सुइ ब्रोंइचा मतामेक्ल। मेको आ पशो खोदेंशो पा मेको कली क्येक्क लेत्तीन। मेकोमी पशो खोदेंशो पा, मेको कली यो पतीन। मारदे हना मेकोमी इस्राएली आन का ला बाक्शो परमप्रभु यावे कली शुक्शी पाप्तु। येरमीया ५०:१५
30 मोपतीके मेको आ ठिटा मुरपुकी लां मेर गोल्नीम। मिनु मेको आ लडाइ पाइब नेल्ल खतम दुम्नीम” दे परमप्रभु यावेम देंत।
31 परमप्रभु, मुर नेल्ल आन परमप्रभु यावेमी “गो इ कली ठेयब लेश्शो दुम्तीके काइ मदाक्नुङ। इ नाक्ती जाक्त। इ कली सजाइ गेतीक नाक्ती जाक्त।
32 ठेयब लेश्शो मुर दाइल पा गोल्ब। मेको कली पोक्ब सुइ मबाक्नीम। मिनु गो मेको आ सहरम मी सुइक्नुङ। मेको मीम मेको आ एर ओंथ बाक्ब नेल्ल आन कली दाक्ब” देंत।
33 मुर नेल्ल आन परमप्रभु यावेमी “इस्राएल ङा मुर नु यहूदा ङा मुर श्येत गेचा नु दिप्चा पुंइसीनीम। मेको आन कली ग्याइश्शा लाइक्बपुकीम मेको आन कली लचा मगेनीम।
34 मो हना यो मेको आन कली श्येत रे प्रोंइब सक्ति पाइश्शो बाक्ब। मेको आ नें मुर नेल्ल आन परमप्रभु यावे बाक्ब। मेकोमी मेको आन कली आ सक्तिमी थमा पा वारच पाइब। मिनु रागी कली रिम्शो दुम्पाइक्ने चाप्ब। तन्न बेबीलोनम बाक्ब आन कली चहिं थुं नाइक्चा मगेब” दे परमप्रभु यावेमी देंत।
35 मिनु परमप्रभु यावेमी “कल्दी आन कली तरवार का जाक्त। बेबीलोनम बाक्ब नेल्ल आन कली, आन ठेयब मुर आन कली नु आन जोक्ब तुइक्ब मुर आन कली यो तरवार जाक्त।
36 मेको आ जादू कली यो तरवार का जाक्त। मोपतीके मेकोपुकी मूर्ख दुम्नीम। मेको आ लडाइ पाइब आन कली यो तरवार का जाक्त। मिनु मेको खतम दुम्नीम।
37 मेको आ शारा, आ बग्गी नु मेको आन दातेम बाक्ब अर्को रागी ङा लडाइ पाइब आन कली साइक्चा कली तरवार जाक्त। मोपतीके मेकोपुकी मीश मुर खोदेंशो दुम्नीम। मेको आ शोंप नेल्ल आन कली तरवार जाक्त। मेको नेल्ल रोइक्तीक दुम्ब। येरमीया ५१:३०
38 मेको आ ब्वाक्कु सोव़चा कली काइ रेउ मयी। मारदे हना मेको शुश मूर्ति आन रागी बाक्ब। मिनु मेको आ देवी देवता आन पर्बम निप्स ग्राइश्शो खोदेंशो दुम्ब।
39 मोपतीके बेबीलोन सहरम ब्वाकी ङा जन्तु नु फरपुकी बाक्नीम। मिनु मेकेर ठेयब चिक्ब बास बाक्नीम। मेकेर मुल लेंशा नेल्ल पाला सम्म मुर मबाक्नीम।
40 मिनु सोदोम, गोमोररा नु मेको आस एर ओंथ ङा गाउं आन कली लोक्शो खोदेंशो पा बेबीलोन सहरमी सुइ मबाक्नीम। मेकेर मुर मबाक्तीके दुम्ब” दे परमप्रभु यावेमी देंत। येरमीया ४९:१८; उत्पत्ती १९:२४-२५
41 कोव़ङीन, मुरपुकी उत्तर रे जाक्ना जाक्न बाक्नीम। शुश जात ङा नु शुश पिप आन जोंब बोक्शा ङोन रागी रे जाक्नीम। येरमीया १:१४
42 मेकोपुकी लिब्रा नु तूतीक कुरशो, थम मरिम्शो पाइब नु शिशी मपाइक्ब बाक्नीम। मेको आन रेयके समुन्द्र ग्रीशो खोदेंशो बाक्ब। मेकोपुकी शारा ङोइश्शा जाक्नीम। मेको लडाइ तोचा कली आन बाक्तीकेम राप्नीम। बेबीलोन आ तमी, इ कली लडाइ तोचा कली जाक्नीम। येरमीया ६:२३
43 मिनु बेबीलोन ङा पिपम मेको आन पर्बम लोव़ नेंतु। मिनु आ थुं लुक्च लत। मेको सुत्केरी रोइ पशो मीश मुर खोदेंशो पा सुर्ता पा हिंत।
44 यर्दन आ नेक्था ङा ठेयब ब्वाकी रे बस्तु योव़तीकेम गुप्स जाक्शो खोदेंशो पा गो मेको कली याम कामी मेको आ रागी रे ग्रुंइनुङ। गो सु कली सासन पचा कली योव़ङु, मेको कली गेनुङ। आं खोदेंशो सु बाक्बा? आं कली सुम अरेने चाप्बा ङा? तेको गोठला आं ङोंइती राप्ने चाप्बा ङा? येरमीया ४९:१९
45 मोपतीके परमप्रभु यावेम बेबीलोन आ पर्बम पचा चिक्शो गेय नु कल्दी रागी ङा मुर आन पर्बम मिम्शो दोदेंशो बाक्बा, मेको नेनीन। थमा पा लाइक्चा पुंइसीनीम। बेबीलोन ङा प्रुङग मुर आन कली यो कीशा लाइक्चा पुंइसीनीम। मेको आन बाक्तीक मेको तशा हिंब।
46 बेबीलोन कली ग्रामानु, मेको आन रेयकेम रागी ख्रिंख्रि पाइब। मेको आन वाइ ब्रेश्शो रागी रागी ङा मुर आन दातेमी नेंसीब।