Jeremiah 26 in Sunwar
1 यहूदा ङा पिप योसीयाह आ तौ येहो-याकीममी सासन पवा आ ङोंइती ङा बर्सम परमप्रभु यावेमी आं कली लोव़ पाप्तु। २राजा २३:३४-३७
2 परमप्रभु यावेमी मार देंत, देंशा हना “आं खिं ङा लाङगाम रपो। मिनु आं कली ठेयब सेल्चा कली जाक्ब यहूदा सहर ङा मुर नेल्ल आन कली गो इ कली देंशो लोव़ नेल्ल मेको आन कली देनो। लोव़ का यो मफेवो।
3 मिनु मेको नेंशा, मेको नेल्ल आन मरिम्शो लां रे लेत्नीमी, कों? मिनु मेको आन मरिम्शो पशो आ पर्बम मेको आन कली ठेयब श्येत चाक्तीक रे आं थुं फाइक्नुङा, कों? गो मेको आन तार चाक्चशो खतम दुम्तीक मचाक्नुङा, कों? येरमीया १८:८; येरमीया ३६:३
4 गेमी मेको आन कली ‘परमप्रभु यावेम आं लोव़ मार बाक्ब देंशा हना, गे आं लोव़ पशो नोफा दाइश्शा मनेंतीनी हना, गो इन ङोंइती वोइश्शो आं अरेशो मपाइतीनी हना,
5 गो गेना हना यो इन बाक्तीकेम सोइश्शो आं गेय पाइब, आं लोव़ पाइब आन लोव़ नोफा दाइश्शा मनेंतीनी हना, गेपुकीम मेको रिम्शो पा मनेंशो बाक्तीनी हना, येरमीया २५:४
6 गो मेको खिं कली शिलो खोदेंशो सेल्नुङ। मिनु मेको सहर कली रागी नेल्ल ङा मुर नेल्ल आन दातेमी सराप राइब सेल्नुङ’ देनो” देंत। २राजा २५:९; येरमीया ७:१२
7 मिनु चढ़ेबपुकी, परमप्रभु यावे आ लोव़ पाइबपुकी नु मुर नेल्लेमी परमप्रभु यावे आ खिंम येरमीयामी देंशो लोव़ नेंतेक्म।
8 मिनु परमप्रभु यावे आ अरेशो लोव़ नेल्ल, येरमीयाम मुर नेल्ल आन कली नेंपाइक्ने थुमा चोटी चढ़ेबपुकी, परमप्रभु यावे आ लोव़ पाइबपुकी नु मुर नेल्लेम मेको कली ग्याइश्शा “गे साइक्चान पुंइसीनेवे।
9 गे मारदे परमप्रभु यावे आ नेंम लोव़ पा ‘एको खिं शिलो खोदेंशो दुम्ब। मिनु एको सहर चहिं श्येत्थ नु मुर मबाक्तीके दुम्ब’ देने” देंशा, परमप्रभु यावे आ खिंम येरमीया आ एर ओंथ मरिक्थ्री पा मुर देल्तेक्म।
10 मिनु यहूदा ङा सरकार आ गेय पाइब मुरपुकीम मेको लोव़ नेंशा, मेकोपुकी पिप आ खिं रे परमप्रभु यावे आ खिंम जाक्तेक्म। मिनु परमप्रभु यावे आ खिं ङा नक लाप्चो आ ङोंइती बाक्तेक्म।
11 मिनु चढ़ेबपुकी नु परमप्रभु यावे आ लोव़ पाइबपुकीम, सरकार आ गेय पाइब मुरपुकी नु मुर नेल्ल आन कली “एको मुर कली साइक्चान माल्ब। मारदे हना एकोमी एको सहर आ पर्बम मरिम्शो पा परमप्रभु यावे आ लोव़ पाप्तु। मेको गेपुकीम आंमा यो नेंतीनी” देंतेक्म। प्रेरित ६:१३
12 मिनु येरमीयामी सरकार आ गेय पाइब नु अरु मुर नेल्ल आन कली “परमप्रभु यावेम आं कली एको खिं नु एको सहर आ पर्बम इन नेंशो लोव़ पचा कली सोइश्शो बाक्ब।
13 मुल गेपुकीम इन पतीक नु इन गेय रिम्शो सेलीन। मिनु आंम परमप्रभु यावे, इन परमप्रभु आ अरेशो टिने। मिनु परमप्रभु यावेम इन कली खतम पोक्तीक रे आ थुं लेप्ब। येरमीया ७:३
14 गो इन गुइम बाक्शो बाक्नुङ। इन कली मार रिम्शो नु ठीक दुम्बा, मेको पाइय्यीनी।
15 तन्न गे एको तुइक्तीन। गेपुकीम आं कली साइक्तीनी हना, आंम इन तारी, एको सहर तारी नु एकेर बाक्ब आन तारी दोस मताइब मुर का आ हुश शाइक्पाइश्शो दोस चाक्नीनी। मारदे हना परमप्रभु यावेम इन कली एको लोव़ नेल्ल नेंपाइक्चा कली आं कली सोइश्शो बाक्त” देंत। प्रस्थान २३:७; मत्ती २७:४,२५
16 मिनु सरकार आ गेय पाइब मुर नु अरु मुर नेल्लेम, चढ़ेबपुकी नु परमप्रभु यावे आ लोव़ पाइब आन कली “एको मुर साइक्चा पुंइसीचा ङा मुर ममाइ। एको मुरुम इं कली परमप्रभु यावे, इं परमप्रभु आ नेंम एको लोव़ नेंपाइक्तु” देंतेक्म।
17 मिनु मेको रागी ङा शेंब खाल्पा का निक्शी बोक्शा, मेको देल्शा बाक्शो मुर आन कली
18 “यहूदा ङा पिप हिज्कीयाह आ पालाम मोरेशेथ ङा मीकाहम परमप्रभु यावे आ लोव़ पशो बाक्त। मेकोमी यहूदा ङा मुर नेल्ल आन कली ‘मुर नेल्ल आन परमप्रभु यावेम सियोन कली रू खोदेंशो पा वाक्सीब। यरूसलेम चहिं फुल्लु तेल्शो खोदेंशो दुम्ब। परमप्रभु यावे आ खिं चहिं रवापुकी वाशा सुम्शो डांडा खोदेंशो दुम्ब’ देंशो बाक्त” देंतेक्म। मीका १:१; मीका ३:१२; येरमीया ९:१०
19 मिनु मेकोपुकीमी “मार, यहूदा ङा पिप हिज्कीयाह नु यहूदा ङा अरु सुइ मुरुम मेको कली सदमे ङा? मिनु मार, परमप्रभु यावे क्येङा हिंशा हिज्कीयाहम मेको आ शिशी ममला ङा? मिनु परमप्रभु यावेम मेको आन तार चाक्चशो खतम पोक्तीक रे आ थुं मलेत्ता ङा? तन्न गोपुकीम आंम इं तार ठेयब खतम दुम्तीक चाक्चा चिक्शो बाक्तय” देंतेक्म। येरमीया १८:८
20 मेकोपुकी नु अर्को मुर का यो बाक्त। मेकोमी परमप्रभु यावे आ नेंमी लोव़ पाप्तु। मेको किरयथ-यारीमम बाक्ब शेमायाह आ तौ उरीयाह बाक्त। मेकोमी यो मेको रागी नु मेको सहर आस पर्बम येरमीयामी खोदेंशो पा परमप्रभु यावेम मरिम्शो पचशो आ पर्बम लोव़ पाप्तु। यहोसु १:५९
21 मिनु पिप येहो-याकीम नु मेको आ ठेयब मुरपुकी, आ कप्तान नेल्लेम उरीयाह आ पशो लोव़ नेंतेक्म। मिनु पिपम मेको कली साइक्चा माल्तु। तन्न मेको लोव़ नेंशा उरीयाह हिंत। मिनु प्रोक्शा इजीप्त रागी लत।
22 मो हना यो येहो-याकीममी आकबोर आ तौ एल्नाथान नु मेको नु अर्को मुरपुकी इजीप्त रागीम सोइक्ताक्व।
23 मिनु मेकोपुकीमी उरीयाह कली इजीप्त रे चाक्तेक्म। मिनु पिप येहो-याकीम आ ङोंइती राप्पाइक्तेक्म। मिनु पिपम मेको कली साइक्चा कली तरवार आप्पाइक्तु। मिनु मेको आ बेक्शो रां आइक्च आइक्च मुर आन कली ताइक्तीकेम ताइक्पाइक्तु।
24 तन्न शाफान आ तौ अहीकामम मुल यो येरमीया आ पोन बोक्शा लोव़ पाप्तु। मोपतीके येरमीया साइक्पांइसीचा कली मुर आन गुइम जिम्मा गेचा मपुंइसे। २राजा २२:१२