Jeremiah 22 in Sunwar
1 परमप्रभु यावेम “उइ यहूदा ङा पिप आ दरवारम लशा, मेकेर मार लोव़ पचा माल्नेवे देंशा हना,
2 ‘दाऊद आ नित्तीकेम निप्ब, यहूदा ङा पिप, इन गेय पाइबपुकी नु मेको ठेयब लाप्चो रे ओव़बपुकी परमप्रभु यावे आ लोव़ नेनीन।
3 परमप्रभु यावेमी मार देंत देंशा हना “गे ठीक निसाफ पने। ठीक गेय पने। रोइक्चा पुंइसीशो आन कली मरिम्शो पाइब आन गुइ रे प्रोनीन। अर्को रागी ङा मुर, रोम रोइक्च नु आन वोंइश बेक्शो मीश मुर आन कली मरिम्शो मपने। मिनु एको रागीम मारेइ दोस मताइब आन हुश मशाइक्पतीन। येरमीया २१:१२
4 मारदे हना गेपुकीम थमा पा एको आं लोव़ पाइतीनी हना, एको दरवार ङा ठेयब लाप्चो रे पा ओव़शा, दाऊद आ नित्तीकेम निप्ब पिप गेना हना यो बाक्ब। मेको बग्गी नु शाराम जाक्शा, मेको आ गेय पाइब मुरपुकी नु अरु मुरपुकी नु ओव़ब”। येरमीया १७:२३
5 तन्न गेपुकीम एको आं लोव़ मपाइतीनी हना, परमप्रभु यावेम “गो आं नेंमी कसम जशा, एको दरवार क्याम्नुङ” दे मतो’ ” देंत। १राजा ९:८
6 मारदे हना यहूदा ङा पिप आ दरवार आ पर्बम परमप्रभु यावेमी “गे आं कली गिलाद नु लेबानोन ङा डांडा खोदेंशो बाक्नेवे। गो इ कली गोरशो रागी नु मुर मबाक्शो सहर खोदेंशो सेल्नुङ, दे कसम जाता।
7 गो इ कली या कुरशा, खतम सेल्ब आन कली ठीक पाइनुङ। मेकोपुकीम इ नेल्ल क्येङा रिम्शो लाइश्शो लेबानोन ङा रवा तिम्नीम। मिनु मीम हुम्नीम।
8 मिनु शुश रागी रागी ङा मुरपुकी एको सहर रे पा लाइनीम। मिनु मेको नेल्लेमी ‘परमप्रभु यावेम, मारदे एको ठेयब सहर कली ओदेंशो पवा?’ देंमुइनीम।
9 मिनु मेको आन कली ‘मारदे हना मेकोपुकीमी परमप्रभु यावे, आन परमप्रभु आ कबल पशो प्रोंइशा, देवी देवता आन कली पूजा पा, मेको आन कली गेय पाम्तेक्म’ देंशा लोव़ लेत्चा पुंइसीनी” देंनीम।
10 बेक्शा लशो आन पर्बम मङाक्कीन। मेको आन पर्बम रोंका मपने। मेको क्येङा यो ग्याइश्शा लाइश्शो मुर आन पर्बम ङाक्कीन। मारदे हना मेको गेनायो मलेप्ब। मेकोमी आ रागी गेनायो मताइब। २राजा २३:२९-३४
11 परमप्रभु यावेम यहूदा ङा पिप योसीयाह आ तौ शाल्लुम आ पर्बम लोव़ पाइब। मेको आ आफ आ पा ङा यहूदा ङा पिप दुम्त। मिनु मुल मेको एक रे लत। मेको एक लेश्शा मजाक्ब।शाल्लुम कली योआहास यो देंनीम। १इतिहास ३:१५; २इतिहास ३६:१-४
12 मेको कली तेको रागीम ग्याइश्शा लदमे। मेको मेक उइ बेक्ब। मेकोमी एको रागी लेंशा गेनायो मताइब।
13 “आबी, आबी, सुमी पाप पतीकेमी आ खिं सेल्बा, सुम आ खिं ङा आइक्था ङा कोठा ठीक मपतीकेमी सेल्बा, मेकोमी आ नेक्था ङा मुर आन कली मोशा गेय पपाइक्ब। मिनु मेको आन कली आन गेय पशो ङा गाल्च मगेब। २राजा २४:१४; मीका ३:१०; लेवी १९:१३; याकूब ५:४
14 मेकोमी ‘गो आं कली तला तार शुश ठेयब कोठा पाइश्शो खिं का सेल्नुङ’ देंब। मेकोमी झेलपुकी सेल्ब। मेको कली लेबानोन ङा लाइश्शो रवा आ शीम क्येप्शा, मेको कली लल रङ ख्रेक्ब।
15 मार, गे पिप नवे? मारदे हना गे गारो नेल्ल बोल्यो शीम क्येप्नेवे? इ आफ नु जचा तूचा थोव़क बाक्त। मेकोमी ठीक निसाफ नु ठीक गेय पाप्तु। मिनु मेको कली रिम्शोन दुम्त।
16 मेकोमी प्रुङग नु मारेइ मथीब आन कली ठीक निसाफ पाप्तु। मिनु मेको कली रिम्शोन दुम्त। मेको आं कली तुइक्ब मुरुम पाइनीम” दे परमप्रभु यावेम देंत।
17 तन्न इ मिक्च नु इ थुंम ठीक पा मचेम्शो क्येट ला बाक्ब। गे दोस मताइब आन हुश शाइक्पाइक्नेवे। गे मुर आन कली दिप्शा हुश ख्राक्श पोक्नेवे। मरिम्शो पचा नु रोइक्चा ला दाक्नेवे।
18 मोपतीके परमप्रभु यावेम “यहूदा ङा पिप योसीयाह आ तौ येहो-याकीम आ पर्बम ‘आबी, मुरपुकीमी मेको आ पर्बम रोंका पची ना आं लोक्ब, आबी, आ समी मदेंनीम’ मेको आ पर्बम मङाक्नीम। मिनु ‘आबी, आं प्रभु, आबी, मान ताइब पिप’ दे मेको आ पर्बम मङाक्नीमी। २राजा २३:३४
19 मेको कली गधा का थिम्शो खोदेंशो पा, कीशा लाइश्शा यरूसलेम ङा ठेयब लाप्चो आ ङोंइती ग्रुंइशा ताइक्नीम” देंत। येरमीया ३६:३०
20 लेबानोनम लशा ठेयब सेंदा पा ग्रीङो। इ सेंदा बाशानम नेंपाइक्मी। अबारीम पहाड रे ठेयब सेंदा पा ग्रीङो। मारदे हना इ दाक्शो मुर नेल्ल बेक्तेक्म।
21 गे रिम्शो पा बाक्ङेनु, गो इ कली लोव़ पाता। तन्न गे “गो मेको मनेंनुङ” देंते। गे ठिटा बाक्ङे ना रेन मोदेंशो बाक्ते। गे आं देंशो मटिवी।
22 इ गोठला नेल्ल आन कली फशेम बेर पाइश्शा योल्ब। मिनु इ वारच नेल्ल ग्याइश्शा लाइक्चा पुंइसीनीम। मेना गे इ मरिम्शो गेयम पतीके मुने दोक्शा, आमाइ, मेको श्येत नेल्ल परमप्रभु यावे आ अरेशो मटितीके दुम्शो बाक्ब।
23 लेबानोनम बाक्ब मुर, लेबानोन ङा लाइश्शो रवा आन दातेमी खिं सेल्ब मुरपुकी, श्येत नु सुत्केरी रोइ पशो खोदेंशो दुम्तीनी हना, दोपा हुकयी पाइनीनी।
24 परमप्रभु यावेम “गो दोपा ब्रोंइशा बाक्ङा, मोपा यहूदा ङा पिप येहो-याकीम आ तौ कोन्याह माइश्शो येहो-याकीम कली ‘गे आं ग्युरा गुइ ङा छाप थोक्तीक औंठी नवे हना, गो इ कली ग्रुंइशा ताइक्तन वा।कोन्याह कली योयाकीम यो देंनीम।२राजा २४:८-१६; येरमीया २४:१
25 गो इ कली साइक्चा माल्ब मुर आन गुइम गेनन। गे मेको आन कली तशा हिंनेवे। गो इ कली मेको बेबीलोन ङा पिप नेबुकदरेसर नु कल्दी आन गुइम गेनन।
26 गो गे नु इ कली जरमेब इ ममा इस कली अर्को रागीम ताइक्नन्सी। मिनु गे निम्फा मेकेर बेक्नीसी।
27 तन्न मेको आस लेत्चा माल्शो रागीम, लेत्चा मताइनीस।
28 मार, एको कोन्याह माइश्शो मुर सुइम मदाक्शो ब्रोल्शो ग्योंब खोदेंशो बाक्बा ङा? मेको मोदेंशो ग्योंब कली सुइम ममाल्नीम। मोपतीके मेको नु मेको आ आल आन मतुइश्शो रागीम ताइक्चा पुंइसीनीमी?’ ” देंत। कोन्याह माइश्शो येहो-याकीम आ तौ कली येकोन्याह यो देंनीम। येरमीया २४:१
29 ए रागी, रागी ङा मुर नेल्ल, परमप्रभु यावे आ लोव़ नेनीन।
30 परमप्रभु यावेमी “मेको मुर आ नें क्याम्सीब, दे ब्रेक्शा वोतो। मेको मुर बाक्म सम्म मारेइ पने मचाप्ब। मेको आल मपाइश्शो मुर दुम्ब। मारदे हना मेको के तेकोइ मुर रिम्शो मदुम्नीम। मेको आ चच युइ दाऊद आ नित्तीकेम नित्चा मताइनीम। मेकोपुकीमी यहूदा आ नित्तीकेम निश्शा हुकुम पचा मताइनीम” देंत। १इतिहास ३:१७-२४