Isaiah 56 in Sunwar
1 मिनु परमप्रभु यावेमी “ठीक निसाफ पने। मार ठीक बाक्मे मेको पने। मारदे हना आं पाप रे प्रोंइतीक रीब पा जाक्ब। मेना गो ग्राब बाक्नुङ, दे नेल्लेम तुइक्नीम।
2 सु मेको पाइबा, मेको ग्येरसीशो मुर दुम्ब। आं नाइक्तीक नाक्ती नाइक्ब नु अरु नाक्ती खोदेंशो पा गेय मपाइब नु मरिम्शो मपाइब, ग्येरसीशो मुर बाक्ब” देंत। यसैया ५८:१३; उत्पत्ती २:२-३; प्रस्थान १६:२३; प्रस्थान २०:८; येरमीया १७:२१-२२
3 परमप्रभु यावे आ लोव़ टीब अर्को रागी ङा मुरुम “परमप्रभु यावेमी आं कली आ मुर रे तिल्ब” देंचा मगेने। मिनु आल मथीबपुकीमी “गो सोव़शो रवा खोदेंशो नकी” देंचा मगेने। यसैया १४:१; ब्यवस्था २३:२
4 मारदे हना परमप्रभु यावेमी “आल मथीब मुरुमी आं नाइक्तीक नाक्ती नाइश्शा, आं दाक्शो पाम्तेक्म नु आं कबल मप्रोंइथु बाक्तेक्म हना,
5 गो मेको आन कली आं खिंमी नु आ गारोमी मिम्तीके नु ठेयब नें गेनुङमी। आं तमी तौ आन क्येङा मेको आन कली रिम्शो नें गेनुङमी। मेको आन कली गेना हना यो लीब नें गेनुङमी। मेको आन नें मख्रोंइसीब दुम्ब।
6 मिनु परमप्रभु यावे आ नोले खोइक्ब, अर्को रागी ङा मुरपुकी, सु सुमी आं कली ठेयब सेल्नीमी, आं कली दाक्नीमी, आं गेय पाइब दुम्नीमी, नाइक्तीक नाक्ती नाइश्शा, अरु नाक्त खोदेंशो गेय मपाइनीमी नु आं कबल पना पन बाक्नीमी।
7 मेको नेल्ल आन कली आं योव़शो डांडाम चाक्नुङमी। आं प्रार्थना पतीक खिं ओंइशा, ग्येरपाइक्नुङमी। मेको आन चोशा चढ़ेशो नु अरु चढ़ेशो आं कली चढ़ेतीकेम ब्राइनुङ। मारदे हना आं खिं रागी ङा मुर नेल्ल आन कली प्रार्थना पतीक खिं देंनीम” देंत। मर्कूस ११:१७
8 मोदेंशो लोव़ पाइब परमप्रभु, परमप्रभु यावेमी खेरशो इस्राएली आन कली खुप्ब। मिनु “गो मेको आन कली अरु खुप्शो मुर नु देल्पाइक्नुङ। मेकोपुकी नु बाक्पाइक्चा कली तेम्नुङमी” देंत।
9 परमप्रभु यावेमी “गे जन्तु नेल्ल नु ब्वाकीम बाक्ब जन्तु नेल्लेम, जाक्शा ब्वने। येरमीया १२:९
10 इस्राएली आन कली कोव़ब मुर मिक्च मताइब खोदेंशो बाक्नीम। मेको मारेइ मजोक्ब मतुइक्ब बाक्नीम। मेकोपुकी सिक्सी पा बाक्शा, होक्ने मचाप्ब कुचुम खोदेंशो बाक्नीम। मेको ङोमु तचा, इप्चा नु निन्द्रा पचा ला दाक्नीम। इजीकीएल ३:१७; इजीकीएल ३३:६-९
11 कुचुमपुकी शुश जचा ब्वचा दाक्नीम। गेनायो मरूनीम। मेको गोठला यो मोदेंशो मरुप्ब बाक्नीम। मेको नेल्ल आंम आन लां खोइक्ब बाक्नीम। मारेइ मारेइ आंम के सेल्चा दाक्नीम। मेको नेल्ल खाल का ङा बाक्नीम। येरमीया ६:१३
12 मेकोपुकीमी ‘जाक्कीन, अङगुर शांबु ग्याप्य। राकसी तूशा, दुक्य। दीसा यो मुलाक्त ङा खोदेंशो दुम्ब। मेको क्येङा यो रिम्शो दुम्ब’ देंनीम” देंत।