Hosea 2 in Sunwar
1 मिनु परमप्रभुमी “गेपुकी आंम लोक्ब आन कली ‘गे आं मुर बाक्नीनी’ देनीन। मिनु इन समी आन कली ‘आं दाक्शो समी’ देनीन। होसे १:१९; होसे १:६
2 इन ममा कली हुइक्तीन। मेको कली शुश हुइक्तीन। मारदे हना मेको आं मीश मबाक्ब। मिनु गो मेको आ वोंइश मनङ। मेकोमी आ मिक्च वोंइश मुर गे हिरचा प्रोनल। मिनु आ दूध आस दाते ङा नाता ख्रोइश्शा, ग्रांग्रा दिशो गेय प्रोनल। इजीकीएल १६:२३;
3 मो मपाप्तु हना, गो मेको आ वा प्रुइश्शा, मेको जरमेशो नाक्ती खोदेंशो पा शिश्रा पोक्नुङ। गो मेको कली गोरशो रागी खोदेंशो सेल्नुङ। सोव़शो रागी खोदेंशो पा ब्वाक्कु मबाक्शो सेल्नुङ।
4 गो मेको आ तमी तौ आन कली आं दाक्स मकोंइक्नुङ। मारदे हना मेकोपुकी तेल्लेम पा थिशो आल बाक्नीम।
5 मेको आन ममा जोल पा अर्को मुर नु गाक्त। मेको आन कली मुने पा थिशो बाक्त। मेकोमी ‘गो आं कली दाक्ब वोंइश खोइक्नुङ। मिनु मेकोमी आं कली जचा तूचा, ऊन नु सुती वा, तेल नु अङगुर शांबु गेब’ देंत। येरमीया ४४:१७
6 मोपतीके गो मेको आ लां चूमी तेक्नुङ। मेको आ लांम गारो सेल्शा, आ लां तेक्शा वोइक्नुङ। मिनु मेकोमी तेइ लां मताइब।
7 मेकोमी आ दाक्शो मुर आन कली माल्थ लाइब। तन्न मेको आन कली ग्याइक्ने मचाप्ब। मेकोमी आ दाक्शो मुर आन कली कोव़ब। तन्न मथिप्ब। मिनु मेकोमी ‘मुल गो ङोंइती ङा खोदेंशो पा आं वोंइश आ बाक्तीक लाइनुङ। मारदे हना गो मुल क्येङा मेना ठीक बाक्ती’ देंब।
8 गो मेको कली अन्न, नक अङगुर शांबु नु तेल गेता हना यो मेकोमी मतुइक्त। गोम मेको कली सुन चांदीम ग्योम्ताक्ङ। तन्न मेकोमी आं गेशो नेल्ल बाल देवता कली गेप्तु। ब्यवस्था ७:१२-१३
9 मोपतीके बाली मीमेनु नु नक अङगुर शांबु बोक्मेनु, मेको गो लांइसीनुङ। मिनु मेकोमी फेक्शो आं ऊन नु सुती वा यो लांइसीनुङ।
10 गो मेको आ दाक्शो मुर आन ङोंइती मेको कली शिश्रा पा आ मुने कोंइक्नुङ। मिनु सुइमी यो मेको कली आं गुइ रे मलाइक्नीम। येरमीया १३:२२
11 गो मेको आ चाड नेल्ले मानेचा मगेनुङ। मेको आ बर्स बर्स ङा चाडपुकी नु औंसी ङा चाड, मेको आ नाइक्तीक नाक्तपुकी नु मेको आ अरु चाड नेल्ल मानेचा मगेनुङ।
12 गो मेको आ अङगुर बोटपुकी नु फोव़शी रवापुकी खतम सेल्नुङ। मेको आ पर्बम मेकोमी ‘एको आं तेल्लेम पशो ङा गाल्च नमी’ देंशो बाक्त। गो मेको रवा रे ठेयब ब्वाकी सेल्नुङ। मिनु ब्वाकी ङा जन्तुपुकीमी मेको ब्वाइनीम।
13 गो मेको कली बाल देवता कली धूप चोशो नाक्ती सजाइ गेनुङ। मेको नाक्त मेको ग्योम्सीशा वोंइश खोइक्तु। आं कली चहिं प्रेंताक्यी।
14 मोपतीके मुल गो मेको कली लेम्शा, गोरशो रागीमी लाइक्नुङ। मिनु मेको नु आ दाक्शो लोव़ पाइनुङ। यसैया ४०:२
15 मेकेर गो मेको कली आ अङगुर रू लेश्शा गेनुङ। गो आकोर माइश्शो दिंम कली चहिं आस पतीक रागी सेल्नुङ। मेकेर मेकोमी आ ठिटी बाक्ची ना ङा खोदेंशो नु इजीप्त रागी रे जाक्शो खोदेंशो पा कुम्सो पाइब” देंत। यहोसु ७:२४-२६
16 मिनु परमप्रभु यावेमी “मेको नाक्त गे आं कली ‘आं वोंइश’ देंनेवे। मिनु ‘आं बाल देवता’ मदेंनेवे। यसैया ५४:५
17 गो बाल देवता आन नें यो मेको आ शोव़ रे ग्रुंइनुङ। मिनु लेंशा मेकोमी मेको आन नें गेनायो मथोइब।
18 गो मेको नाक्त मेकोपुकी, ब्वाकी ङा जन्तुपुकी, सरीङ ङा चिक्बपुकी नु खपीम ग्रेशा गाक्ब जन्तुपुकी नु कबल का पाइनुङ। मिनु मेको रागी ङा मुरपुकीमी मेना रे लिब्रा, तरवार नु लडाइ मताइनीम। मिनु मुर नेल्ल हेम्म पा बाक्चा ताइनीम। उत्पत्ती ९:९-१०; इजीकीएल ३४:२५
19 गो इ कली गेना हना यो आं मीश सेल्नन। गो इ कली थमा पा दाक्शा शिशी पा नु ठीक पा आं मीश सेल्नन। प्रकाश १९:७
20 गो इ कली मप्रोंइथु आं मीश सेल्नन। मिनु परमप्रभु यावे कली रिम्शो पा तुइक्नेवे” दे परमप्रभु यावेमी देंत। येरमीया ३१:३४
21 परमप्रभु यावेमी “मेको नाक्त गो सरीङ कली लोव़ लेत्नुङ। सरीङमी रागी कली लोव़ लेप्ब।
22 मिनु रागीमी अन्न, नक अङगुर शांबु नु तेलमी येज्रेल कली लोव़ लेत्नीम।
23 गो मेको कली आं पर्बम आं रागीमी बाक्पाइक्नुङ। गो मेको कली ‘मदाक्नुङ’ देंशो कली आं शिशी कोंइनुङ। मिनु गो ‘गेपुकी आं मुर मननी’ देंशो नङ। मुल गो ‘आं मुर ननी’ देंनुङ। मिनु मेकोपुकीमी आं कली ‘गे आंइ परमप्रभु बाक्नीनी’ देंनीम” दे परमप्रभुमी देंत। होसे १:६; होसे १:९; रोमी ९:२५; १पत्रुस २:१०