Genesis 23 in Sunwar
1 मिनु सारा सहे का २७ बर्स दुम्शो बाक्माक्त। आ ब्रोंइतीक नाक्त नेल्ल मोशोन बाक्माक्त।
2 सारा कनान रागी ङा किरयथ-अरबाम बेक्माक्त। मेको कली हेब्रोन यो देंनीम। मिनु अब्राहाम सारा आ पर्बम हिंशेक पा ङाक्थ लमाक्त।
3 अब्राहाम सारा आ बेक्शो रां बाक्तीके रे लशा, हित्ती आ मुर आन कली
4 “गो इन दातेमी अर्को रागी ङा मुर बाक्नुङ। गो थिम्तीक का ग्याप्चा दाक्नुङ। मारदे हना आं बेक्शो मुर कली थिम्चा माल्नुङ” देंमाक्त। उत्पत्ती १७:८
5 मिनु हित्ती आ मुरपुकीमी अब्राहाम कली
6 “प्रभु, आंइ लोव़ नेनीन, गे आंइ दातेमी परमप्रभुमी सेल्शो ठेयब मुर बाक्नीनी। आंइ के बेक्शो मुर आन कली वोइक्तीक पुक्खी शुश बाक्नीम। तेको दाक्नीनी, मेकोमी इन बेक्शो मुर थिमीन। इन बेक्शो मुर थिम्चा सुइमी मतेक्ब” देंमा बाक्त।
7 मिनु अब्राहाम बोक्शा, हित्ती आ मुर आन ङोंइती सेउ पवा बाक्त।
8 मेको आन कली “आं बेक्शो मुर थिम्चा गेतीनी हना, आं पर्बम सोहार आ तौ एफ्रोन नु लोव़ पने।
9 मेको आ रू आ नोले बाक्ब माक-पेला पुक्खी आं कली लेयङ, दे पुंइदीन। गिश थाप्चा माल्नुङा, थाप्नुङ। इन दातेमी आं बेक्शो मुर थिम्तीके दुम्ल” देंमाक्त।
10 मेना एफ्रोन हित्ती आन दातेमी निश्शो बाक्माक्त। मेको आन सहर ङा गारो ङा ठेयब लाप्चो आ नेक्था बाक्शा, अब्राहाम आ लोव़ नेन्मेनु, मेको हित्ती एफ्रोनमी अब्राहाम कली
11 “प्रभु, ममाइ, आं लोव़ नेनीन, गो इन कली मेको रू नु पुक्खी गेनुङ। आं मुरपुकी सांकछी बाक्नीम। गो इन कली गेनुङ। इन बेक्शो मुर थिमीन” देंमाक्त।
12 मिनु अब्राहाममी मेको मुर आन ङोंइती सेउ पवा बाक्त।
13 मिनु मुर नेल्ल आन ङोंइती अब्राहाममी एफ्रोन कली “आं लोव़ नेनीन। गो मेको रू ङा क्येट थाप्नुङ। मेको ताक्कीन। गो आं मीश मेक थिम्नुङ” देंमाक्त।
14 मिनु एफ्रोनमी अब्राहाम कली
15 “प्रभु, आं लोव़ नेनीन, मेको रू ४ सहे शेकेल चांदी ङा बाक्ब। मेको इस दातेमी मारेइ ममाइ। मोपतीके थिमीन” देंमाक्त। शेकेल का ११.५ ग्राम बाक्ब।
16 मिनु अब्राहाममी एफ्रोन आ लोव़ बिस्से बाक्त। मेकोमी एफ्रोनमी हित्ती आ मुर आन ङोंइती देंशो खोदेंशो पा ४ सहे शेकेल चांदी नाक्शा, गेमी बाक्त। मेको ४ सहे शेकेल चहिं ग्याप्ब लेयब आन दातेमी मोदेंशो रू कली ठीक बाक्माक्त। शेकेल का ११.५ ग्राम चांदी बाक्त।
17 माक-पेलामी बाक्शो एफ्रोन आ रू माम्रे आ पूर्ब गे बाक्शो बाक्माक्त। मोपा रू नु पुक्खी, रूमी बाक्शो रवा नेल्ल नु एर ओंथ सुरम ख्रुम्शो रवा यो
18 हित्ती नेल्ल नु ठेयब लाप्चोम बाक्ब आन ङोंइती अब्राहाम के दुम्माक्त।
19 मिनु नोले अब्राहामम आ मीश सारा कली माम्रे आ नेक्था माक-पेलामी बाक्शो पुक्खीमी थिमा बाक्त। माम्रे चहिं कनान रागी ङा हेब्रोन सहर बाक्माक्त।
20 मिनु मेको रू नु मेक बाक्शो पुक्खी हित्ती आ मुरपुकी रे अब्राहाम आ मुर थिम्तीक रू दुम्माक्त। उत्पत्ती २५:९-१०; उत्पत्ती ४७:३०; उत्पत्ती ४९:२९-३२; उत्पत्ती ५०:१३