Ezekiel 6 in Sunwar
1 मिनु परमप्रभु यावेमी आं कली लोव़ पाप्तु।
2 मार लोव़ पाप्तु देंशा हना “ए मुर, गे इस्राएल ङा पहाड गे कोव़शा, मेको आन पर्बम नोले दुम्ब लोव़ पावो। इजीकीएल ३६:१; मीका ६:१
3 गे ‘ए इस्राएल ङा पहाड परमप्रभु, परमप्रभु यावे आ लोव़ नेनीन। पहाड नु डांडा खोल्सा नु बेंसी आन कली परमप्रभु यावेमी, गो इन तार तरवार का चाक्नुङ। मिनु गो इन डांडा ङा थान आन कली खतम पोक्नुङमी।
4 इन थान श्येत्थ दुम्नीम। मिनु इन धूप चोतीक ब्रोल्नीम। मिनु गो इन साइश्शो मुर आन कली आन मूर्ति आन ङोंइती ताइक्नुङमी। लेवी २६:३०
5 गो इस्राएल ङा मुर आन बेक्शो रां मेको आन मूर्ति आन ङोंइती वोइक्नुङ। मिनु इन रुश इन चढ़ेतीक आन ङोंइती एर ओंथ फ्राइनुङमी। २राजा २३:२४
6 गेपुकी ते बाक्तीनी हना यो, इन सहर श्येत्थ दुम्नीम। इन डांडा ङा थान नेल्ल खतम दुम्नीम। मोपा इन चढ़ेतीक श्येत्थ दुम्शा नु इन मूर्ति ब्रोल्शा खतम दुम्नीम। इन धूप चोतीक जिक्नीम नु इन गेय जाम्शा लाइब।
7 इन दातेमी मुर साइक्चा पुंइसीशा गोल्नीम। मिनु गेपुकीमी गो परमप्रभु यावे नङ, दे तुइक्नीनी।
8 तन्न गो गे इन दाते ङा का निक्शी आन कली ब्रोंइचा गेनुङमी। रागी रागी आन दाते ङा का निक्शी साइक्चा मपुंइसीनीम। मेकोपुकी रागी रागीम ब्रशा लाइनीम। यसैया ६:१३
9 मिनु मोदेंशो रागी रागीम ब्रोंइशा लीशोपुकी ग्याइश्शा लाइक्चा पुंइसीशो रागीम आं कली मिम्नीम। मिनु मेकोपुकीम आन दला दाक्स पशा, आं रे दिल्शा लशा, आन मूर्ति आन नोले खोइक्नीम। मेको आन पशो मरिम्शो नु ग्रांग्रा दिशो गेयम आंमा मुने दोक्नीम।
10 मिनु मेकोपुकीम गो परमप्रभु यावे नङ, दे तुइक्नीम’ देंचा माल्नेवे। गो मेको आन कली मोदेंशो श्येत मोशा मगेङमी” देंत।
11 मिनु परमप्रभु, परमप्रभु यावेमी “इन गुइ पोक्कीन। मिनु इन खोइल थाइक्तीन। इस्राएल आ खिं ङा मुर आन ग्रांग्रा दिशो गेय आ पर्बम ‘आबी आबी’ देनीन। मारदे हना मेकोपुकी तरवार, अन्काल नु मुर बेक्तीक रोइम बेक्नीम।
12 मेको ङोन बाक्बपुकी मुर बेक्तीक रोइम बेक्नीम। मिनु मेको आन नेक्था बाक्बपुकी तरवारम साइक्चा पुंइसीनीम। मिनु लीशो प्रोंइचा पुंइसीशोपुकी अन्कालम बेक्नीम। मोपा गो आं गाइश्शो मेको आन तार मोइक्नुङ।
13 मेको आन साइश्शो मुर आन मूर्ति आन दाते आन चढ़ेतीक आन एर ओंथ बाक्नीम। नेल्ल डांडा ङा थानम, नेल्ले पहाडम, नेल्ल रवा आन पुंम, शुश गिग रवा आन पुंम, नु मूर्ति आन कली धूप चोतीके नेल्लेम मोदेंशो बाक्ब। १राजा १४:२३
14 गो आं गुइ मेको आन पर्बम क्युक्नुङ। मिनु आन रागी रे श्येत्थ नु मुर मबाक्तीक सेल्नुङ। मेको गोरशो रागी रे रिब्ला सम्म मोदेंशो पाइनुङ। मेना मेकोपुकीमी गो परमप्रभु यावे नङ, दे तुइक्नीम” देंत। २राजा २५:२१