Exodus 20 in Sunwar
1 मिनु परमप्रभुमी मार लोव़ पाप्तु देंशा हना मत्ती ५:१७-२८
2 “गो परमप्रभु यावे, इन परमप्रभु नङ। गो इन कली वाइलीम वाइल दुम्शो इजीप्त रागी रे ग्रुंइताक्न्नी। न्यायाधीस ६:८; येरमीया ३४:१३
3 गे आं कली ला बाप्शा सेउ पने, देवी देवता आन कली बाप्शा सेउ मपने। ब्यवस्था ६:४-५; यसैया ४५:५-६; १कोरिन्थी ८:५-६
4 मूर्ति मसेलीन। सरीङम बाक्ब, रागीम बाक्ब नु ब्वाक्कु गाम बाक्ब तेकोइ जन्तु आन मूर्ति मसेलीने। ब्यवस्था ४:१५-१९; ब्यवस्था २७:१५; यसैया ४०:१८-२६; रोमी १:२३
5 मेको आन कली बाप्शा सेउ मपने। मेको आन कली ठेयब मसेलीने। मारदे हना गो परमप्रभु यावे, इन परमप्रभु नङ। गो रुश पाइब परमप्रभु नङ। आं कली काइ मदाक्ब नु आ अरेशो मटीब मुर आन आल, चच, युइ नु युइ आन युइ आन पाला सम्म यो सजाइ गेब परमप्रभु नङ। प्रस्थान ३४:१४; ब्यवस्था ४:२४; ब्यवस्था ५:९; ब्यवस्था ६:१५; अय्युब २१:१९; येरमीया ३१:२९-३१; इजीकीएल १८:२५
6 तन्न सु सुमी आं कली दाक्नीमी, आं शेंशो लोव़ टीनीमी, मेको आन आल, चच युइ नु युइ आन युइ आन पाला सम्म कली ला ममाइ, हजार हजार पाला सम्म गेना हना यो शिशी पाइक्नुङमी। प्रस्थान ३४:७; ब्यवस्था ७:९
7 गे परमप्रभु यावे, इन परमप्रभु आं नें, मो मथिने। मारदे हना सुम परमप्रभु यावे आं नें मो थीबा, मेको कली सजाइ मगेथु, मप्रोंइब। लेवी १९:१२; लेवी २४:१६
8 सन्चरबार नाइक्तीक नाक्ती आं नाक्त बाक्ब। मानेचा माल्नीनी। प्रस्थान १६:२५-२९
9 गे ६ नाक्त इन गेय नेल्ल पचा माल्नीनी।
10 तन्न मेको आ नोले ङा नाक्त परमप्रभु यावे, इन परमप्रभु आ नाइक्तीक नाक्त बाक्ब। मेको नाक्ती गेपुकी काइ गेय मपने। इन तमी तौ, इन वाइलीम वाइल, इन बस्तु भाव, इन रागीम बाक्शो अर्को रागी ङा मुर आन कली यो काइ गेय मपपतीन। प्रस्थान ३१:१३-१७; इजीकीएल २०:१२; मर्कूस २:२७-२८; कलस्सी २:१६-१७
11 मारदे हना परमप्रभु यावेमी ६ नाक्तीमी सरीङ नु रागी, ठेयब समुन्द्र नु ठेयब समुन्द्रमी बाक्शो नेल्ल आन कली सेल्तु। मिनु नोले ङा नाक्त नांइसाक्व। मोपतीके परमप्रभु यावेमी ‘मेको आं नाक्त बाक्ब’ दे मेको नाक्त कली आसीक गेशो बाक्ब। उत्पत्ती २:२-३
12 इन आम आफ आन कली मान पने। मो पाइतीनी हना, परमप्रभु यावेमी, इन परमप्रभु इन कली गेशो रागीम शुश ब्रोंइचा गेब। प्रस्थान २१:१७; ब्यवस्था २७:१६; मत्ती १५:४-६; एफिसी ६:२-३
13 मुर मसतीन। प्रस्थान २१:१२; उत्पत्ती ९:५-६; याकूब २:१०-११
14 मुर आन मीश वोंइश नु मइपीन। लेवी २०:१०; मत्ती १५:१९
15 खुइ मपने। प्रस्थान २१:१६; लेवी १९:११; एफिसी ४:२८
16 जोल पा सांकछी मबाक्कीन। प्रस्थान २३:१; ब्यवस्था १९:१८-१९; एफिसी ४:२५
17 इन नेक्था बाक्ब मुर आ खिं, आ मीश आ वाइलीम वाइल, आ बी ब्यफ नु आ गधा, मेको के मार बाक्त हना यो, मेको तशा मबाल्दीन। एको परमप्रभु यावे आ अरेशो लोव़ बाक्ब” दे मोसामी इस्राएली आन कली देंत। रोमी ७:७; रोमी १३:९
18 मिनु मुरपुकी ङोन बाक्मानु, बुंबु पशो नेंशा नु चिला पशो तशा, तुराही ताप्शो नेंशा, डांडा रे कुशो कुन तशा, ङोन लशा हिंशा ख्रिंख्रि पा, कोव़शा बाक्तेक्म।
19 मिनु मेकोपुकीमी मोसा कली “गे आंइ कली लोव़ पाइतीनी हना, गो नेंनीकी। तन्न परमप्रभुमी आंइ कली लोव़ पाप्तु हना, बेक्नीकी” देंतेक्म।
20 मिनु मोसामी “महिनीन। परमप्रभु इन कली नाक्थ जाक्त। गे परमप्रभु कली मान पा हिंचा ङा बाक्ब, दे मिम्ताक्नी हना, पाप मपाइनीनी” देंत। उत्पत्ती २२:१
21 मुरपुकी ङोन बाक्शो बाक्तेक्म। मोसा चहिं परमप्रभु आ नेक्था क्येर गोस्सुम लत। १राजा ८:१२
22 मिनु परमप्रभु यावेमी मोसा कली “गे इस्राएली आन कली ‘आं कली सरीङ रे लोव़ पशो नेंतीनी।
23 गे गो नु देवी देवता मसेलीन। गे आंम कली सुन नु चांदी के देवी देवता मसेलीने।
24 गे आं कली खप के चढ़ेतीके सेल्चा माल्नीनी। मेको तारी चोशा चढ़ेतीक चढ़ेचा माल्नीनी। इन दुशा बाक्चा आ पर्बम चढ़ेतीक चढ़ेन। भेडा, ब्यफ चढ़ेचा माल्नीनी। गो ते ते इन कली आं नें मिम्पाइक्नुङा, मेक मेक इन कली आसीक गेनुङ। प्रस्थान १७:१५; प्रस्थान २७:१-८; ब्यवस्था १२:५
25 गे आं कली फुल्लु के चढ़ेतीके सेल्चा दाक्ताक्नी हना, मप्रोल्शो फुल्लु के सेल्चा माल्नीनी। मेको फुल्लु फलामम प्रोल्तीनी हना, मेको आं कली मदुम्ब। ब्यवस्था २७:५; यहोसु ८:३१
26 आं कली चढ़ेतीकेम थेंका मङोंइसीने। इन मुने दोक्तीक मतांइसेक्ल’ दे माइक्मी” देंमाक्त।