Esther 9 in Sunwar
1 मिनु अदार माइश्शो १२ महिना ङा १३ नाक्त पिप आ ब्रेक्शो लोव़ खाप्तीक नाक्त जाक्त। मेको नाक्त यहूदी आन जोरी सत्रुमी यहूदी आन कली साइक्चा मिम्शो बाक्तेक्म। तन्न मुल यहूदीपुकीम कका आन जोरी सत्रु आन कली साइक्तीक नाक्त जाक्त।
2 मेको नाक्त पिप अहासूरस आ रागी नु सहर ङा यहूदी नेल्ल आन जोरी सत्रु आन कली साइक्चा, दे बुक्तेक्म। मिनु मेको यहूदी आन कली सुइमी तेक्ने मचबेम। मारदे हना यहूदी आन कली तशा, मुर नेल्ल शुश हिंतेक्म।
3 मिनु मोरदेकै कली तशा, हिंतीके रागी नेल्ल ङा हुकुम पाइबपुकी, सरकार ङा गेय पाइबपुकी नु ठेयब मुर नेल्लेमी यहूदी आन कली वारच पाम्तेक्म।
4 मोरदेकै पिप आ दरवारमी ठेयब मुर दुम्त। मिनु रागी नेल्लेमी आ नें तुइक्ताक्म। मोपा मेको आ सक्ति बारना बारन लत।
5 मिनु यहूदीपुकीम आन जोरी सत्रु आन कली तरवारम तूशा, क्योरशा साइश्शा थुम्तेक्म। यहूदीपुकीमी आन कली खेदा पाइब मुर आन कली मार पचा दाक्तमे, मेको पाम्तेक्म।
6 यहूदीपुकीमी सुसा दरवारमी ५ सहे मुर आन कली साइक्तेक्म।
7 मिनु मेको हम्मदाता आ तौ हामान आ १० जना तौ पारशान-दाता, दाल्फोन, अस्पाता,
8 पोराता, अदाल्या, अरीदाता,
9 पारमश्ता, अरीसाइ, अरीदाइ नु वाइजाता बाक्तेक्म। उत्पत्ती १४:२१-२४
10 मिनु मेको यहूदी आन जोरी सत्रु हम्मदाता आ तौ हामान आ १० जना तौ कली यो साइक्तेक्म। मेको आन शोंप नु आन थेरशो रू चहिं मरोइक्तेम।
11 मिनु मेको नाक्त सुसा दरवारमी गिश मुर आन कली सदमे, मेको पिप कली शोव़तेक्म।
12 मिनु पिपमी पिपीम एस्तर कली “सुसा दरवारमी यहूदीपुकीमी ५ सहे मुर नु हामान आ १० जना तौ नेल्ल आन कली साइक्तेक्म। मिनु अरु आं रागीपुकीमी मार मार पामे माइ? गे मार पुंइतीनी हना यो, मेको गेनन्नी। चिनु मार पुंइनीनी? मेको दुम्ब” देंत।
13 मिनु एस्तरमी “हजुर, गे दाक्नीनी हना, दीसा यो सुसा सहरमी यहूदीपुकीम मुलाक्त ङा खोदेंशो पचा तामेक्ल, दे हुकुम पने। मिनु हामान आ साइश्शो १० जना तौ आन कली क्युक्तीक थाममी क्युक्पतीन” देंत।
14 मिनु पिपमी “मोदेंशोन पामेक्ल” दे हुकुम पाप्तु। मिनु सुसा सहरमी पिप आ हुकुम खोदेंशो पा, हामान आ साइश्शो तौ नेल्ल आन कली थामम क्युक्तेक्म।
15 मिनु सुसा सहरम बाक्शो यहूदीपुकी अदार महिना ङा १४ नाक्तीमी लेंशा बुक्तेक्म। मिनु सुसा सहरमी ३ सहे मुर साइक्तेक्म। तन्न मेको आन शोंप नु आन थेरशो रू मारेइ मरोइक्तेम।
16 मिनु पिप आ रागी ङा यहूदीपुकी आंम कली आन जोरी सत्रु रे प्रोंइचा कली बुक्तेक्म। मिनु मेकोपुकीमी आंम कली काइ मदाक्ब ७५ हजार जना मुर आन कली साइक्तेक्म। मोपा मेकोपुकीमी आन जोरी सत्रु रे थुं नाइक्चा ताम्तेक्म। तन्न मेको आन शोंप नु आन थेरशो रू चहिं मारेइ मरोइक्तेम।
17 मिनु मेको नेल्ल अदार माइश्शो महिना ङा १३ नाक्तीम पाम्तेक्म। मिनु मेकोपुकी आ दीसा १४ नाक्तीम नांइसाक्म। मिनु मेको नाक्त चाड का सेल्शा, ग्येरतीक नाक्त सेल्तेक्म।
18 सुसा सहरम बाक्ब यहूदीपुकी चहिं अदार महिना ङा १३ नु १४ नाक्त बुक्तेक्म। मिनु १५ नाक्त नांइसाक्म। मिनु मेको नाक्त चाड का सेल्शा, ग्येरतीक नाक्त सेल्तेक्म।
19 मोपतीके ङोन ङोन गाउं ङा नु अर्को सहरम बाक्ब यहूदीपुकीमी अदार माइश्शो महिना ङा १४ नाक्त, नाइक्तीक नाक्त, चाड नु ग्येरतीक नाक्त सेल्नीम। मेको नाक्त मेकोपुकीमी कोसेली गेमुइनीम।
20 मिनु मोरदेकैमी मार मार दुम्मे, मेको नेल्ल ब्रेक्ताक्व। मिनु पिप अहासूरस आ नेक्था नु ङोन ङा रागीम बाक्ब यहूदी नेल्ल आन कली सोइक्ताक्व।
21 मिनु मेकोमी मार ब्रेक्ताक्व देंशा हना “अदार महिना ङा १४ नु १५ नाक्त यहूदी नेल्लेमी बर्स बर्समी चाड नु ग्येरतीक नाक्त सेल्चा माल्नीम।
22 मारदे हना मेको नाक्त यहूदी आन जोरी सत्रु रे नाइक्चा ताम्तेक्म। मिनु मेको महिनामी आन थुं लुक्च लतीक रे ग्येरशो थुं दुम्तेक्म। मिनु आन रोंका पतीके रे ठेयब ग्येरतीक नाक्त फांइसाक्व। मेकोपुकीमी मेको नाक्त चाड का सेल्शा, ग्येरतीक नाक्त सेल्चा माल्नीम। मिनु कोसेली सोइक्मुशा, प्रुङग आन कली मार मार गेचा माल्नीम” दे ब्रेक्शो बाक्त।
23 मोपतीके यहूदीपुकीमी मोरदेकै आ ब्रेक्शो खोदेंशो पचा गोम्तेक्म। मिनु मेको मोदेंशो पा गेना हना यो पचा कली आन लोव़ थोक्ताक्म।
24 ङोंइती यहूदी आन जोरी सत्रु अगाग आ मुर हम्मदाता आ तौ हामानमी यहूदी आन कली खतम सेल्चा नु साइक्चा कली मेको पुर माइश्शो साहीत कोव़पाइश्शो बाक्त। एस्तर ३:७
25 मिनु मेको लोव़ पिप कली तुइक्पदमे नोले पिपमी, ब्रेक्स पा यहूदी आन कली मरिम्शो नु श्येत गेचा मिम्शो नेल्ल हामान आंम आ पियामी कोप्ताक्व। मिनु मेको नु आ तौ थामम क्युक्शा साइक्चा पुंइसाक्म, दे छाप आप्शो ब्रेक्तीक का ब्रेक्शा ग्रुंइताक्व। एस्तर ७:१०
26 मेको पुर माइश्शो साहीत कोव़शा थोक्शो बाक्त। मिनु मेको नाक्त निक्शी कली पुरीम नें वोइक्तेक्म। मिनु मोरदेकै आ ब्रेक्शो, यहूदी आंमा आन तशो नु अरु आन देंशो लोव़ नेंशा,
27 यहूदीपुकीमी आंम आन कली नु आन चच युइ आन कली नु सु सु यहूदी दुम्चा दाक्नीमी, मेको नेल्ल आन कली गेना हना यो बर्स बर्समी मेको नाक्त निक्शी “पुरीम माइश्शो चाड मानेचा माल्ब” दे रिती थिती वोइक्तेक्म। दोदेंशो ब्रेक्शो बाक्मे, मोदेंशो पचा माल्तेक्म।
28 मिनु नेल्ल आन पालामी, नेल्ल आन खिं ङा मुरपुकीमी, रागी नेल्लेमी नु सहर नेल्लेमी मेको नाक्त निक्शी कली मिम्शा, चाड सेल्चा माल्नीम। मिनु यहूदी आन दातेमी मेको पुरीम चाड कली गेनायो मप्रेंदमेक्ल। गेना हना यो मिम्तमेक्ल।
29 मिनु अबीहेल आ तमी एस्तर पिपीम नु मेको यहूदी मोरदेकैमी दोपा नु गेना मेको पुरीम माइश्शो चाड सेल्चा, मेको आ पर्बम शुश ब्रेक्ताक्स।
30 मिनु मोरदेकैमी पिप अहासूरस आ राज्य ङा १२७ ओटा रागीम बाक्शो यहूदी आन कली चिठी ब्रेक्शा सोइक्ताक्व। मार ब्रेक्शो बाक्त देंशा हना “इन थुं नाइश्शा, आं ङोंइती ब्रेक्शो पुरीम चाड मानेचा मप्रोनीन” दे ब्रेक्शो बाक्त।
31 मिनु मेको यहूदी मोरदेकै नु पिपीम एस्तरमी दोदेंशो देंसा, मोदेंशो पा पुरीम चाड ठीक नाक्तीमी पचा कली ब्रेक्शो बाक्त। मिनु यहूदीपुकीमी आंम कली नु आन चच युइ आन कली “मेको पुरीम चाड पचा माल्ब” दे आन थुंमी मिम्चा माल्नीम। मेको माइजा बाक्तीक नाक्त आन रोंका पशो नेल्ल मिम्चा माल्नीम।
32 मिनु एस्तर आ हुकुममी मेको पुरीम ङा लोव़ नुप्त। मिनु मेको लोव़ किताबम ब्रेक्शा वोइक्तेक्म।