2 Timothy 1 in Sunwar
1 गो परमप्रभु यावे आ दाक्शो ख्रीस्त येसु आ सोइश्शो पावल नङ। ङोंइती परमप्रभु यावेमी “ख्रीस्त येसुमी गेना हना यो ब्रोंइशा बाक्तीक बाक्ब” दे आ लोव़ खाप्शो बाक्त।
2 एको चिठी आं दाक्शो तौ तिमोथी, इ कली ब्रेक्ताक्ङ। इं आफ परमप्रभु यावे नु इं प्रभु येसु ख्रीस्त आस दाक्चा गे नु लील। मेको आस शिशीमी इ कली थुं नाइश्शा बाक्चा गेम्सेक्ल।
3 गो परमप्रभु यावे कली “गे रिम्शो पाइब बाक्नीनी” दे गेय पाइनुङ। आं के किकी पिपी यो मोदेंशो पशो बाक्तेक्म। आं प्रार्थनामी इ कली गेना हना यो मिम्नुङ। फिलिप्पी ३:५; प्रेरित २३:१; प्रेरित २४:१६
4 गो इ ङाक्शो मिम्शा, नाक्दो नाक्ती इ कली ग्रुम्चा दे मिम्नुङ। मेकोमी आं कली ग्येरपाइक्ब। २तिमोथी ४:९
5 इ रिम्शो थमा सुइक्तीके मिम्नुङ। मोदेंशो थमा सुइक्तीके ङोंइती इ बगे लोइसमी, नोले इम्मा युनीसमी बाक्शो बाक्त। मुल थमा पा इ आगाम बाक्ब। गो मेको तुइक्नुङ। प्रेरित १६:१-३
6 मोपतीके गो इ कली आं गुइ इ तारी वोदुनु, परमप्रभु यावेमी इ कली मार मार गेवा, मेको लेंशा मी खोदेंशो पा ब्रपतो, दे फ्रुक्पाइक्नन। १तिमोथी ४:१४
7 मारदे हना परमप्रभु यावेमी इं कली हिंब थुं मगेव। तन्न सक्ति पाइश्शो, दाक्पाइक्ब नु गेय पचा ङोंइती मिम्पाइक्ब थुं गेप्तु। रोमी ८:१५
8 इं प्रभु आ पर्बम लोव़ पचा मुने मपावो। गो प्रभु आ पर्बम जेल्खानम बाक्शो आं पर्बम यो मुने मपावो। तन्न ग्येरपाइक्ब लोव़ आ पर्बम परमप्रभु यावे आ सक्तिमी श्येत फलो। रोमी १:१६; पत्रुस ४:१६
9 परमप्रभु यावेमी सैतान रे प्रोंइशा “आं मुर नम” दे ब्रेत्ताक्व। इं रिम्शो पतीके कोव़शा ममाइ, आ माल्शो नु शुश ङोंइती रे ख्रीस्त येसुमी इं कली गेशो दाक्तीके आ पर्बम ब्रेत्ताक्व। तीतस ३:५
10 मुल इं कली पाप रे प्रोंइब येसु ख्रीस्त कली रागीम सोइश्शा, मुर नेल्ल आन कली तपाइक्तु। ख्रीस्त येसुमी बेक्तीक कली ग्राशा, ब्रोंइतीके नु गेना हना या ब्रोंइशा बाक्शा, परमप्रभु यावे आ ग्येरपाइक्ब लोव़ आ पतीकेमी छेङछेङमी वोइश्शो खोदेंशो पा तुइक्पाइक्तु। १कोरिन्थी १५:५५-५७; हिब्रू २:१४
11 मेको ग्येरपाइक्ब लोव़ तुइक्पाइक्चा, दे गो लोव़ पाइब, ख्रीस्त आ सोइश्शो नु शेंब दुम्ती। १तिमोथी २:७
12 मोपतीके गो यो श्येत जाइनुङ। तन्न गो मुने मपाइनुङ, मारदे हना सु कली थमा सुइक्नुङा मेको तुइक्नुङ। मेकोमी आं कली मबेक्ङा सम्म कोव़ने चाप्ब, दे यो तुइक्नुङ।
13 थमा लोव़ कली खोतो। मेको ख्रीस्त येसुमी बाक्शो थमा सुइक्तीके नु दाक्तीके बाक्ब। गे आं लोव़ रे तुइक्नेवे।
14 इं आगामी बाक्शो परमप्रभु यावे आ सोक्तीमी इ कली तुइक्पाइश्शो थमा शेंतीके कली खोतो।
15 नेल्ल एसीया ङा मुरपुकीमी आं कली प्रोंइतीमी दे तुइक्नेवे। मेको आन दातेमी फीगेलस नु हेरमोगेनेस बाक्नीसी। २तिमोथी ४:१६
16 प्रभुमी ओनेसीफरस आ खिं ङा मुर आन कली शिशी पवल। मारदे हना साङलोम पाइश्शो बाक्ङानु, ओनेसीफरस आं पर्बम मुने मपथु, आं कली शुश रिम्शो पाप्तु। २तिमोथी ४:१९
17 मेकोमी रोम सहर जाक्दीश्शा, आं कली शुश माल्शा थित्ती।
18 प्रभुमी मेको कली आ निसाफ पतीक नाक्तीमी शिशी पवल। मेकोमी एफिसस सहरमी शुश गेय पाप्तु, दे यो तुइक्नेवे।