2 Chronicles 9 in Sunwar
1 शेबा ङा पिपीममी सोलोमन आ शुश नें चलेशो नेना बाक्त। मिनु मेकोमी सोलोमन कली नाक्चा कली लेन्ने मचाप्चा ङा लोव़ हिल्लो पथ यरूसलेमम जाक्माक्त। मेको शुश मुर नु जाक्शा, शुश दलओंठम मस्लापुकी, शुश सुन नु हीरापुकी कुर पा जाक्माक्त। मिनु मेकोमी सोलोमन कली ग्रुम्शा, आ थुंम बाक्शो लोव़ नेल्ल हिल्लो पवा बाक्त। मत्ती १२:४२
2 मिनु सोलोमनमी आ हिल्लो पशो लोव़ नेल्ल लेत्ता बाक्त। मेकोमी तेको लोव़ हिल्लो पवा, मेको लोव़ सोलोमनम मारेइ श्येत मलाक्थु, लेत्ता बाक्त।
3 मिनु शेबा ङा पिपीममी सोलोमन आ रुप्तीक थुं नेल्ल तशा, मेको आ सेल्शो खिं,
4 मेको आ टेबल ङा जचा थोव़क, मेको आ एर ओंथ निश्शो आ सरकार ङा ठेयब मुरपुकी, मेको आ गेय पाइब आन दारशो वा, अरु आन फेक्तीके नु पिप कली तूचा गेब आन वा कोव़स ङा कोव़स दुम्माक्त। मिनु परमप्रभु यावे आ खिं लशा, मेको आ चोशा चढ़ेशो तशा, शुश छक लाक्माक्त।
5 मिनु मेकोमी पिप कली “आं रागीम इन पतीके नु शुश रुप्तीक थुं आ पर्बम नेंशो लोव़ नेल्ल थमा बाक्त।
6 तन्न गो जाक्शा, आंमा मतङा सम्म मेको आन देंशो लोव़ थमा मसुदु। मेकोपुकीमी आं कली इन रुप्तीक थुं आ पर्बम नेल्ल लोव़ मशोव़ङमे बाक्त। इच्का ला शोव़ङमे बाक्त। तन्न गे शुश रुप्तीक थुं पाइश्शो बाक्तीनी।
7 इन मुर ग्येरशो मुर बाक्नीमी। नाक्त किंत किंत इन ङोंइती गेय पाइबपुकीम इन रुप्तीक थुं ङा लोव़ नेंशा, ग्येरसीशो बाक्नीमी।
8 परमप्रभु यावे, इन परमप्रभु ठेयब बाक्ब। इन कली तशा ग्येरसीशा आ ठेयब नित्तीकेमी इन कली निप्पाइश्शा, आ पा ङा पिप सेल्तु। मारदे हना परमप्रभु यावे, इन परमप्रभुम इस्राएली आन कली दाक्शा, गेना हना यो बाक्पाइक्चा थुं पाप्तु। मोपतीके इन कली मेकेर ठीक निसाफ पचा नु ठीक पतीके शेंचा, दे आन पिप सेल्तु” देंमाक्त। १इतिहास २९:२३
9 मिनु नोले मेकोमी पिप कली सहे का २० टलेन्ट सुन शुश मस्ला नु शुश हीरा गेवा बाक्त। शेबा ङा पिपीममी सोलोमन कली गेशो मस्लापुकी, थम रिम्शो बाक्शा तेइ मथिंसीब बाक्माक्त। टलेन्ट का ३४ किलो बाक्ब।
10 मिनु मेको नेल्ल प्रोंइशा, पिप हुराम नु सोलोमन आस गेय पाइबपुकीम ओफीर रे सुन चाक्गमे बाक्त। मिनु मेकोपुकीमी शुश क्येट लाइब शी नु हीरापुकी यो चाक्गमे बाक्त।
11 मिनु पिपमी मेको शी रे परमप्रभु यावे आ खिं नु दरवार कली थेंका सेला बाक्त। कुम्सो पाइब आन कली ठेयब नु आइक्च तार पाइश्शो ताप्तीकपुकी सेला बाक्त। ङोंइती मोदेंशो रिम्शो शी यहूदा रागीम गेनायो मबाक्शो बाक्माक्त।
12 मिनु पिप सोलोमनम शेबा ङा पिपीम कली आ चाक्शा गेशो कोसेली क्येङा यो शुश आ माल्शो मारेइ मारेइ गेवा बाक्त। मिनु नोले मेको आ गेय पाइबपुकी नु आ रागी लेम्माक्त।
13 सोलोमन आ बाक्तीकेम बर्स काम ६ सहे ६६ टलेन्ट सुन ताक्बाक्माक्त। टलेन्ट का ३४ किलो बाक्ब।
14 मेको प्रोंइशा, आ ग्याप्ब लेयबपुकीमी यो चाक्बाक्मा बाक्त। अराब रागी ङा पिपपुकी नु रागी रागी ङा सासन पाइबपुकीमी यो सोलोमन कली सुन नु चांदी चाक्बाक्मा बाक्त।
15 मिनु पिप सोलोमनमी तुप्शो सुन के सहे निक्शी लडाइ पाइब आन कली ठेयब तेक्तीक सेला बाक्त। मेको तेक्तीक का सेल्चा कली ६ सहे शेकेल सुन माल्मा बाक्त। शेकेल का ११.५ ग्राम ङा चांदी के क्येट बाक्ब।
16 मेकोमी लेंशा तुप्शो सुन के सहे सां आइक्च तेक्तीक सेला बाक्त। मेको तेक्तीक का सेल्चा कली सहे सां शेकेल सुन माल्मा बाक्त। मिनु पिपमी मेको नेल्ल लेबानोन ब्वाकी ङा खिंम वोइक्पदा बाक्त। १राजा ७:२
17 मिनु पिपम हात्ती आ दारा के ठेयब नित्तीक का सेल्शा, मेको कली क्येख सुनम गिल्पदा बाक्त।
18 मेको ठेयब नित्तीके आ ङोंइती ६ ओटा थेंका नु सुन के खोइल वोइक्तीक बोंइसीशो बाक्माक्त। मेको ठेयब नित्तीक आ निम्फा पटटी गुइ वोइक्तीक बाक्माक्त। मेको गुइ वोइक्तीक निम्फा पटटी गे राप्शो गुप्स का का सेल्शो बाक्माक्त।
19 मेको ६ ओटा थेंकामी थेंका कामी एर गे गुप्स का, ओंथ गे गुप्स का पा १२ ओटा गुप्स सेल्शो बाक्माक्त। तेकोइ राज्यम मोदेंशो ठेयब नित्तीके गेनायो मसेल्शो बाक्माक्त।
20 सोलोमन आ तूतीक बोस नेल्ल सुन के बाक्माक्त। मिनु लेबानोन ब्वाकी ङा खिं ङा बोस नेल्ले क्येख सुन के बाक्मा बाक्त। चांदी के मारेइ मसेल्शो बाक्मा बाक्त। मारदे हना सोलोमन आ पालाम चांदी मारेइ खोदेंशो मबाक्माक्त।
21 हुराम आ गेय पाइबपुकी पिप सोलोमन आ जहाजपुकी नु टारसीस ङा बाक्त। मिनु बर्स सां सांमी मेको पिप आ जहाजपुकीम सुन, चांदी, हात्ती आ दारा, मोरपुकी नु मजुरपुकी चाक्बाक्मा बाक्त।
22 मोपा पिप सोलोमन शोंप पाइश्शो नु रुप्तीक थुंम रागी ङा पिप नेल्ल आन क्येङा ठेयब दुम्माक्त।
23 मिनु परमप्रभुम सोलोमन कली गेशो रुप्तीक थुं ङा लोव़ नेंचा कली रागी रागी ङा पिप नेल्ले मेको कली ग्रुम्थ जाक्बाक्मा बाक्त।
24 मिनु मेको कली ग्रुम्थ जाक्ब नेल्लेमी सुन नु चांदी के मार मार, फेक्तीक वापुकी, यापुकी, मस्लापुकी, शारापुकी नु खच्चरपुकी बर्स बर्सम कोसेली चाक्बाक्मा बाक्त।
25 सोलोमन के ४ हजार शारा नु बग्गीपुकी वोइक्तीक खिं बाक्मा बाक्त। मिनु मेको के १२ हजार शारा बाक्मा बाक्त। मेकोमी शारा नु बग्गी आन कली बग्गी वोइक्तीक सहरम नु का निक्शी चहिं आं नु यरूसलेममी वोइक्पाइक्बाक्माक्त। २इतिहास १:१४-१७; १राजा ५:६
26 मेकोमी युफ्रेटीस खोला रे पलिस्ती आन रागी नु इजीप्त आ सांद सम्म सासन पवा बाक्त।
27 पिपमी फुल्लु खोदेंशो पा यरूसलेम सहरम चांदी तेला बाक्त। लेबानोन ङा ठेयब रवा आ शी शेफेलाहम बाक्शो फोव़शी रवा खोदेंशो पा शुश तेला बाक्त।
28 सोलोमन आ शारापुकी चहिं इजीप्त नु अरु नेल्ल रागी रे ग्याप्शा चाक्बाक्मा बाक्त।
29 मिनु पिप सोलोमन आ ङोंइती रे ङा नोले सम्म पशो नेल्ल परमप्रभु यावे आ लोव़ पाइब नाथान आ इतिहासम मब्रेक्शो बाक्बा ङा? मिनु शिलो ङा नोले दुम्ब लोव़ पाइब अहीयाहम मब्रेक्शो बाक्बा ङा? इददोमी नेबात आ तौ येरोबाम आ पर्बम तशो मब्रेक्शो बाक्बा ङा?
30 सोलोमनम यरूसलेमम बाक्शा, इस्राएल नेल्ल कली ४० बर्स सासन पवा बाक्त।
31 मिनु सोलोमन बेक्माक्त। मिनु मुरपुकीम मेको कली आ आफ दाऊद आ सहरमी थिम्मे बाक्त। मिनु मेको आ पा ङा आ तौ रेहोबाम पिप दुम्माक्त। १राजा १४:२१