2 Chronicles 32 in Sunwar
1 मिनु हिज्कीयाहम मेको रिम्शो गेय नेल्ले पने थुमा नोले, अस्सुर ङा पिप सन्हेरीब यहूदा ओव़शा “यहूदा ङा बोल्यो सहरपुकी आंम के सेल्नुङ” दे मिम्शा, मेको सहरपुकी आ नेक्था ताम्बु कीङा बाक्त।
2 मिनु हिज्कीयाहमी सन्हेरीब जाक्शा, यरूसलेम कली लडाइ तोचा चिक्शो तवा चोटीन
3 मेकोमी सहर ङा लाङगा ङा ब्वाक्कु बुक्तीके तेक्चा, दे सरकार ङा ठेयब मुर नु कप्तानपुकी नु सल्ला पवा बाक्त। मिनु मेकोपुकीमी पिप कली वारच पामे बाक्त।
4 मेकोपुकीम शुश मुर खुप्शा, आन रागी रे ब्वाक्कु बुक्तीक नु खोल्सा नेल्ल तेक्गमे बाक्त। मिनु मेकोपुकीम “अस्सुर ङा पिपपुकी एक जाक्शा, शुश ब्वाक्कु तूचा मतामेक्ल” देंमा बाक्त।
5 मिनु हिज्कीयाहम शुश बोल पा सहर ङा ब्रेश्शो गारो नेल्ल सेल्पदा बाक्त। मिनु आ तार लाइश्शो खिंपुकी सेल्पदा बाक्त। मिनु मेकोमी गारो ङा लाङगा गे अर्को गारो सेल्पदा बाक्त। मिनु दाऊद आ सहर ङा गारो तिक्चा कली खप तेल्पदा बाक्त। मिनु मेकोमी शुश या नु तेक्तीक यो सेल्पदा बाक्त। २इतिहास २५:२३;
6 मेकोमी लडाइ पाइब आन कप्तान योव़शा, मेको आन कली सहर ङा ठेयब लाप्चो आ ङोंइती ङा दिंममी पुक्शा, मेको आन कली आन थुं बारपाइश्शा
7 “बोल्यो नु महिंब दुमीन। अस्सुर ङा पिप नु मेको आ चाक्शो शुश मुर तशा, महिनीन। मारदे हना मेकोपुकी नु बाक्शो क्येङा गोपुकी नु बाक्शो का थम ठेयब बाक्ब।
8 मेको नु शुश मुर ला बाक्नीम। तन्न गोपुकी नु परमप्रभु यावे, इं परमप्रभु बाक्ब। मेकोमी इं कली वारच पा इं पा ङा लडाइ पाइब” दे यहूदा ङा पिप हिज्कीयाहमी मुर आन थुं बारपदा बाक्त। येरमीया १७:५-६
9 मेको नोले अस्सुर ङा पिप सन्हेरीबम आ लडाइ पाइब लाकीशम बाक्मानु, यहूदा ङा पिप हिज्कीयाह नु यरूसलेम ङा मुर नेल्ल आन कली लोव़ नेंपाइक्चा कली मुरपुकी सोइक्ता बाक्त।
10 मिनु मेकोपुकीम “अस्सुर ङा पिप सन्हेरीबम मार लोव़ पाइब देंशा हना, गे एर ओंथ रे पुम्शो यरूसलेम सहरम दोपा ब्रोंइने चाप्नीनी, दे सु कली थमा सुइक्नीनी?
11 पिप हिज्कीयाहमी ‘परमप्रभु यावे, इं परमप्रभु कली अस्सुर ङा पिप आ गुइ रे प्रोंइब, दे जोल मपवा? तन्न मेकोमी इन बाक्तीकेमीन अन्काल नु ब्वाक्कु तूतू दाक्पाइश्शा, इन कली बेक्पाइक्चा कली मोदेंशो लोव़ पशो बाक्ब।
12 मार, मेको हिज्कीयाहमी डांडा ङा थान नु आ चढ़ेतीक बुल बाल एश्शा खतम मपोक्पदा? मिनु यहूदा नु यरूसलेम ङा मुर नेल्ल आन कली, चढ़ेतीक काम पूजा पा नु मेकेर ला चढ़ेचा’ मदेंम ङा?
13 गो नु आं किकी पिपीम अर्को रागी जात जात ङा मुर आन कली मार पाइक्का, मेको गेपुकीम मतुइश्शो बाक्नीनी ङा? मार, मेको रागी रागी ङा मुर आन देवताम मेको रागी आन कली आं गुइ रे प्रोंइने चाप्मे ङा?
14 आं किकी पिपीम खतम पोक्शो रागी रागी ङा मुर आन देवता आन दाते ङा तेको देवताम आं गुइ रे आ मुर आन कली प्रोंइने चबा ङा? मिनु दोपा इन परमप्रभुमी इन कली आं गुइ रे प्रोंइने चाप्बा?
15 मोपतीके हिज्कीयाहम इन कली जोल पा दूली लां खोइक्पाइक्चा मगेन। मेको कली थमा मसुतीन। मिनु तेकोइ देवतापुकीम आन रागी नु राज्य ङा मुर आन कली आं किकी पिपी नु आं गुइ रे प्रोंइने मचाप्शो बाक्तेक्म हना, इन परमप्रभुमी इन कली आं गुइ रे दोपा प्रोंइने चाप्बा ङा? देंशो बाक्ब मतीन” देंमाक्त।
16 मिनु सन्हेरीब आ गेय पाइबपुकीमी परमप्रभु यावे नु मेको आ गेय पाइब हिज्कीयाह आ पर्बम चिनु मरिम्शो लोव़ तेम्शा, लोव़ पामे बाक्त।
17 पिप सन्हेरीबम परमप्रभु यावे, इस्राएली आन परमप्रभु कली यो तोक्शा लोव़ पा चिठी ब्रेक्शो बाक्माक्त। मिनु मेको चिठीम मार ब्रेक्शो बाक्माक्त देंशा हना “दोपा अर्को रागी रागी ङा मुर आन देवतापुकीम आन मुर आन कली आं गुइ रे प्रोंइने मचाप्मे, मोपा हिज्कीयाह आ परमप्रभुमी यो आ मुर आन कली आं गुइ रे प्रोंइने मचाप्ब” दे ब्रेक्शो बाक्माक्त।
18 मिनु मेकोपुकीम सहर आन के सेल्चा कली यरूसलेम ङा गारो तार राप्ब मुर आन कली हिंच कोंइचा कली ठेयब सेंदा पा यहूदी आन लोव़मी मेको चिठीम ब्रेक्शो लोव़ पा ग्रीमा बाक्त।
19 मेकोपुकीम मुर आन गुइम सेल्शो रागी ङा देवता आन कली खोदेंशो पा यरूसलेम ङा परमप्रभु कली तोक्शा लोव़ पामे बाक्त।
20 मेना पिप हिज्कीयाह नु आमोज आ तौ परमप्रभु यावे आ लोव़ पाइब यसैयाम परमप्रभु कली ठेयब सेंदा पा पुन्से बाक्त।
21 मिनु परमप्रभु यावेम आ स्वर्ग ङा गेय पाइब का अस्सुर ङा पिप आ बाक्तीकेम सोइश्शा, आ बोल्यो लडाइ पाइबपुकी, आ कप्तानपुकी नु आ ठेयब मुरपुकी नेल्ल साइक्पदा बाक्त। मिनु सन्हेरीब मुने दोक्शा आ रागी लेम्माक्त। मिनु मेको आ देवता थान ओव़मेनु, आ तौ का निक्शीमी तरवारम क्योरशा सदमे बाक्त।
22 मोपा परमप्रभु यावेम हिज्कीयाह नु यरूसलेमम बाक्ब मुर आन कली अस्सुर ङा पिप सन्हेरीब नु मेको आन जोरी सत्रु नेल्ल आन गुइ रे प्रोना बाक्त। परमप्रभु यावेमी मेको रागी कली नाइक्चा गेवा बाक्त।
23 मिनु शुश मुरपुकीम यरूसलेमम परमप्रभु यावे कली मार मार चाक्गमे बाक्त। मिनु यहूदा ङा पिप हिज्कीयाह कली शुश शोंप चाक्गमे बाक्त। मोपा रागी रागी ङा मुर नेल्लेमी मेको कली मान पामे बाक्त।
24 मिनु नोले हिज्कीयाह शुश रोइ पा बेक्चा चिक्ता बाक्त। मिनु मेकोमी परमप्रभु यावे कली पुना बाक्त। मिनु परमप्रभु यावेमी मेको कली लोव़ लेश्शा, चिन्ड का गेवा बाक्त।
25 तन्न हिज्कीयाहमी परमप्रभु यावेमी मेको कली रिम्शो पशोमी “गे रिम्शो पाइब बाक्नीनी” मदेंथु ठेयब लेश्शो दुम्माक्त। मोपतीके परमप्रभु यहूदा नु यरूसलेम आ पर्बम गाइक्ता बाक्त।
26 मिनु हिज्कीयाह नु यरूसलेम ङा मुर नेल्लेम ब्रेम्शो सेल्सीमे बाक्त। मोपतीके परमप्रभु यावे हिज्कीयाह आ पालाम मेकोपुकी नु मगाइक्ता बाक्त।
27 हिज्कीयाह शुश शोंप पाइश्शो नु मान ताइब मुर दुम्शो बाक्माक्त। मेकोमी आ सुन चांदी, हीरापुकी, मस्लापुकी तेक्तीकपुकी नु अरु मार मार शुश क्येट लाइब वोइक्तीक खिंपुकी सेला बाक्त।
28 शुश अन्न, नक अङगुर शांबु नु तेल वोइक्तीक खिंपुकी सेला बाक्त। मिनु शुश बी ब्यफ नु क्यारश भेडा आन कली ठेयब गोठपुकी सेला बाक्त।
29 मेकोमी आंम कली सहरपुकी सेला बाक्त। मेको के बी ब्यफ नु क्यारश भेडा शुश बाक्मा बाक्त। मारदे हना परमप्रभुम मेको कली थमा पा शुश शोंप गेशो बाक्माक्त।
30 मेको हिज्कीयाहमी गिहोन आ आइक्था ङा बुक्शो ब्वाक्कु तेक्शा उइ दाऊद आ सहर आ पच्छिम गे शाइक्पाइश्शो बाक्माक्त। मेको आ पशो गेय नेल्ले रिम्शो दुम्शा, सोशो बोशो दुम्माक्त।
31 मिनु बेबीलोन ङा सरकार ङा ठेयब मुर आन सोइश्शो मुर मेको रागीम तांइसीशो छक लाक्चा चिन्ड आ पर्बम हिल्लो पथ जाक्मा बाक्त। तन्न परमप्रभुम हिज्कीयाह कली नाक्शा कोव़चा कली नु मेको आ थुंम बाक्शो मार बाक्बा, दे तुइक्चा कली वारच मपवा बाक्त।।
32 हिज्कीयाह आ नोले ङा गेय नु आ रिम्शो पशो आमोज आ तौ परमप्रभु यावे आ लोव़ ताइब यसैया आ यहूदा ङा पिप आन किताबम ब्रेक्शो बाक्ब।
33 मिनु हिज्कीयाह बेक्माक्त। मिनु मुरपुकीम मेको कली दाऊद आ चच युइ आन कली थिम्तीक देम्सीलो मेर थिम्मे बाक्त। मिनु मेको बेक्मेनु, यहूदा नु यरूसलेम ङा मुर नेल्लेमी मान पामे बाक्त। मिनु मेको आ नोले आ तौ मनस्से पिप दुम्माक्त। २इतिहास १६:१४