2 Chronicles 28 in Sunwar
1 आहाज पिप दुम्मेनु, २० बर्स दुम्शो बाक्माक्त। मेकोमी यरूसलेमम १६ बर्स सासन पवा बाक्त। मेकोमी आ किकी पिपी दाऊद खोदेंशो पा परमप्रभु यावे आ ङोंइती मार ठीक बाक्मे, मेको मपवा बाक्त।
2 मेको इस्राएल ङा पिप आन लांम गाक्माक्त। मिनु चेम्शा बाल देवता आ मूर्तिपुकी सेला बाक्त।
3 मिनु पिप आहाजम बेन-हिन्नोम आ बेंसीम धूप चढ़ेवा बाक्त। आहाजमी रागी रागी ङा मुर आन ग्रांग्रा दिशो गेय खोदेंशो पा, आ तौ आन कली मीम चोशा चढ़ेवा बाक्त। मोपतीके परमप्रभु यावेमी रागी रागी ङा मुर आन कली इस्राएली आन ङोंइती रे खेरशो बाक्माक्त। ब्यवस्था १८:९-१२
4 मेकोमी डांडा ङा थानपुकीम चढ़ेवा बाक्त। मिनु नेल्ल डांडाम नु ठेयब रवा आ पुंम चढ़ेतीक चढ़ेशा धूप चोवा बाक्त। १राजा १४:२२-२३
5 मोपतीके परमप्रभु यावे, आ परमप्रभुमी मेको कली अराम ङा पिप नु ब्रुपाइश्शा, मेको आ गुइमी गेवा बाक्त। मिनु मेकोमी पिप आहाज आ शुश मुर आन कली ग्याइश्शा, दमस्कसम लदा बाक्त। मेको इस्राएल ङा पिप नु यो ब्रुमाक्त। मिनु मेको पिपम शुश मुर आन कली सदा बाक्त।
6 रेमाल्याह आ तौ पेकाहमी काबुमीन यहूदा ङा लाख का २० हजार मुर आन कली साइक्मी बाक्त। मेको नेल्ल बोल्यो लडाइ पाइब बाक्मा बाक्त। मारदे हना यहूदा ङा मुरपुकीम परमप्रभु यावे, आन किकी पिपी आन परमप्रभु कली प्रोंइशो बाक्मा बाक्त।
7 एफ्राइम ङा जिक्री माइश्शो बोल्यो लडाइ पाइब मुर काम पिप आ तौ मासेयाह, पिप आ दरवार कोव़ब कप्तान अज्रीकाम नु पिप आ ठेयब ब्रेक्ब एल्काना आन कली साइक्मी बाक्त।
8 इस्राएलीपुकीमी लाख निक्शी आन थर थर ङा मुर ग्याइश्शा लदमे बाक्त। मेको मीश मुर, तमी नु तौ बाक्मा बाक्त। मिनु मेकोपुकीम शुश मार मार यो रोइश्शा, नेल्ल सामरीया लदमे बाक्त।
9 तन्न मेकेर ओदेद नें पाइश्शो परमप्रभु यावे आ लोव़ पाइब का बाक्माक्त। मिनु लडाइ पाइबपुकी सामरीया लेम्मानु, मेको आन कली ग्रुम्थ जाक्माक्त। मिनु मेकोमी मेको लडाइ पाइब आन कली “परमप्रभु यावे, इन किकी पिपी आन परमप्रभु यहूदा ङा मुरपुकी नु गाइक्तीके, मेकोमी मेको आन कली इन गुइमी गेप्तु। तन्न गेपुकीम इन गाइक्तीकेम मेको आन कली साइक्तीनी। मेको मो पशो इर स्वर्ग सम्म जाक्दीश्शो बाक्ब। लेवी १९:१८
10 मुल गे यहूदा नु यरूसलेम ङा मीश मुर, वोंइश मुर नेल्ल आन कली इन वाइलीम वाइल सेल्चा थुं पाइनीनी। गेपुकीम परमप्रभु यावे, इन परमप्रभु आ ङोंइती पाप ला पाइनीनी। अरु मार पाइनीनी?
11 मुल आं लोव़ नेनीन। इन ग्याइश्शो आंम मुर आन कली प्रोंइशा लेत्चा गेने। मारदे हना परमप्रभु यावे इन कली तशा शुश चुरशो बाक्ब” देंमाक्त।
12 मिनु लेंशा का निक्शी एफ्राइम ङा ठेयब मुर योहानान आ तौ अजारयाह, मेशील्लेमोथ आ तौ बेरेक्याह, शाल्लुम आ तौ येहीज्क्याह नु हादले आ तौ आमासाम लडाइ रे लेश्शा जाक्शो आन कली ग्रुम्शा,
13 मेको आन कली “गेपुकीम एको ग्याइश्शो आन कली एक चाक्चा मदुम्ब। गेपुकीम मार मिम्शो बाक्नी? मेको आ पर्बम गोपुकीम परमप्रभु यावे आ ङोंइती दोस ताइनीकी। मार, गेपुकीम इं मरिम्शो पशो नु इं पाप तेम्चा दाक्नीनी? मार, इं पाप ठेयब मबाक्बा ङा? परमप्रभु यावे इस्राएल आ पर्बम ङोंइती रे गाइक्ना गाइक्न बाक्ब” दे मदमे बाक्त।
14 मोपतीके लडाइ पाइबपुकीम ग्याइश्शोपुकी नु आन रोइश्शो मारेइ मारेइ मेको आन ठेयब मुर नु मेको देल्शा बाक्शो मुर आन ङोंइती प्रोन्मे बाक्त।
15 मिनु ठेयब मुरपुकीमी नें थिशा का निक्शी मुर आन कली ब्रेत्मे बाक्त। मेको ब्रेश्शो मुरपुकीम ग्याइश्शा चाक्शो शिश्रा मुर आन कली रोइश्शो वा फेक्पदमे बाक्त। जुत्ता मुइक्पदमे बाक्त। जचा नु तूचा गेशा, तेल ख्रेक्तमे बाक्त। मिनु थाम्पा दशो नु गाक्ने मचाप्ब मुर आन कली गधा ङोइक्पा, खजूर रवा आ सहर, यरीको आन खिं खिं सम्म चोक्ङमे बाक्त। मिनु मेकोपुकी सामरीया लेम्मा बाक्त। २राजा ६:२२; हितोपदेस २५:२१-२२
16 मेना पिप आहाजम अस्सुर ङा पिप कली “वारच पाइक्की” दे पुंइथ मुर सोइक्ता बाक्त।
17 मारदे हना एदोमीपुकीम लेंशा लडाइ पा यहूदा कली ग्राशा, मेकेर ङा मुर आन कली ग्याइश्शा लाइश्शो बाक्मा बाक्त।
18 पलिस्तीपुकीमी यो यहूदा ङा शेफेलाह नु नेगेब ङा सहरपुकी रोइक्तमे बाक्त। मिनु मेकोपुकीम बेथ-शेमेश, आइयालोन, गेदे-रोथ, सोको नु मेको आ गाउंपुकी, तिम्नाह नु मेको आ गाउंपुकी, गिम्जो नु मेको आ गाउंपुकी आंम के सेल्शा बाक्मा बाक्त। यहोसु १५:१०
19 यहूदा ङा पिप आहाजम पतीकेन परमप्रभु यावेम यहूदा कली थम आइक्च सेल्शो बाक्माक्त। मारदे हना पिप आहाजम थम मरिम्शो पा परमप्रभु यावे कली प्रोंइशो बाक्माक्त।
20 मिनु अस्सुर ङा पिप तिल्गथ-पिलेसेर मेको कली वारच पाइक्थ जाक्माक्त। तन्न मेकोमी मेको कली वारच पाइक्चा आ पा ङा श्येत कका गेवा बाक्त।
21 मिनु आहाजम परमप्रभु यावे आ खिं, पिप आ दरवार नु आ ठेयब मुर आन खिं रे मार मार लाइश्शा, अस्सुर ङा पिप कली “वारच पाइय्यीकी” दे गेवा बाक्त। तन्न मेको नेल्ल मोशा दुम्माक्त।
22 मोपा पिप आहाज दोशो श्येत जवा, मोशोन परमप्रभु यावे क्येङा ङोन दुम्माक्त।
23 मेकोमी आंम कली ब्रुपाइक्ब दमस्कस ङा देवता आन कली चढ़ेवा बाक्त। मारदे हना मेकोमी “अराम ङा पिप आ देवतापुकीम मेको आन कली वारच पाइक्तेक्म। गो यो मेको आन कली मार मार चढ़ेनुङ। मिनु आं कली यो वारच पाइय्यीमील” दे मिम्ता बाक्त। तन्न मेको देवतापुकी मेको कली नु इस्राएली नेल्ल आन कली खतम पोक्तीक दुम्माक्त।
24 मेको नोले आहाजमी परमप्रभु आ खिं ङा ग्योंबपुकी खुप्शा, ख्रोइश्शा बिग्रेवा बाक्त। मिनु परमप्रभु यावे आ खिं ङा लाप्चो चोक्गा बाक्त। मिनु मेकोमी यरूसलेमम तेइ तेइ थानपुकी सेला बाक्त।
25 मिनु यहूदा ङा सहर सहरमी डांडा ङा थानपुकी सेला बाक्त। अरु देवता आन कली मार मार चढ़ेवा बाक्त। मोपा मेकोमी परमप्रभु यावे, आंम किकी पिपी आन परमप्रभु कली थाम्पा गाइक्पदा बाक्त।
26 मिनु मेकोमी नोले सम्म मार मार पवा नु आ ङोंइती नु नोले ङा गाक्शो लां नेल्ल, यहूदा नु इस्राएल ङा पिप आन किताबम ब्रेक्शो बाक्ब।
27 मिनु आहाज बेक्माक्त। मिनु मुरपुकीम मेको कली यरूसलेम सहरम थिम्मे बाक्त। तन्न मेकोपुकीम मेको कली इस्राएल ङा पिप आन कली थिम्तीकेम मथिम्मे बाक्त। मिनु मेको आ पा ङा आ तौ हिज्कीयाह पिप दुम्माक्त। २इतिहास २१:२०