1 Timothy 3 in Sunwar
1 सुमी थमा सुइक्ब आन कली कोव़ब दुम्चा दाक्बा, मेको ठेयब नु रिम्शो गेय माल्ब बाक्ब। एको लोव़ थमा बाक्ब। प्रेरित २०:२८; तीतस १:५-९
2 थमा सुइक्ब आन कली कोव़ब काइ दोस गेचा मपुंइसीशो बाक्चा माल्ब। मीश का के ला वोंइश बाक्चा माल्ब। गेय पचा ङोंइती मिम्ब, आ गेय नेल्ल कली रिम्शो पाइब, मुर आन कली बास गेब नु रिम्शो शेंब बाक्चा माल्ब।
3 राकसी शांबु तूशा दुक्ब नु तुप्ब मुर थमा सुइक्ब आन कली कोव़ब दुम्ने मचाप्ब। थमा सुइक्ब आन कली कोव़ब रिम्शो थुं पाइश्शो बाक्चा माल्ब। जिचा पोक्ब नु क्येट शुश दाक्बमी एको गेय पने मचाप्ब।
4 आंम खिं ङा मुर आन कली रिम्शो कोव़ब बाक्चा माल्ब। आंम आलपुकी टीब नु मुर नु रिम्शो पाइब बाक्चा माल्नीम।
5 मारदे हना आंम खिं ङा मुर आन कली रिम्शो कोव़ने मचाप्ब बाक्त हना, दोपा परमप्रभु यावे आ खिं ङा मुर आन कली कोव़ने चाप्बा ङा?
6 थमा सुइक्चा नक गोशो मुर थमा सुइक्ब आन कली कोव़ब दुम्ने मचाप्ब। मारदे हना मेको बोरशा ठेयब लेश्शो दुम्ब। मिनु सैतानमी मेको कली रेश्शा, खतम सेल्ब।
7 थमा मसुइक्बपुकीमी यो थमा सुइक्ब आन कली कोव़ब आ पर्बम रिम्शो लोव़ पचा माल्नीम। मोदेंशो मदुम्त हना, दोस गेचा पुंइसीब। मिनु सैतान आ ग्याइलीम रेप्ब।
8 थमा सुइक्ब आन ग्रुम्तीक खिं ङा गेय पाइबपुकी यो रिम्शो मुर बाक्चा माल्नीम। लोव़ क्याल्ब, शुश राकसी शांबु तूब नु क्येट ला मिम्बमी मोदेंशो गेय पने मचाप्नीम। प्रेरित ६:३; फिलिप्पी १:१
9 मेकोपुकीमी रिम्शो थुंमी थमा सुइश्शा, मेकेर ङा ख्रुइश्शो लोव़ मिम्ने चाप्ब दुम्चा माल्नीम। १तिमोथी १:२९
10 ङोंइती गे मेको आन थुं कोव़चा माल्नेवे। मिनु शुश रिम्शो पाइब बाक्ब, दे तुइश्शा ला थमा सुइक्ब आन ग्रुम्तीके खिंमी गेय पचा कली वोइक्ने चाप्नेवे।
11 आ मीश यो रिम्शो बाक्शा, डुलेथ मगाक्थु, गेय पचा ङोंइती मिम्ब बाक्चा माल्ब। मेको आ गेय नेल्ले रिम्शो पा पचा माल्ब। तीतस २:३
12 थमा सुइक्ब आन ग्रुम्तीके खिंमी गेय पाइब मीश का आ वोंइश दुम्चा माल्ब। मेकोमी आ आल नु आंम खिं ङा मुर नेल्ल आन कली रिम्शो पा कोव़ब दुम्चा माल्ब।
13 मोदेंशो पाइबमी थमा सुइक्ब आन ग्रुम्तीकेमी आंम कली रिम्शो नें सेल्नीमी। ख्रीस्त येसु कली आंम थमा सुइक्तीके शुश बारपाइक्नीमी।
14 गो इ कली रीब पा ग्रुम्नुङ, दे आस पाइनुङ। मिनु इ कली ओदेंशो अरेतीक लोव़ मारदे ब्रेक्ताक्ङ देंशा हना,
15 गो नोले दुम्ती हना, परमप्रभु यावे आ खिं ङा मुरपुकी दोपा बाक्चा माल्नीमी, मेको तुइक्तमेक्ल। मेकोपुकी ब्रोंइचा गेब परमप्रभु यावे आ ग्रुम्तीक खिं ङा मुर बाक्नीम। मेको थमा लोव़ ङा थाम नु बोल्यो हिरशो गारो खोदेंशो बाक्नीम। एफिसी २:१९-२२
16 इं परमप्रभु यावे कली थमा सुइक्तीके थम ख्रुइश्शो बाक्ब। मेको मार बाक्ब देंशा हना “मेको मुर दुम्शा, रागीमी जरमेसाक्व। परमप्रभु यावे आ सोक्तीमी ‘परमप्रभु यावे आ तौ बाक्ब’ दे सांकछी गेप्तु। परमप्रभु यावे आ स्वर्ग ङा गेय पाइबपुकीमी मेको कली ताम्तेक्म। आ नें मार बाक्बा, दे रागी रागी ङा मुर आन कली शेंताक्मे। रागी रागी ङा मुरपुकीम मेको कली थमा सुइक्तेक्म। मिनु मेको परमप्रभु यावे आ छेङछेङमी लाइक्चा पुंइसाक्व” देंशो बाक्ब। यूहन्ना १:१४; रोमी १:४; प्रेरित २८:२८; मर्कूस १६:१९; एफिसी १:२०-२१