1 Samuel 14 in Sunwar
1 काबु सावल आ तौ योनाथनमी, आ या कुरब कली “पिवो, गो लां ख्रोइश्शा, पलिस्ती आन बाक्तीक लस” देंमाक्त। तन्न मेकोमी मेको लोव़ आ आफ कली मशेंदा बाक्त।
2 मेना सावल गिबा सहर क्येङा लाङगा मिग्रोनम बाक्शो अनार रवा आ पुंमी बाक्शो बाक्माक्त। मेको नु ६ सहे मुर ला बाक्मा बाक्त।
3 मिनु परमप्रभु यावे कली चढ़ेब एली आ तौ फिनेहास, फिनेहास आ तौ अहीतुब नु आ लोक्ब इकाबोद मेकेर बाक्मा बाक्त। अहीतुब आ तौ अहीयाह शिलोमी चढ़ेब बाक्शा, निसाफ पतीक ऊरीम नु थुम्मीम बाक्शो झोला यो फेक्शो बाक्माक्त। मेको मुरपुकीमी योनाथन पलिस्ती आन बाक्तीके लशो, मतुइक्तमे बाक्त। २सामुएल ८:१७; १सामुएल ४:१९-२१ प्रस्थान २८:६-३०
4 मिनु योनाथन पलिस्ती आन बाक्तीक लतीक लांमी ठेयब सेरथे फुल्लु निक्शी बाक्सा बाक्त। का एर गे नु अर्को ओंथ गे बाक्सा बाक्त। का आ नें बोसेस नु अर्को आ नें सेनेह बाक्माक्त।
5 मेको का उत्तर मिकमाश गे नु का दक्खिन गेबा गे बोक्शो बाक्सा बाक्त।
6 योनाथनमी आ या कुरब कली “पिवो, गो मेको ख्रोइक्तीक चिनु मख्रोइश्शो आन बाक्तीक लस। परमप्रभु यावेमी वारच पाइबा, कों? परमप्रभु यावेमी शुश मुर बाक्तेक्म हना यो, इच्का ला बाक्तेक्म हना यो, इं कली प्रोंइने चाप्ब” दे मदा बाक्त। न्यायाधीस ७:७; २इतिहास १४:१०
7 मेको आ या कुरबमी “गे मार पचा दाक्नीनी, पने। गे मार पाइनीनी गो मेको वारच पाइनुङ” देंमाक्त।
8 मिनु योनाथनमी “दुम्ब, गो आइक्ची गे लस। मिनु पलिस्ती आन कली तपांइसस।
9 मिनु मेकोपुकीमी इस कली ‘गो मजाक्का सम्म रिम्दीस’ देंतेक्म हना, गो मेकेर राप्शा बाक्स। गो मेको आन बाक्तीके मलस।
10 तन्न मेकोपुकीमी ‘आंइ बाक्तीक कुस जाक्कीन’ देंतेक्म हना, गो इर ङोइश्शा लस। मारदे हना परमप्रभु यावेम मेको आन कली इस गुइमी गेशो बाक्माक्त, दे तुइक्नस। मेको गो इस कली चिन्ड बाक्ब” देंमाक्त।
11 मोपतीके मेको निक्शी पलिस्ती आन कली तपांइससा बाक्त। मिनु पलिस्तीपुकीम “कोव़ङीन। हिब्रू आन ख्रुइक्तीक पोव़ला रे ग्रूमा बाक्त” देंमुमा बाक्त।
12 मिनु पलिस्तीपुकीमी योनाथन नु आ या कुरब आस कली “गो आंइ बाक्तीक गे ङोइश्शा कुस। गो इस कली मारेइ कोंइनीकी” देंमा बाक्त। मिनु योनाथनमी आ या कुरब कली “आं नोले कुवो। परमप्रभु यावेम मेको आन कली इस्राएली आन गुइमी जिम्मा गेशो बाक्त” दे मदा बाक्त।
13 मिनु योनाथन गुइ खोइल थेक्शा ङोंइसे बाक्त। मिनु मेको या कुरब आ नोले कुमाक्त। मिनु मेको पलिस्ती योनाथन आ ङोंइती गोल्मा बाक्त। मिनु मेको आ नोले जाक्ब आ या कुरबमी मेको आन कली सदा बाक्त।
14 मेको ङोंइती ङा लडाइमी योनाथन नु आ या कुरबम २० जना खोइ सदसे बाक्त। मेको साइक्तीके रू ४ रोपानी खोदेंशो पा दिंम का बाक्माक्त।
15 मिनु नोले पलिस्तीपुकी शुश हिंमा बाक्त। मिनु लाङगा मेर बाक्ब मुर नु अरु मुर नेल्ल ख्रिंख्रि पा हिंमा बाक्त। आन ठेयब मुर नु रोइक्ब नेल्ल शुश हिंमा बाक्त। मिनु ख्रिनु कुशा ठेयब खल्बल दुम्माक्त। १सामुएल ७:१०
16 मिनु बेन्यामीन आ गिबाम खाल पाइब सावल आ मुरपुकीम पलिस्ती आन हुल खल्बल पा एर ओंथ दोरशो तामे बाक्त।
17 मिनु सावलमी सु सु मबाक्मा, दे हिक्पाइक्मी बाक्त। मिनु मेकोपुकीमी योनाथन नु आ या कुरब मबाक्शो तुइक्तमे बाक्त।
18 मिनु सावलमी अहीयाह कली “परमप्रभु आ कबल पशो सन्दोस एक चाक्को” देंमाक्त। मेना परमप्रभु आ कबल पशो सन्दोस इस्राएलीपुकी नु बाक्माक्त। १सामुएल २१:१०
19 मिनु सावलम लोव़ पन पना पलिस्ती आन बाक्तीक ङा खल्बल ठेयब दुम्ना दुम्न लमाक्त। मिनु मेकोमी चढ़ेब कली “याम का रिम्दो” देंमाक्त।
20 मिनु सावल नु आ मुरपुकी रेयके पना पन लडाइ पतीक गे लमा बाक्त। मेना आन जोरी सत्रु ब्रशा आंम आंमा साइक्मुशो तामे बाक्त। न्यायाधीस ७:२२; २इतिहास २०:२३
21 मेना सम्म हिब्रूपुकी पलिस्ती नु बाक्मा बाक्त। मेकोपुकीमी यो पलिस्ती आन बाक्तीकेम बाक्शा यो, इस्राएली आन गे लशा सावल नु योनाथन आस कली वारच पदमे बाक्त।
22 एफ्राइम आ पहाडीम बाक्शो प्रोक्शो इस्राएलीपुकीमी पलिस्ती प्रोक्शो लोव़ नेंन्मे बाक्त। मिनु मेकोपुकी यो गारशा पलिस्ती आन कली खेदा पामे बाक्त।
23 मेको नाक्ती परमप्रभु यावेमी इस्राएली आन कली ग्रापदा बाक्त। मिनु मेको लडाइ बेथ-आवेन आ आइक्ची सम्म दुम्माक्त। सावल आ लडाइ पाइब १० हजार खोइ दुम्मा बाक्त। मेको लडाइ एफ्राइम ङा पहाड नेल्लेम दुम्माक्त।
24 मेको नाक्ती सावलमी ममिम्थु, गेय पवा बाक्त। मेकोमी मुर आन कली “गो आं जोरी सत्रु आन कली क्येक्क लेन्ने मथुमु सम्म, सुम नाक्दो दुम्चा क्येङा ङोंइती जाइबा, मेको सराप रल” देंशा कसम जपाइक्मी बाक्त। मोपा मेको नाक्ती इस्राएली थाम्पा दशो बाक्मा बाक्त। सुइमी मारेइ मजामे बाक्त।
25 मिनु मेकोपुकी ब्वाकीम जाक्मानु, सुरब खुदो चाका तामे बाक्त।
26 तन्न मेकोपुकीम मेकेर खुदो याप्शो तशा यो, कसम जतीके सुइमी खुदो थिसीन मथीमे बाक्त।
27 तन्न आ आफोम मुर आन कली कसम जपाइश्शो नु मजचा देंशो योनाथनमी मनेंशो बाक्माक्त। मेकोमी आ गुइमी बाक्शो कोक्के दिंशा, मेको आ ङरीमी थोक्शा तुक्गा बाक्त। मिनु आ सक्ति बारमाक्त।
28 तन्न लडाइ पाइब कामी मेको कली “इन आफोमी मो पचा मदुम्ब देंशो बाक्ब” देंमाक्त। मेकोमी “मुलाक्त जचा थोव़क जाइब सराप रल देंशो बाक्ब” देंमाक्त। मुरपुकी चहिं शोव़लुम बेक्चशो बाक्मा बाक्त।
29 मिनु योनाथनमी “आं आफोमी मुर आन कली श्येत गेतीक गेय ङा लाक्शा अरु मपशो बाक्ब। कोव़ङीन गो एको खुदो थाम्शा दोशो सक्ति पाइश्शो दुम्ङा।
30 मुरपुकीम जोरी सत्रु रे रोइश्शो मार मार जचा तशो नम हना, गिश रिम्शो दुम वा। पलिस्ती आन कली यो शुश साइक्ने चबेम वा” देंमाक्त।
31 मेको नाक्ती मेकोपुकीम पलिस्ती आन कली ग्रामा बाक्त। मिनु मेको आन कली मिकमाश रे आइयालोन सम्म खेदा पामे बाक्त। मिनु मोपा लडाइ पाइबपुकी शुश दमा बाक्त।
32 तन्न मुरपुकी शोव़लुम बेक्चा चिक्शा, मार मार रोइक्चा गोव़मे बाक्त। मोपा भेडा बी ब्यफ नु बाछा ग्याइक्तमे बाक्त। मिनु खपीमीन साइश्शा हुश सुन्दा ब्वामे बाक्त। लेवी ३:१७
33 मुरपुकीम हुश सुन्दा श्ये ब्वशा “परमप्रभु यावे कली पाप पाम्तेक्म” दे मुरुमी सावल कली शेंदमे बाक्त। मिनु सावलमी “एको दा थम मरिम्शो दुम्त। ठेयब फुल्लु का लोक्शा एक चाक्कीन” देंमाक्त।
34 मिनु सावलमी मेको मुर कली “मुर आन दातेमी लशा ‘ग्याइश्शो ब्यफ नु भेडापुकी एक चाक्शा ब्वामेक्ल। मिनु हुश सुन्दा ब्वशा परमप्रभु यावे कली पाप मपामेक्ल’ देनो” देंमाक्त। मिनु मेको नाक्दो आन ग्याइश्शो ब्यफ खुल्शा जाक्शा मेकेर सदमे बाक्त।
35 मोपा सावलमी परमप्रभु यावे कली चढ़ेतीक का सेला बाक्त। मेको सावलम परमप्रभु यावे कली सेल्शो नेल्ल क्येङा ङोंइती ङा चढ़ेतीक बाक्माक्त।
36 मिनु सावलमी “मुल गो उइ लशा पलिस्ती आन कली नाक्दो लडाइ तोय। मिनु नां सोव़म सम्म मेको आन मारेइ मारेइ रोइक्तय। मेको आन कली का यो महेंदय” देंमाक्त। मिनु मुरपुकीम “गे मार पचा दाक्नीनी मेको पने” देंमा बाक्त। मिनु चढ़ेबमी “गो ङोंइती परमप्रभु नु सल्ला पय” देंमाक्त।
37 मिनु सावलमी परमप्रभु कली “मार गो पलिस्ती आन कली खेदा पका? गे मेको आन कली इस्राएली आन गुइमी गेनीनी?” दे हिल्लो पवा बाक्त। तन्न परमप्रभुमी मेको कली मारेइ लोव़ मलेत्ता बाक्त। १सामुएल १४:१८; १सामुएल २३:९-१२
38 मिनु सावलम “इस्राएल ङा ठेयब मुर नेल्ल आं ङोंइती जाक्कीन। मिनु मुलाक्त मार पाप दुम्मे तुइक्चा माल्ताक्व।
39 परमप्रभु यावे ब्रोंइशा बाक्शो खोदेंशो पा नु इस्राएल श्येत रे प्रोंइब, गो मेको आ नेंम कसम जशा देंनुङ, आं तौ योनाथनम मेको पाप पशो बाक्त हना यो, मेको कली साइक्चा माल्ब” देंमाक्त। मिनु सुइमी मेको कली लोव़ मलेत्मे बाक्त।
40 मिनु मेकोम इस्राएली नेल्ल आन कली “गे नेल्ल का पटटी बाक्कीन। गो नु आं तौ योनाथन का पटटी बाक्नस्कु” देंमाक्त। मिनु मुरपुकीम “गे मार पचा दाक्नीनी मेकोन पने” देंमा बाक्त।
41 मिनु सावलमी परमप्रभु यावे, इस्राएली आन परमप्रभु कली “मुलाक्ती गे इन गेय पाइब कली मारदे लोव़ मलेत्तीनी? मेको दोस गो नु आं तौ योनाथन नु बाक्त हना यो, तुइक्पतीन” देंमाक्त। परमप्रभु यावे, इस्राएली आन परमप्रभु गे ऊरीम कोंइदीन। तन्न इन मुर दोस ताइब बाक्नीम हना, थुम्मीम कोंइदीन। मिनु मेको मो पामे नोले योनाथन नु सावल आस नेंम ग्रूमाक्त। मुरपुकी चहिं ब्रोंइमा बाक्त। १सामुएल २८:६; प्रस्थान २८:३०; गन्ती २७:२१; ब्यवस्था ३३:८
42 मिनु सावलमी “गो नु आं तौ योनाथन आंस दातेमी ऊरीम आपीन” देंमाक्त। मिनु योनाथन आ नेंम ग्रूमाक्त।
43 मिनु सावलमी योनाथन कली “गे मार पवी आं कली देनो” दे हिल्लो पवा बाक्त। मिनु योनाथनमी “थमा पा गो आं कोक्के आ ङरीमी इच्का खोइ खुदो थाम्ता। गो एक बाक्ती, गो बेक्चा कली ठीक बाक्नुङ” देंमाक्त। यहोसु ७:१९
44 मिनु सावलमी योनाथन बेक्चान माल्ब, दे कसम जवा बाक्त।
45 तन्न मुरपुकीम सावल कली “मार, योनाथन सांइसीबा? मेको योनाथनमी ओमो ठेयब गेय पा इस्राएल कली मग्रापदा? मोदेंशो मदुम्ल। गेना हना यो ब्रोंइशा बाक्ब परमप्रभु यावे आ नेंमी गो कसम जशा देंनीकी, मेको के चां का यो महेम्ल। मारदे हना मेकोम मुलाक्ती परमप्रभु नु गेय पशो बाक्ब” देंमा बाक्त। मोपा मुरपुकीम योनाथन कली प्रोन्मे बाक्त। मिनु मेको मसांइसे बाक्त।
46 मिनु सावलमी पलिस्ती आन कली खेदा पचा प्रोना बाक्त। मिनु पलिस्ती आन खिं लेम्मा बाक्त।
47 मिनु सावलमी इस्राएलमी आ सासन पतीके बोल्यो सेल्ने थुमा बाक्त। मिनु मेकोमी मोआबी, अम्मोनी, एदोमी, सोबाह ङा पिपपुकी नु पलिस्ती आंम एर ओंथ ङा जोरी सत्रु नु लडाइ पवा बाक्त। मेकोपुकी ते ते लमा मेक मेक ग्रामा बाक्त।
48 मेकोमी अमालेकी आन कली ग्रामा बाक्त। मिनु इस्राएली आन कली रोइक्ब हुल आन रे प्रोना बाक्त।
49 सावल आ तौपुकी योनाथन, इश्वी नु माल्कीशुआ बाक्मा बाक्त। मेको आ ङोंइती जरमेशो तमी आ नें मेराब नु अर्को के मिकाल बाक्माक्त। १इतिहास ९:३९
50 मेको आ मीश चहिं अहीमाज आ तमी अहीनोआम बाक्माक्त। मेको आ लडाइ पाइब आन कप्तान मेको आ बकान्छा नेर आ तौ आब्नेर बाक्माक्त। १सामुएल १७:५५
51 सावल आ आफ कीश नु आब्नेर आ आफ नेर अबीएल आ तौ बाक्सा बाक्त। १इतिहास ९:३६,३९
52 सावल आ पालाम पलिस्तीपुकी नु लडाइ दुम्स ङा दुम्स दुम्माक्त। मेकोमी आ थिश्शो बोल्यो नु सक्ति पाइश्शो मुर आ गेय पचा कली लाइक्बाक्माक्त।