1 Chronicles 23 in Sunwar
1 मिनु दाऊद खूशो नु शुश बर्स दुम्शा, आ तौ सोलोमन कली इस्राएल ङा पिप सेला बाक्त। १राजा १:२८-४०
2 मिनु मेकोमी इस्राएली आन ठेयब मुर नेल्ले नु चढ़ेबपुकी नु लेवी आन कली ग्रुम्पाइक्मी बाक्त।
3 मिनु ३० बर्स गाप्शो नु मेको क्येङा लाक्शो लेवी आन कली हिक्शोनु, मेको नेल्ल ३८ हजार बाक्मा बाक्त।
4 मिनु दाऊदमी लेवी आन पर्बम “मेको आन दाते ङा २४ हजार परमप्रभु यावे आ खिं ङा गेय कोव़चा माल्नीम। ६ हजार मेको आन ठेयब मुर नु निसाफ पाइब दुम्चा माल्नीम।
5 मिनु ४ हजार लाप्चो खाल पाइब दुम्चा माल्नीम। मिनु नोले ङा ४ हजार आं गेशो बाजापुकी ताप्शा, परमप्रभु यावे कली ठेयब सेल्तीक कुम्सो पचा माल्नीम” देंमाक्त।
6 मिनु दाऊदम मेको आन कली लेवी आ तौ गेरशोम, कोहाथ नु मेरारी का का पा हुल पा योक्शा गेमी बाक्त। १इतिहास ६:१
7 गेरशोम आ तौ लादान नु शिमेइ बाक्सा बाक्त।
8 लादान आ ङोंइती थिशो तौ येहीएल ठेयब मुर बाक्माक्त। आ नोले ङा जेथाम नु योएल नेल्ल पा सां बाक्मा बाक्त। १इतिहास २६:२१
9 शिमेइ आ तौ शेलोमोथ, हजीएल नु हारान सां बाक्मा बाक्त। मेकोपुकी लादान आ खिं ङा ठेयब मुर बाक्मा बाक्त।
10 मिनु शिमेइ आ तौ याहाथ, जीना, येऊश नु बेरीआ, ४ जना बाक्मा बाक्त।
11 याहाथ मेको आन ठेयब मुर बाक्माक्त। मेको आ नोले ङा जीजाह बाक्माक्त। तन्न येऊश नु बेरीआ आस के शुश तौ मबाक्तीके मेको आस कली खिं का ङा मुर हुल का सेल्शा हिक्चा पुंइसमा बाक्त।
12 कोहाथ आ तौ अम्राम, इच्हार, हेब्रोन नु उज्जीएल ४ जना बाक्मा बाक्त।
13 अम्राम आ तौ हारून नु मोसा बाक्सा बाक्त। हारून नेल्ल क्येङा चोव़खो चढ़ेतीक गेय पाइब सेल्चा कली योव़चा पुंइसे बाक्त। मेको नु आ तौपुकी गेना हना यो परमप्रभु यावे आ ङोंइती चढ़ेचा माल्दमे बाक्त। परमप्रभु आ ङोंइती गेय पचा कली नु आ नेंमी गेना हना यो आसीक गेचा कली योव़शो बाक्मा बाक्त। १इतिहास ५:२९; १इतिहास ६:३४; ब्यवस्था १०:८; गन्ती ६:२४-२७
14 मोसा परमप्रभु आ मुर बाक्शो बाक्माक्त। मेको नु आ तौपुकी अरु लेवी आ थर ङा मुर खोदेंशो पा हिक्शो बाक्मा बाक्त।
15 मोसा आ तौ गेरशोम नु एलीएजर बाक्सा बाक्त। प्रस्थान १८:३-४
16 गेरशोम आ तौ शेबुएल ठेयब मुर का बाक्माक्त। मेको ङोंइती ङा बाक्माक्त। १इतिहास २६:२४
17 एलीएजर आ तौ रेहब्याह ठेयब मुर बाक्माक्त। मेको एलीएजर आ तौ का ला बाक्माक्त। तन्न रेहब्याह के तौ शुश बाक्मा बाक्त। १इतिहास २४:२१-३०
18 इच्हार आ तौ शेलोमीथ ठेयब मुर बाक्माक्त।
19 हेब्रोन आ तौ येरीयाह ठेयब मुर बाक्माक्त। मेको आ माइला अमारयाह, आ साइला याहासीएल, नु आ कान्छा येकामेआम बाक्मा बाक्त।
20 उज्जीएल आ तौ मीकाह ठेयब मुर बाक्माक्त। मेको आ नोले ङा तौ इस्शीयाह बाक्माक्त।
21 मेरारी आ तौ माहली नु मुशी बाक्सा बाक्त। माहली आ तौ एलाजर नु कीश बाक्सा बाक्त। १इतिहास ६:४
22 एलाजर तौ मथिथु बेक्माक्त। मेको के तमीपुकी ला बाक्मा बाक्त। मेको आ लोक्ब कीश आ तौपुकीमी मेको आन कली ग्युंबे पामे बाक्त।
23 मुशी आ तौपुकी माहली, एदेर नु येरेमोथ सां बाक्मा बाक्त।
24 मेको लेवी आ थर ङा खिं खिं ङा मुर बाक्मा बाक्त। मेको खिं खिं ङा २० बर्स गाप्शो नु मेको क्येङा लाक्शो बाक्मा बाक्त। मेको आन कली हिक्शा, आन नें ब्रेक्शो बाक्मा बाक्त। मारदे हना मेकोपुकी परमप्रभु यावे आ खिंम गेय पचा माल्बाक्मा बाक्त।
25 मिनु दाऊदमी “परमप्रभु यावे, इस्राएली आन परमप्रभुमी आ मुर आन कली थुं नाइक्चा गेशो बाक्ब। मिनु परमप्रभु यरूसलेम सहरम गेना हना यो बाक्ब।
26 मोपतीके मुल रे लेवी आ थर ङा मुरपुकी परमप्रभु यावे आ बाक्तीके नु मेको आ मार मार ग्योंबपुकी गेनायो कुरचा ममाल्नीम” देंमाक्त। योएल ४:२१
27 दाऊद आ नोले देंशो लोव़ रे पा मेको २० बर्स गाप्शो नु मेको क्येङा लाक्शो लेवी आ थर ङा मुर हिक्चा बाक्मा बाक्त।
28 मेकोपुकीमी हारून आ तौ परमप्रभु यावे आ खिं ङा गेय पतीकेम वारच पचा माल्मा बाक्त। लाङगा नु कोठापुकी कोव़चा, चोव़खो थोव़कपुकी सफा पचा, परमप्रभु आ खिं ङा अरु गेय नेल्ल पचा माल्बाक्मा बाक्त।
29 मिनु मेकोपुकीमी चढ़ेशो शोब्ले वोइक्चा कली, अन्न चढ़ेतीक ङा रिम्शो फसी, बोरब ओख्ती मसुप्शो शोब्ले, तेल ब्वाइश्शो चढ़ेतीक, नेल्ल नाक्तीक गेयम वारच पचा माल्बाक्मा बाक्त।
30 मिनु मेकोपुकी सुनी कुस कुस नु नाक्दो कुस कुस परमप्रभु यावे आ ङोंइती “गे रिम्शो पाइब बाक्नीनी” दे ठेयब सेल्चा माल्बाक्मा बाक्त।
31 नाइक्तीक नाक्त परमप्रभु यावे कली चोशो चढ़ेतीक चढ़ेचा कली, औंसी नाक्त नु नेल्ल पचा ङा चाड ङा चढ़ेतीके गेय परमप्रभु यावे आ ङोंइती वारच पचा माल्बाक्मा बाक्त।
32 मोपा मेकोपुकीमी ग्रुम्तीक ताम्बु नु चोव़खो बाक्तीक नेल्ल कोव़चा माल्मा बाक्त। मिनु मेकोपुकीमी हारून आ तौ चच आन दी बाक्शा परमप्रभु यावे आ खिं ङा गेय पचा माल्बाक्मा बाक्त।