Matthew 21 in Marathi

1 येशू व त्याचे शिष्य यरुशलेमेजवळ आले असता ते जैतूनाचा डोंगराजवळ बेथफगे या जागी थांबले. नंतर येशूने त्याच्या दोन शिष्यांना पाठवले,

2 त्यांना असे सांगितले की, “तुम्ही समोरच्या गावात जा.आणि लागलीच एक गाढवी बांधलेली व तिच्याबरोबर एक शिंगरु असे तुम्हाला आढळेल. त्यांना सोडून माझ्याकडे घेऊन या.

3 जर कोणी तुम्हाला काही विचारले, तर त्याला सांगा की, ‘प्रभूला यांची गरज आहे. तो ती लगेच माझ्याकडे पाठवील.’

4 हे यासाठी घडले की संदेष्ट्यांच्या द्वारे जे सांगितले होते ते पूर्ण व्हावेः ते असे की,

5 “सीयोनेच्या कन्येला सांगा, पाहा, ‘तुझा राजा! लीन होऊन गाढवावर म्हणजे गाढवीच्या शिंगरावर बसून तुझ्याकडे येत आहे.”

6 तेव्हा शिष्यांनी जाऊन येशूच्या आज्ञेप्रमाणे केले.

7 शिष्यांनी गाढवी व शिंगरू आणून त्यांनी त्यावर आपले अंगरखे घातले आणि येशू त्यावर बसला.

8 पुष्कळ लोकांनी आपले अंगरखे वाटेवर अंथरले. दुसऱ्यांनी झाडांच्या फांद्या तोडल्या आणि त्या रस्त्यावर पसरल्या.

9 येशूच्या पुढे चालणारा लोकसुदाय आणि मागे चालणारे. मोठ्याने जयघोष करू लागले, “ दाविदाच्या पुत्राला होसान्ना. ‘प्रभूच्या नावाने येणारा धन्यवादित अाहे.’ परम उंचामध्ये होसान्ना!”

10 जेव्हा येशूने यरुशलेमेमध्ये प्रवेश केला तेव्हा संपूर्ण शहर गजबजून निघाले व लोक विचारत होते, “हा कोण आहे?”

11 जमावाने उत्तर दिले, “हा गालीलातील नासरेथातून आलेला, येशू संदेष्टा आहे.”

12 मग येशूने मंदिराच्या आवारात प्रवेश केला तेव्हा तेथे जे लोक विक्री व खरेदी करीत होते त्या सर्वाना बाहेर घालवून दिले. पैश्याचा व्यवहार करणाऱ्यांची मेजे आणि कबुतरे विकणाऱ्यांच्या बैठकी उलथून टाकल्या.

13 तो त्यांना म्हणाला, असे लिहिले आहे, ‘माझ्या घरास प्रार्थनेचे घर म्हणतील. पण तुम्ही त्याला लुटारुंची गुहा केली आहे.’

14 मग आंधळे आणि पांगळे लोक त्याच्याकडे मंदिरांत आले. आणि त्यांना त्याने बरे केले.

15 परंतु जेव्हा मुख्य याजक व नियमशास्त्राचे शिक्षक ह्यांनी येशूने केलेल्या आश्चर्यकारक गोष्टी आणि मंदिराच्या आवारात लहान मुलांना, “दाविदाच्या पुत्राला होसान्ना.” अशी घोषणा देताना पाहिले, तेव्हा त्यांना संताप आला.

16 त्यांनी त्याला विचारले, “ही मुले काय म्हणत आहे हे तुम्ही ऐकता ना?”येशूने त्यांना उत्तर दिले, “होय!परंतु ‘तू बालके व तान्हुली ह्यांच्या मुखातून स्तुती पूर्ण करवली आहे. हे तुमच्या वाचण्यात कधी आले नाही काय?

17 नंतर येशू त्यास सोडून नगराबाहेर बेथानीस गेला. तो रात्रभर तेथे राहिला.

18 दुसऱ्या दिवशी सकाळी तो नगराकडे पुन्हा येत असता त्याला भूक लागली.

19 रस्त्याच्या कडेला त्याला अंजीराचे एक झाड दिसले. ते पाहून तो जवळ गेला. पण पानाशिवाय त्याला एकही अंजीर दिसले नाही. येशू त्या झाडाला म्हणाला, “यापुढे तुला ,सर्वकाळ फळ न येवो!” आणि ते झाड लगेच वाळून गेले.

20 शिष्यांनी हे पाहिले, तेव्हा त्यांना फार आश्चर्य वाटले. त्यांनी विचारले, “हे अंजीराचे झाड इतक्या लवकर वाळून कसे गेले?

21 येशू त्यांना म्हणाला, “मी तुम्हाला खरे सांगतो, जर तुम्हाला विश्वास असेल, आणि तुम्ही संशय धरला नाही तर मी जे अंजीराच्या झाडाबाबतीत केले तेच नव्हे, तर या डोंगराला उपटून समुद्रात पड असे म्हणालात तरी ते घडेल.

22 जर तुमचा विश्वास असेल तर जे काही तुम्ही प्रार्थनेत विश्वासाने मागाल ते तुम्हाला मिळेल.”

23 येशू मंदिरात गेला, येशू तेथे शिक्षण देत असताना मुख्य याजक व वडीलजन येशूकडे आले. ते येशूला म्हणाले, “तुम्ही कोणत्या अधिकाराने या गोष्टी करता? हा अधिकार तुम्हाला कोणी दिला?”

24 येशू म्हणाला, “मी सुध्दा तुम्हाला एक प्रश्न विचारतो. जर तुम्ही मला उत्तर दिले तर मी कोणत्या अधिकाराने या गोष्टी करतो, हे मी तुम्हाला सांगेन.

25 योहानाचा बाप्तिस्मा कोठून होता?. स्वर्गाकडून की मनुष्यांकडून?येशूच्या या प्रश्नावर ते चर्चा करू लागले. ते म्हणाले, योहानाचा बाप्तिस्मा देवाकडून होता असे म्हणावे तर येशू म्हणेल, ‘मग तुम्ही त्याच्यावर विश्वास का ठेवला नाही?’

26 पण जर तो मनुष्यांकडून होता असे आपण म्हणालो आपल्याला लोकांची भीती आहे. कारण योहान हा एक संदेष्टा होता असे ते सर्व जण मानतात.”

27 म्हणून त्यांनी येशूला उत्तर दिले, “ आम्हाला माहीत नाही.”तेव्हा येशू म्हणाला, “तर मग मी कोणत्या अधिकाराने या गोष्टी करतो, हे मीही तुम्हाला सांगणार नाही.

28 “याविषयी तुम्हाला काय वाटते ते मला सांगा. एका मनुष्याला दोन मुलगे होते. तो आपल्या पहिल्या मुलाकडे गेला आणि म्हणाला, ‘माझ्या मुला, आज तू द्राक्षाच्या मळ्यात जा आणि काम कर.’

29 “मुलाने उत्तर दिले, ‘मी जाणार नाही.’ परंतु नंतर त्या मुलाने मन बदलले व तो गेला.

30 “नंतर वडील आपल्या दुसऱ्या मुलाकडे गेले आणि म्हटले, ‘माझ्या मुला, आज तू जाऊन माझ्या द्राक्षाच्या मळ्यात काम कर.’ त्या मुलाने उत्तर दिले, ‘होय बाबा, मी जातो.’ पण तो गेला नाही.

31 “त्या दोघांपैकी कोणत्या मुलाने वडीलांची आज्ञा पाळली?”ते म्हणाले, “पहिल्या मुलाने.”येशू त्यांना म्हणाला, “मी खरे सांगतो, जकातदार व वेश्या तुमच्या अगोदर स्वर्गाच्या राज्यात जातील.

32 कारण योहान नीतिमत्वाच्या मार्गाने तुम्हाकडे आला. परंतु तुम्ही त्यावर विश्वास ठेवला नाही.पण जकातदार व वेश्या यांनी त्यावर विश्वास ठेवला.आणि हे तुम्ही पाहिले पण तरी देखील तुम्ही आपले मन बदलण्यास आणि त्यावर विश्वास ठेवण्यास तयार झाला नाही.

33 “हा दुसरा दाखला ऐकाः एक मनुष्य होता, त्याचे शेत होते. त्याने आपल्या शेतात द्राक्षे लावली. त्याभोवती कुंपण घातले आणि द्राक्षरसाकरिता कुंड तयार केले . आणि माळा बांधला. मग त्याने आपला मळा काही शेतकऱ्यांना खंडाने करायला दिला. मग तो दुसऱ्यादेशी निघून गेला.

34 जेव्हा द्राक्षे तोडणीचा हंगाम जवळ आला, तेव्हा त्या मनुष्याने आपला वाटा आणण्याकरिता काही नोकर शेतकऱ्याकडे पाठवले.

35 “परंतु शेतकऱ्यांनी त्यांच्यावर हल्ला केला. एकाला मार दिला तर दुसऱ्या नोकराला जिवे मारले. नंतर तिसऱ्याला दगडमार करून ठार केले.

36 मग शेतकऱ्यांकडे त्या मनुष्याने आणखी एकदा नोकर पाठवले. पहिल्यापेक्षा त्याने जास्त नोकर पाठवले पण त्या शेतकऱ्यांनी त्यांना तशीच वागणूक दिली.

37 नंतर, त्याने त्याच्या स्वतःच्या मुलाला त्यांच्याकडे पाठवले, तो म्हणाला, ‘निश्चितच ते माझ्या मुलाचा मान राखतील.

38 “पण जेव्हा शेतकऱ्यांनी त्याच्या मुलाला पाहिले तेव्हा ते एकमेकास म्हणू लागले, ‘हा तर मालकाचा मुलगा आहे. तो वारस आहे. चला आपण त्याला ठार करू व त्याचे वतन घेऊ.’

39 त्यांनी त्याला धरले व मळ्याच्या बाहेर फेकले व त्याला ठार मारले.

40 “मग द्राक्षमळ्याचा मालक परत येईल तेव्हा या शेतकऱ्यांचे काय करील?”

41 यहूदी मुख्य याजक आणि पुढारी म्हणाले, “तो त्या लोकांना खात्रीने मरणदंड देईल. कारण ते दुष्ट होते. नंतर तो आपला मळा दुसऱ्यास खंडाने देईल. हंगामाच्या दिवसात जे त्याच्या पिकाची वाटणी देतील, अशांना तो ते देईल.

42 येशू त्यांना म्हणाला, “तुम्ही वचनात कधी वाचले नाही काय? ‘बांधणाऱ्यांनी नाकारला दगड कोनशिला झाला आहे. हे प्रभूने केले आणि आमच्या दृष्टीने हे अद्भूत आहे.’

43 “म्हणून मी तुम्हाला सांगतो की, देवाचे राज्य तुमच्याकडून काढून घेण्यात येईल.आणि जे राष्ट्र त्यातली फळे देईल त्याला ते दिले जाईल.

44 (जो कोणी या दगडावर पडेल, त्याचे तुकडे तुकडे होतील परंतु जर हा दगड कोणावर पडेल तर त्याचा भुगाभुगा होईल.” )

45 येशूने सांगितलेले दाखले मुख्य याजकांनी आणि परूश्यांनी ऐकले. येशू त्यांच्याविषयी बोलत आहे हे त्यांनी ओळखले.

46 त्यांना येशूला अटक करायचे होते. पण त्यांना लोकांचे भय वाटत होते, कारण लोक येशूला संदेष्टा मानीत होते