Galatians 4 in Marathi

1 आता मी म्हणतो की, वारीस लहान बाळ आहे, तोपर्यत तो सर्वांचा धनी असूनही त्याच्यामध्ये व दासामध्ये काही भेद नसतो.

2 पण बापाने ठरवलेल्या मुदतीपर्यंत तो शिक्षकांच्या व कारभाऱ्याच्या स्वाधीन असतो.

3 आपण देखील बाळ असताना, आपण जगाच्या प्राथमिक शिक्षणाच्या दास्यात होतो.

4 पण काळाची पूर्णता झाली तेव्हा देवाने आपल्या पुत्राला पाठवले; तो स्त्रीपासून जन्मास आला, नियमशास्त्राधीन असा जन्मास आला,

5 ह्यात उद्देश हा होता की, नियमशास्त्राखाली असलेल्यांना त्याने खंडणी भरून सोडवावे; म्हणजे आपल्याला पुत्र होण्याचा हक्क मिळावा.

6 आणि तुम्ही पुत्र आहात म्हणून, देवाने‘अब्बा बापा,’ अशी हाक मारणाऱ्या आपल्या पुत्राच्या आत्म्याला तुमच्याआमच्या अंतःकरणात पाठवले आहे; ‘

7 म्हणून तू आतापासून दास नाहीस, तर पुत्र आहेस; आणि पुत्र आहेस, तर देवाच्याद्वारे वारीसहि आहेस.

8 तथापि पूर्वी तुम्ही देवाला ओळखीत नव्हता, तेव्हा, जे स्वभावतः देव नाहीत त्यांचे दास होता;

9 पण आता तुम्ही देवाला ओळखीत असताना, किंवा देव तुम्हाला ओळखीत असताना, तुम्ही त्या दुर्बळ, व निसत्व प्राथमिक शिक्षणाकडे पुन्हा कसे परत जाता आणि पुन्हा त्यांच्या दास्यात राहण्याची इच्छा करता?

10 तुम्ही दिवस, महिने, ऋतू, आणि वर्षे पाळता.

11 तुमच्यासाठी की, मी केलेले श्रम कदाचित व्यर्थ झाले असतील, अशी मला तुमच्यासंबंधी भीती वाटते.

12 बंधूंनो, मी तुम्हाला विनवणी करतो की, तुम्ही माझ्यासारखे व्हा, कारण मीहि तुमच्यासारखा होतो. तुम्ही माझे काहीच वाईट केले नाही.

13 प्रथम तुम्हाला सुवार्ता सांगण्याचा पहिला प्रसंग मला माझ्या शारीरीक व्याधीमुळें मिळाला हे तुम्हाला माहित आहे.

14 आणि माझ्या देहाच्या अशक्तपणात तुमची परीक्षा होत असता, तुम्ही तिरस्कार केला नाही. पण माझे देवाच्या दूतासारखा, ख्रिस्त येशूसारखा माझा स्वीकार केले.

15 तर तेव्हाचा तुमचा तो आशीर्वाद कोठे आहे? कारण, मी तुमच्याविषयी साक्ष देतो की, शक्य असते तर तुम्ही मला तुमचे स्वतःचे डोळे काढून दिले असते.

16 मग मी तुम्हाला खरे सांगतो म्हणून मी तुमचा वैरी झालो आहे काय?

17 ते लोक तुमच्याविषयी आवेशी आहेत तरी चांगल्या प्रकारे नाही. पण तुम्ही त्यांच्याविषयी आवेशी असावे म्हणून ते तुम्हाला आमच्यापासून वेगळे करू पाहतात.

18 तर चांगल्याविषयी सर्वदा आवेशी असणे हे चांगले, आणि मी तुम्हाजवळ प्रत्यक्ष आहे; तेव्हा मात्र आवेशी असावे असे नाही.

19 माझ्या मुलांनो, तुमच्यात ख्रिस्ताचे रूप निर्माण होईपर्यंत मला पुन्हा तुमच्यासाठी प्रसूतीवेदना होत आहेत.

20 ह्यावेळी मी तुमच्याबरोबर हजर असतो आणि आवाज चढवून बोलता आले असते तर मला बरे वाटले असते; कारण तुमच्याविषयी मी संशयात आहे.

21 जे तुम्ही नियमशास्त्राधीन व्हावयास पाहता ते तुम्ही नियमशास्त्र ऐकत नाही काय?हे मला सांगा.

22 कारण शास्त्रात असे लिहिले आहे की, अब्राहामाला दोन मुलगे होतेः एक दासीपासून व एक स्वतंत्र स्त्रीपासून झालेला.

23 पण दासीपासून झालेला देहस्वभावानुसार जन्मला होता; तर स्वतंत्र स्त्रीपासून झालेला वचनामुळे जन्मला.

24 ह्या गोष्टी दृष्टांतरूपाने समजावल्या जावू शकतात. त्या स्त्रिया दोन करारासारख्या आहेत एक सीनाय पर्वतावरून केलेला व दास्यासाठी मुलांना जन्म देणारा करार म्हणजे हागार होय.

25 कारण ही हागार अरबस्तानातील सिनाय पर्वत आहे; आणि ती हल्लीच्या यरुशलेमेच्या जोडीची आहे. आपल्या मुलांबाळांसह दास्यात आहे.

26 नविन वरील यरूशलेम स्वतंत्र आहे; ही आपल्या सर्वांची माता आहे.

27 शास्त्रात असे लिहिले आहे की, ‘अगे वंध्ये, तुला मूल होत नसले तरी, तू आनंदित हो! ज्या तुला प्रसूतिवेदना होत नाही, ती तू आनंदाने जयघोष कर! आनंदाची आरोळी मार! कारण जिला पती अाहे तिच्या मुलांपेक्षा,अशा सोडलेल्या स्त्रीची मुले पुष्कळ अधिक आहेत.’

28 आता बंधूंनो, इसहाकाप्रमाणें तुम्ही अभिवचनाची संतती आहा.

29 परंतु त्यावेळेस देहस्वभावानुसार जो जन्मला होता, त्याने जो आत्म्यानुसार जन्मलेल्या मुलाचा छळ केला, तसा आताहि होत आहे.

30 पण शास्त्रलेख काय सांगतो? ‘तू त्या दासीला व तिच्या मुलाला घालवून दे; कारण दासीचा मुलगा स्वतंत्र स्त्रीच्या मुलाबरोबर वारीस होणारच नाही.’

31 तर मग, बंधूंनो, आपण दासीची मुले नाही, पण स्वतंत्र स्त्रीची मुले आहोत.