Acts 17 in Marathi
1 नंतर ते अंफिपुली व अपुल्लोनिया ह्यांच्यामधून जाऊन थेस्सलनीकास गेले. तेथे यहूद्यांचे सभास्थान होते.
2 तेथे पौलाने आपल्या परिपाठाप्रमाणे त्याच्याकडे जाऊन तीन शब्बाथ त्यांच्याबरोबर शास्त्रावरून वादविवाद केला.
3 त्यांने शास्त्राचा उलगडा करून असे प्रतिपादन केले की, ख्रिस्ताने दुःख सोसावे व मेलेल्यांमधून पुन्हा उठावे ह्याचे अगत्य होते, आणि ज्या येशूची मी तुमच्यापुढे घोषणा करीत आहे तोच तो ख्रिस्त आहे.
4 तेव्हा त्याच्यापैकी काही जणांची खातरी होऊन पौल सीला ह्यांना येऊन मिळाले ; आणि भक्तिमान ग्रीक ह्यांचा मोठा समुदाय त्यांना मिळाला . त्यात प्रमुख स्त्रिया काही थोड्या थोडक्या नव्हत्या.
5 परंतु यहूद्यांनी हेव्याने आपणाबरोबर बाजारचे काही गुंड लोक घेऊन व घोळका जमवून नगरांत घबराट निर्माण केली , आणि यासोनाच्या घरावर हल्ला करून त्यांना लोंकाकडे बाहेर काढून आणण्याची खटपट करून पाहिली;
6 परंतु त्यांचा शोध लागला नाही तेव्हा त्यांनी यासोनाला व कित्येक बंधूना नगराच्या अधिकाऱ्यांकडे ओढीत नेऊन आरडाओरड करीत म्हंटले , ज्यांनी जगाची उलटापालट केली ते येथेही आले आहेत.
7 त्यास यासोनाने आपल्या घरात घेतले आहे, आणि हे सर्व जण कैसराच्या आज्ञेविरुध्द वागतात, म्हणजे येशू म्हणून दुसराच कोणी राजा आहे असे म्हणतात.
8 हे ऐकवून त्यांनी लोकास व शहराच्या आधिकाऱ्यास खवळून सोडले.
9 मग त्यांनी यासोनाचा व इतरांचा जामीन घेऊन त्यांना सोडून दिले.
10 नंतर बंधुजनांनी पौल, व सीला ह्यांना लागलेच रातोरात बिरुयास पाठवले. ते तेथे पोहचल्यावर यहुदयांचे सभास्थानात गेले.
11 तेथील लोक थेस्लनिकांतल्या लोंकापेक्षा मोठया मनाचे होते; त्यांनी मोठ्या उत्सुकतेने वचनाचा स्वीकार केला, आणि ह्या गोष्टी अशाच आहेत की काय ह्याविषयी ते शास्त्रात दररोज शोध करीत गेले.
12 त्यातील अनेकांनी व बऱ्याच प्रतिष्ठित ग्रीक स्त्रिया व पुरूष ह्यांनी विश्वास ठेवला.
13 तरीपण पौल देवाचे वचन बिरुयातही सांगत आहे हे थेस्सलनीकांतल्या यहुदयांना समजले तेव्हा त्यांनी तिकडेही जाऊन लोकांना खवळून चेतविले.
14 त्यावरून बंधुजनांनी पौलाला समुद्राकडे जाण्यास लागलेच पाठवले ; आणि सीला व तीमथ्य हे तेथेच राहीले.
15 तेव्हा पौलाला पोहचविणाऱ्यांनी त्याला अथेनैपर्यंत नेले , आणि सिला व तीमथ्य ह्यांनी आपणाकडे होईल तितके लवकर यावे अशी त्यांची आज्ञा घेउन ते निघाले.
16 पौल अथेनैस त्यांची वाट पाहत असता, ते शहर मूर्तींनी भरलेले आहे असे पाहून त्याच्या मनाचा संताप झाला.
17 ह्यामुळे तो सभास्थानांत यहूदयांबरोबर व भक्तीमान लोकांबरोबर आणि बाजारात जे त्याला आढळत त्यांच्याबरोबर दररोज वाद घालीत असे.
18 तेव्हा एपिकूरपंथी व स्तोयिकपंथी ह्यांच्याबरोबर कित्येक तत्वज्ञांनी त्याला विरोध केला. कित्येक म्हणाले, हा बडबड्या काय बोलतो ? दुसरे म्हणाले, हा परक्या दैवतांची घोषणा करणारा दिसतो; कारण येशू व पुनरुत्थान हयाविषयीच्या सुवार्तेची तो घोषणा करीत असे.
19 नंतर त्यांनी त्याला धरून अरियपगावर नेऊन म्हंटले, तुम्ही दिलेली ही नवी शिकवण काय हे आम्हास समजून सांगाल काय ? कारण तुम्ही आम्हास अपरिचित गोष्टी ऐकवत आहा; हयाचा अर्थ काय हे समजून घ्यावे अशी आमची इच्छा आहे.
20 कारण तुम्ही आम्हास अपरिचित गोष्टी ऐकवित आहा; त्याचा अर्थ काय हे समजून घ्यावे अशी आमची इच्छा आहे.
21 काहीतरी नवलविशेष सांगितल्या ऐकल्याशिवाय सर्व अथैनेकर व तेथे राहणारे परके लोक ह्यांचा वेळ जात नसे.
22 तेव्हा पौल अरियपगाच्या मध्यभागी उभा राहून म्हणाला अहो अथेनैकरांनो, तुम्ही सर्व बाबतीत देवदेवतांना फार मान देणारे आहा असे मला दिसते .
23 कारण मी फिरता फिरता तुमच्या वस्तु पाहतांना , अज्ञात देवाला ही अक्षरे लिहिलेली वेदी मला आढळली ज्याचे तुम्ही अज्ञानाने भजन करता ते मी तुम्हास जाहीर करतो.
24 ज्या देवाने जग व त्यातले अवघे निर्माण केले तो स्वर्गाचा व पृथ्वीचा प्रभू असून हातांनी बांधलेल्या मंदिरात राहत नाही.
25 आणि त्याला काही उणे आहे, म्हणून माणसांच्या हातून त्याची सेवा घडावी असेही नाही; कारण जीवन प्राण व सर्व काही तो स्वतः सर्वांना देतो;
26 आणि त्याने एकापासुन माणसांची सर्व राष्ट्रे निर्माण करून त्यांनी पृथ्वीच्या संबध पाठीवर राहावे असे केले आहे ; आणि त्याचे नेमलेले समय व त्यांच्या वस्तीच्या सीमा त्याने ठरविल्या आहेत ,
27 अशासाठी की, त्यांनी देवाचा शोध करावा, म्हणजे चाचपडत चाचपडत त्याला कसे तरी प्राप्त करून घ्यावे.तो आपल्यापैकी कोणापासूनही दूर नाही;
28 कारण आपण त्याच्या ठायी जगतो, वागतो, व आहो तसेच तुमच्या कवीपैकीही कित्येकांनी म्हटले आहे की, आपण वास्तविक त्याचा वंश आहो.
29 तर मग आपण देवाचे वंशज असतांना मनुष्याच्या चातुर्याने व कल्पनेने कोरलेले सोने , रुपे किंवा पाषाण, हयांच्या आकृतीसारखा देव आहे असे आपल्याला वाटता कामा नये.
30 अज्ञानाच्या काळांकडे देवाने डोळेझाक केली, परंतु आता सर्वांनी सर्वत्र पश्चाताप करावा अशी तो माणसांना आज्ञा करतो.
31 त्याने असा एक दिवस नेमला आहे की, ज्या दिवशी तो आपण नेमलेल्या मनुष्याच्याव्दारे जगाचा न्यायनिवाडा नीतिमत्त्वाने करणार आहे; त्याने त्याला मेलेल्यातून उठवून ह्याविषयीचे प्रमाण सर्वास पटविले आहे.
32 तेव्हा मृतांच्या पुनरुत्थानाविषयी ऐकून कित्येक थट्टा करू लागले. कित्येक म्हणाले, ह्याविषयी आम्ही तुमचे पुन्हा आणखी ऐकू
33 इतके झाल्यावर पौल त्यांच्यामधून निघून गेला.
34 तरी काही माणसांनी त्यास चिटकून राहून विश्वास ठेवला; त्यांत दिओनुस्य अरिय-पगकर, दामारी नावांची कोणी स्त्री व त्यांच्याबरोबर इतर कित्येक होते.