Zechariah 9 in Maale
1 ናንጊና ናንጋ ጎዳ ሃድራኬ ዓጮና ዴማስቆ ካታሞናይዳ ሜቶ ዓጋንዳኔ፤ ዒስራዔኤሌ ፃጶ ሌሊቱዋንቴ ሶኦሪያኮ ዼኤፖ ካታማኣ ናንጊና ናንጋ ጎዳም ማዓንዳኔ።
2 ዬይ ሜታ ሃድራኬ ዓጮ ኮይላ ዓኣ ሃማቴና ሚርጌ ዔራቶ ዓኣ ፂሮሴና ሲዶና ካታሞይዳ ኬዳንዳኔ።
3 ፂሮሴ ፔና ካፓኒ፥ ዴይ ካፖ ዼጌ ቤሲ ዋርዲያ ማሂ ኮሼኔ፤ ሚርጉማ ዓጪጉዴ ሹቺ ቢራንታ ዎርቄንታኣ ቡኩሴኔ።
4 ጋዓንቴ ዒዛ ዬያ ቡኩሴ ባኮ ናንጊና ናንጋ ጎዳ ዒዞፓ ዔካንዳኔ፤ ባዞይዳ ዓኣ ዒዞኮ ዎልቆ ማዔ ባኮ ዒኢካ ዱኡኪ ዒ ባይዛንዳኔ፤ ካታሜላ ታሚና ሚቺንቲ ዲቢንሢ ማዓንዳኔ።
5 ዓስቄሎና ካታማ ዬያ ዛጋዖ ዲቃቲ ዒጊጫንዳኔ፤ ጋኣዛ ካታማኣ ዬያ ዛጋዖ ዎኦቶንዶ ካራ ባይዛንዳኔ፤ ዔቆሮኔያ ዬያጉዲ ሃጋኣ ዎዛ ባኣያ ማዓንዳኔ፤ ጋኣዛ ካታማኣ ካኣቲ ባኣያ ማዓንዳኔ፤ ዓስቄሎና ካታማ ዓሲ ናንጉዋ ጉሪ ቤሲ ማዒ ዓታንዳኔ።
6 ዔሽዶዴይዳ ሲኢሪንቴ ዴሬ ናንጋንዳኔ፤ ናንጊና ናንጋ ጎዳ ሂዚ ጋዓኔ፦ «ሃኣቶ፥ ዖቶርቃ ፒሊስፄኤሜ ዓሶ ታኣኒ ዻውሲሳንዳኔ፤
7 ሱጉሢ ጊዳ ዓኣ ዓኣዔ ዓሽኮ፥ ጊንሣ ሃሣ ዳምቦ ጎይፆና ሙይንቱዋጉዲ ላኣጊንቴ ሙዖ ዔያቶ ዻንጋፓ ታኣኒ ኬሲሳንዳኔ፤ ዔያቶፓ ፒኢጫዺ ዓቴ ዓሳ ታ ዓሶና ዎላ ሲኢሪንቲ ዪሁዳ ፃጶይዳ ፔቴ ቶኦኪ ማዓንዳኔ፤ ዔቅሮኔ ዴራ ዓዳ ዒያቡሳ ዓሶጉዲ ዴሮና ዎላ ሲኢሪንታንዳኔ።
8 ዬካፓ ታ ዓጮኮ ዓጮ ታኣኒ ዋርዲ ዔቂ ካፓንዳኔ፤ ዓጮ ዎልቄና ጌሊ ዓርቃ ዎልቆ ዓሳ ዒኢና ዴንዱዋጉዲ ታኣኒ ላኣጋንዳኔ። ታኣኮ ዴራ ዎማዺ ዋኣዬቴያ ታኣኒ ዛጌሢሮ ሃይካፓ ሴካ ዎልቆና ሄርቂ ዎይሣ ዓሳ ዔያቶ ዎልቄና ጌሊ ዓርቃዓኬ።»
9 ፂዮኔ፥ ዎዛዼ! ዬሩሳላሜ፥ ዎዛና ዒሊሼ! ሃይሾ፥ ኔኤኮ ካኣቲ ኮሹሞና ሼሌዔ ማዒ ሃሬሎ ዑፃ፥ ጌይፃ ሃሮ ናዖ ዑፃ ዴይ ዎልቄና ባሻያ ማዒ ኔ ባንሢ ሙካኔ።
10 ናንጊና ናንጋ ጎዳ ሂዚ ጋዓኔ፦ «ታኣኒ ሳርጌሎ ዖይቶ ዒስራዔኤሌፓ ዖሎ ፓራሢያ ዬሩሳላሜፓ ዔኪ ሺኢሻንዳኔ፤ ዖሎ ዖላ ሂኢዦዋ ታኣኒ ሜንሣንዳኔ፤ ኔኤኮ ካኣቲ ሜሌ ዴሮ ባኣካ ዴይ ኮሹሞ ሳዖይዳ ዔኪ ዬዓንዳኔ፤ ዒ ዎይሣ ዓጮኮ ዛጳ ባዛፓ ዴንዲ ሜሌ ባዞ ሄላንዳኣና ዔፕራፂሴ ዎራፓ ዓርቃዖ ዴንዲ ዓጮኮ ጋፒንፆ ሄላያ ማዓንዳኔ።»
11 «ዒንጎ ባኣዚ ማዒ ዒንጊንቴ ሱጉሢና ታ ኔኤም ጫኣቄሢሮ ዋኣፃባኣ ጉሮ ዔታ ኔኤኮ ቱኡቲ ዓኣ ዓሶ ታኣኒ ኬሳንዳኔ።
12 ዒንሢ፥ ሃጋኣ ዎዛ ዴንቄ፥ ቱኡዞ ዓሳ! ታኣኒ ቤርታ ዒንሢኮ ዓኣሢፓ ጳንጬ ማሂ ሃኖ ዒንሢም ዒንጋንዳሢሮ ዒኢካ ዴዒ ካታሞ ዒንሢኮ ካፖ ዼጌ ቤዞ ባንሢ ማዑዋቴ።
13 ዪሁዳ ታኣኒ ሂኢሺ ጎይሢ ዒስራዔኤሌ ጊንሣ ሃሣ ዓኣዛ ማሂ ዔያቶና ዖላንዳኔ፤ ጊሪኬ ዓጮ ዓቲንቆ ዖላኒ ፂዮኔፓ ዓቲንቆ ናኣቶ ጬንቻ ዓራፖ ማሂ ታኣኒ ዳካንዳኔ።»
14 ናንጊና ናንጋ ጎዳ ዴሮ ዑፃ ማዒ ፔጋዺ ጴዻንዳኔ፤ ዒዛኮ ዓኣዛ ዜኤሊንሢጉዲ ፖዒ ዴንዳያ ማዓንዳኔ፤ ናንጊና ናንጋ ጎዳ ማዔ ፆኦዛሢ ዛዬ ዋርቃንዳኔ፤ ዓጮኮ ዾኦሎ ዛላፓ ቱሮ ሙካ ዓልጎ ዢባሬጉዲ ዢባርሺ ዴንዳንዳኔ።
15 ቢያ ባኮ ዎይሣ ጎዳሢ ፔ ዴሮ ዛሎ ዖልታንዳኔ፤ ዒዛኮ ዴራ ፔ ሞርኮ ዎዺ ባይዛንዳኔ፤ ሞርኮኮ ዎሮ ሹዎ ቶኪና ሄርቃንዳኔ፤ ዔያታ ዖሎይዳ ማሢንቴ ዓሲ ጎይሢ ሜርታንዳኔ፤ ዔያቶ ሞርኮኮ ሱጉፃ ፆኦሲም ዒንጋኒ ሳኣኔይዳ ኩንሢ ዔኪ ዬይ ዒንጎ ባኮ ዒንጎ ቤዞይዳ ዋሂንታ ሱጉሢጉዲ ሾኦታንዳኔ።
16 ዬና ኬላ ሄላኣና ቆልሞ ሄንቃሢ ቆልሞ ፔኤኮ ሙዓ ቦዖይዳፓ ዓውሳሢጉዲ ናንጊና ናንጋ ጎዳ ማዔ ዔያቶኮ ፆኦዛሢ ፔ ዴሮ ዓውሳንዳኔ። ቦንቾሮ ቶኦካ ዓጎ ባኮይዳ ጳርቂ ኮሾና ዓንጋ ፖዓሢጉዲ ዔያታ ፔኤኮ ናንጊና ናንጋ ጎዳሢኮ ዓጮይዳ ፖዓያ ማዓንዳኔ።
17 ዓጬሎኮ ኮሹሞና ሚዛጱሞና ዎዚ ሄርሺሳያ ማዓንዳይ! ዒኢካ ዓኣያ ማዓንዳ ሃኣኮንታ ዎይኖ ዑዦንታ ዓቲንቆንታ ዉዱሮ ዼጌሢንታኮ ዑፆ ሚዛጲሳያ ማዓንዳኔ።