Job 31 in Maale
1 «ሚዛጲ ዉዱሮ ናይና ላሃኒ ታና ሱኡካሱዋጉዲ ታ ዓኣፖና ‹ዛጋዓ› ጌይ ታ ጫኣቄኔ።
2 ዬያ ዛሎ ፆኦሲ ሎፓ ታኣም ዓይጎ ዒንጌይ? ጫሪንጫ ዓኣ ቢያ ባኮ ዳንዳዓ ፆኦዛሢዳፓ ታኣም ጎዖና ባካ ዓይጎዳይ?
3 ፑርቶ ዓሶይዳ ዱማ ዱማ ሜታ ዻቢንቴ ዓሶይዳኣ ባይሲንታ ሄላሢ ዔርቴያቱዋዓዳ?
4 ፆኦሲ ታ ማዼ ባኮ ቢያ ዛጉዋዓዳ? ሃሣ ታ ሃንቴ ሃንቲፆዋ ዒ ፓይዱዋዓዳ?»
5 «ሉኡዚ ባኣዚ ታኣኒ ጌስቲባኣያታሢ ዓሲያ ታኣኒ ጌሺባኣያታሢ ታኣኒ ጫኣቃኔ፤
6 ዬይ ጎኔ ማዒፆ፦ ፆኦሲ ዴኤሡሞ ዔሮ ባኮ ፒዜሢዳ ጌሢ ታና ዛጎንጎ፤ ታኣኮ ፂሉሞና ዶዲፆዋ ዔሮንጎ።
7 ፒዜ ጎይፃፓ ታ ኬስኬያ ማዔቴ ዓኣፓ ታኣኮ ዛጌሢ ቢያ ዒና ታኣኮ ዓፃዼያ ማዔቴ ሃሣ ኩጫኣ ታኣኮ ጎሜና ኪንቄያ ማዔቴ፥
8 ታ ጎሽኬ ሃኣኮ ሜሌ ዓሲ ሙዖንጎ፤ ታ ባቃላ ቢያ ቱጊንቲ ባይቆንጎ።
9 ዒና ታኣኮ ሜሌ ላኣሊ ናሹሞና ዲዒንቲ ዔውቴያ ማዔቴ ታኣኮ ዓሺናሢ ማቾ ዴንቃኒ ዒዛኮ ካራ ካቲ ታ ዴዔያ ማዔቴ
10 ታ ማቻ ሜሌ ዓሲም ዎንሢ ዎዻያ ማዒ ማዾንጎ፤ ሃሣ ዒዛ ሜሌ ዓቲንቄና ላሆንጎ።
11 ዬይ ማዻ ዎጌና ዓይሢሳያታሢሮ ዼኤፒ ዻቢንቲኬ።
12 ዬይ ጎማ ታሚጉዲ ሚቺ ባይዛያታሢሮ ታኣኒ ዬያ ማዼያ ማዔቴ ታኣኮ ቆልሞ ቢያ ዬይ ጋፒሴያ ናንዳኔ።»
13 «ታኣኮ ማዾ ማዻ ዓቲንቆና ላኣሎና ታ ዔያቶም ጌስታንዳጉዲ ታኣም ዔያታ ኬኤዜንቴ ታ ቶኦቼያ ማዔቴ
14 ፆኦሲ ፔኤኮ ዻጎና ታና ዎጋኒ ዔቄ ዎዶና ዓይጌ ታኣም ኮሽካንዳይ? ዎጎና ታና ዒ ዖኦጫ ዎዶና ታና ዖኦጮ ዖኦጪፆም ዎዚ ጌይ ታ ማሃንዳይ?
15 ዒንዶ ጎጶይዳ ታና ማዤሢ ታኣኮ ማዻ ዓሶዋ ማዤሢቱዋዓዳ? ኑና ቢያሢ ኑ ዒንዶንሢ ጎጶይዳ ጎጶይዳ ማዤሢ ዒዛ ቱዋዓዳ?»
16 «ማንቆ ዓሳ ሺኢቃ ባኮ ላኣጊ ታ ዔሩዋሴ፤ ዜኤሮ ዒንዶንሢያ ዶዲሺሢዳፓ ጊንሢም ጌይ ታ ዔሩዋሴ፤
17 ዜኤሮ ናኣታ ጉሪ ዎርቃንቴ ታ ታኣሮ ሙይ ዎርቄ ዎዴ ባኣሴ።
18 ታኣኮ ዼጋቶ ዎዶይዳፓ ዓርቃዖ ታ ዔያቶኮ ዓዶ ማዒ ናንጌኔ፤ ታ ናንጎ ዎዶ ቢያይዳ ዜኤሮ ዒንዶንሢ ታ ማኣዴኔ።
19 ሜታዼ ዓሳ ማኣዖ ባኣዚ ባይዚ፥ ካላዺ፤ ሃሣ ጪኢሺና ዔያታ ሜታዻንቴ ታ ዛጊ
20 ታኣኮ ማራቶ ጋፓኖና ኮሺንቴ ማኣዓሢ ታ ዔያቶም ዒንጉዋዖ ዓቴ ዎዴ ባኣሴ። ዬያሮ ዔያታ ጉቤ ዒናፓ ታና ጋጋላታኔ።
21 ዓሳ ቡካ ጶኦካ ታኣኒ ዔርቴያኬ ጌዒ ዜኤሮ ናኣቶ ታ ኩጮና ታኣኒ ሌኤቂንሤያ ማዔቴ
22 ሻላ ታኣኮ ጌኤታፓ ኬስኮንጎ፤ ካኣላሢዳፓኣ ሾኦሊንቲ ኬዶንጎ።
23 ዬያ ታ ማዻሢ ፆኦሲኮ ጎሪንቶ ታ ዒጊጫሢሮና ዒዛኮ ዲቃሣ ዼኤፑሞሮ ዒዛ ቤርታ ዔቃኒ ታ ዳንዳዑዋሢሮኬ።»
24 «ታኣኒ ታ ቆሎና ጉሙርቂንቲ ቤቂባኣሴ፤ ጊንሣ ጌኤሺ ዎርቄያ ታኣኮ ጌኤቂንቶያ ታ ማሂባኣሴ።
25 ‹ታኣኮ ቆላ ሚርጌኔ፤ ዖርጎቹሞንታ ሚርጌ ሚኢሼንታ ታ ዴንቄኔ› ጌይ ታ ዎዛዺ ቤቂባኣሴ።
26 ዓቦኮ ፖዒፆ ሚዛጱሞ ዓጊኖኮዋ ዖይዺ ፖዒፆ ታኣኒ ዛጊ
27 ዒና ታኣኮ ጋርሲና ዬያቶና ዲዒንቲባኣሴ፤ ታ ኩጮዋ ታኣኒ ፒሺ ሄርቂሢና ቦንቾ ታ ዔያቶም ዒንጊባኣሴ።
28 ዬያ ማዺፃ ሎ ዑፃ ዓኣ ጎዳም ጉሙርቂንቱዋያ ማዒሢታሢሮ ዬንሢ ማዺፃ ሃይቢ ዔኪ ሙካ ጎሜኬ።»
29 «ታና ዒፃ ዓሳ ሎኦሜሢሮ ታ ዎዛዺባኣሴ፤ ፑርታ ባኣዚያ ዔያቶ ሄላዛ ታ ኮኦሚባኣሴ፤
30 ‹ታ ሞርካ ባይቆም› ጌይ ጋዳንቂሢና ፔቴታዖ ታ ጎሜ ማዺባኣሴ።
31 ቢያ ዎዴ ሾኦቺ ታ ዔካያ ማዔሢ ታኣኮ ማዻ ዓሳ ታኣም ማርካዻኔ።
32 ጎይሢ ዴንዳንቴ ሳዓ ዓሜ ዓሲ ዙልካ ዎርቁዋጉዲ ታ ማኣሪ ዔኪ ዓኣዺ ታ ዔያቶ ዎይሣኔ። »
33 «ዻቢንቲ ታ ጋራ ታኣኒ ዱኡኪባኣሴ፤ ሜሌ ዓሶጉዲ ታ ጎሜ ታ ዓኣቺባኣሴ።
34 ዴሮኮ ሚርጉማ ታና ዒጊቼም ታ ማኣሮ ዓሶኮዋ ቶኦቺፃ ታና ዲቃሤም ታ ማኣሮይዳ ዻንጋ ባይቂ ታ ዓኣሺንቴ ዎዴ ባኣሴ።»
35 «ታኣም ዋይዛ ዓሲ ታ ዴንቃቶ ዓይጎ! ታኣኒ ጎኔ ጋዓኔ፤ ቢያ ባኣዚ ዳንዳዓ ጎዳ ታኣም ማሆንጎ! ታና ዎጎና ዓይሢሳሢ፦ ዒ ዓይሢሳ ባኮ ፓይዲ ፓይዲ ሺኢሼም ታ ዛጋቴ ዓይጎ!
36 ታኣም ዒንጎና ባኣዚጉዲ ጌኤታ ታ ጌሣንዳንቴኬ፤ ቦንቾሮ ቶኦካ ዓጎ ባኮጉዲያኣ ቶኦካ ታ ዓጌያ ናንዳኔ።
37 ቢታንቶ ዓኣ ዓሲጉዲ ፆኦሲ ቤርቶይዳ ታ ጫርቂ ዔቂ ታ ማዼ ባኮ ቢያ ፓይዲ ፓይዲ ኬኤዛንዳንቴኬ።»
38 «ዓሲኮ ጎሺ ታኣኒ ጩቦና ቡሪ ዔኪ ጎሽኬያ ማዔቴ፥
39 ዬኖ ጎዦይዳ ባቃሌ ሃኣኮ ዔኤቢ ጪጉዋዖ ቡኪሲ ዔኪ ታ ሙዒ ዔያቶ ዖዪሴያ ማዔቴ፥
40 ዬኖ ጎዤሎይዳ ዛርጋሢ ዛሎ ዓንጊሢ፤ ዔልዓሢ ቤዞ ሆኦሪ ባቃሎንጎ!» ጌዔኔ። ዬያይዲ ዒዮቤኮ ጌኤዛ ጋፔኔ።