Isaiah 11 in Maale

1 ሚሢኮ ዱርሚ ቶሻሢና ዴማፓ ካኣፒ ኬሳሢጉዲ፥ ዬያጉዲ ዒሴዬ ዜርፃፓ ፔቴ ካኣቲ ኬስካንዳኔ፤

2 ናንጊና ናንጋ ጎዳኮ ዓያና ዒዛ ዑፃ ናንጋንዳኔ፤ ዔራቶና ማሊ ጶቂሥሢ ዓያና ዞሮና ዎልቄ ዓያና ዔራቶና ናንጊና ናንጋ ጎዳ ዒጊጪሢ ዓያናና ዒዛይዳ ሃውሻንዳኔ።

3 ናንጊና ናንጋ ጎዳ ዒጊቹሞና ዒ ዎዛዻንዳኔ፤ ዒዚ ዛጋሢና ሌሊ ዎጊንዱዋሴ፤ ዋይዜሢና ሌሊያ ዒ ጌስቲ ዔቂሲንዱዋሴ።

4 ጋዓንቴ ማንቆ ዓሶም ጎኑሞና ዎጋንዳኔ፤ ማኣዳያ ባኣዞንሢም ታርዤ ማዒ ዔያቶ ዛሎ ጌስቲ ዔያቶ ዒ ቦንቺሳንዳኔ፤ ዻንጋፓ ኬስካ ኮኦሎና ሳዖ ዒ ጳርቃንዳኔ፤ ፔኤኮ ዻንጎ ዑኡዞና ፑርቶ ዓሶ ዒ ዎዻንዳኔ።

5 ዒ ፔኤኮ ዴሮ ዎይሣኒ ኬርና ቱካሢ ጎኑሞ ኬርና ዒ ማራሢያ ጉሙርቂንቲሢ ማዓንዳኔ።

6 ያኣዮና ማራይና ፔቴይዳ ናንጋንዳኔ፤ ማኣካኣ ዋናናኣቶና ሄንቃንዳኔ፤ ናኣሪና ሃጊ ዔቃ ዓዴ ዞቢና ዎላ ሄንቃንዳኔ፤ ዻካ ናይ ዔያቶ ዒሺ ዒሺ ሃንታንዳኔ።

7 ባይና ዲቤ ጌይንታ ቦዖና ዎላ ኬስካንዳኔ፤ ናኣሮና ዞቦ ናኣቶና ዎላ ፔኤቃንዳኔ፤ ዞባ ጌማይጉዲ ጎቦ ሙዓንዳኔ።

8 ዻንቃ ናይ ሾኦዦኮ ዔቶ ዓጫ ዓማላንዳኔ፥ ዻንሢ ጉኡጴ ናይ ጎፖ ዔቶይዳ ፔ ኩጮ ዳካንዳኔ።

9 ናንጊና ናንጋ ጎዳኮ ዱማዼ ዹኮ ዓይጎ ሜታኣ ሄሊንዱዋሴ፤ ባዚ ዋኣሢና ኩማሢጉዲ ሳዓ ናንጊና ናንጋ ጎዳ ዔራዞንሢና ቦንቻዞንሢና ኩማንዳኔ።

10 ዒማና ዒሴዬ ዜርፃሢ ዴሮኮ ማላታ ማዒ ዔቃንዳኔ፤ ዴራ ዒዛ ኮዓንዳኔ፤ ዒ ናንጋ ማኣራ ቦንቺንቴያ ማዓንዳኔ።

11 ዬኖ ዎዶና ናንጊና ናንጋ ጎዳ ላሚ ጊንሣ ዎልቄ ማዾ ማዻንዳኔ፤ ዬይያ፦ ዓሶኦሬይዳ፥ ጊብፄይዳ፥ ጳፂሮሴ ዓጮይዳ፥ ዒቶጲያይዳ፥ ዔኤላሜይዳ፥ ባብሎኔና ሃማቴናይዳ፤ ዬያጉዲ ሃሣ ባዞ ኮይሎ ዓጮና ዋኣፆ ሳዞናይዳ ናንጋ ፒኢጫዺ ዓቴ ዓሶ ፔ ዓጮ ማሃንዳኔ።

12 ዴሮም ዒ ማላታ ዾቂ ዔቂሳንዳኔ፤ ዒስራዔኤሌኮ ዜርቂንቲ ዴንዴ ዓሶ ማሂ ዔኪ ሙካንዳኔ፤ ዬያጉዲ ዜርቂንቲ ዓኣ ዪሁዳ ዴሮዋ ዓጮኮ ዖይዶ ባንፃፓ ቡኩሳንዳኔ።

13 ዬካፓ ዔፕሬኤሜኮ ጌኖ ማዻ ጋፓንዳኔ፤ ዪሁዳኮ ሞርካኣ ባይቃንዳኔ፤ ዪሁዳኣ ዔፕሬኤሜ ዒፂፆ ሃሻንዳኔ።

14 ላምዖንሢ ዎላ ፔቴ ማዒ ዓባ ጌላ ባንፆና ፒሊስፄኤሜ ዓሶይዳ ዔቃንዳኔ። ዓባ ኬስካ ባንፆና ናንጋ ዴሮኮዋ ቆሎ ዔያታ ቡራንዳኔ፤ ሃሣ ዔኤዶሜና ሞዓኣቤ ዴሮ ዔያታ ባሻንዳኔ፤ ዬካፓ ዓሞኦኔ ዴራ ዔያቶም ዓይሢንታያ ማዓንዳኔ።

15 ናንጊና ናንጋ ጎዳ ጊብፄ ባዞኮ ሳዖ ዛሪ ጌሌ ዋኣፆ ሚጪሳንዳኔ፤ ዓይጎ ዓሲያ ቶኪና ፒንቃኒ ዳንዳዓንዳንጉዲ ዔፒራፂሴ ዎሮ ዶዲ ዢባሬ ዢባርሺሲ ላንካይ ዻካ ዻካ ዛሬ ማሂ ፓቃንዳኔ።

16 ፆኦሲ ዔያቶኮ ቤርታ ዓዶንሢ ጊብፄ ዓጫፓ ኬሴ ዎዶና ማዼ ጎይፆ ሃሢያ ባይሲንታፓ ዓቴ ዒስራዔኤሌ ዴሮ ዓሶኦሬ ዓጫፓ ኬስካንዳ ጎይፆ ዔያቶም ጊኢጊሻንዳኔ።