Revelation 18 in Kenga
1 Kɛn nakgen se jaay deel paac se, maam mꞋaak *kɔɗn Raa kuuy bɔɔyo maakŋ raa ki ɔɔ kɔɗn Raa se ɔk tɔɔg dɛna ɔɔ ute tɔɔgin̰ se naan̰ wɔɔr do naaŋa se kɛlɛŋ kɛlɛŋ.
2 Naan̰ taaɗ makɔn̰ɔ ɔɔ: «Gɛgɛr magal Babilon se tɛrɛcga! Ɗeere, naan̰ se tɛrɛcga kamac kamac! Ɓɔrse gɔtin̰ se ɔɔp tɛɗga gɔtn maragge, gɔtn sitange ɔɔ gɔtn yeelge ute daagen jig ey kɛn jeege ƴɛɛmɗe ƴɛɛm se.
3 Naan̰ se ɓo kɛn ɔl jeege tɛɗ nakŋ kɛn naan̰ maakin̰ jen ro ki aan gɔɔ tɔtn koojn̰ bin̰ kɛn naan̰ ɔl jeege paac aay te maraadɗe se. Ɔɔ nakŋ kɛn naan̰ ɔl jeege tɛɗ se, nakŋ *kusin̰ salal. Ɔɔ gaarin̰gen do naaŋ ki se, naan̰ ɔlɗe aay tɔtin̰a ɔɔ ɛɛsin̰a. Ɔɔ jee tɛɗn zogen do naaŋ ki se lɛ, tɛɗ jee nak dɛnge se, ute maal naan̰ kɛn dɛn se.»
4 Tɛr mꞋbooy mind nam kuuy taaɗ maakŋ raa ki ɔɔ: «Naasen jeemge se, Ꞌteecki naatn maakŋ gɛgɛr kɛn se, ey num naase kic aki kɔl dose maakŋ kusin̰ɗe ki, ɔɔ dubar utu kaan doɗe ki se, utu koocn̰ do naase ki kici;
5 taa kusin̰ maakŋ gɛgɛr kɛn ese se, ziiɗ bini ook aanga maakŋ raa ki ɔɔ *Raa se saapga do nakge tun te ɗoobin̰ ey kɛn jeen̰ge lee tɛɗ se.
6 Nakŋ naan̰ tɛɗ jeege tu se, naase kic Ꞌtɛɗin̰sin̰ki naan̰ ki mɛt dio; aan gɔɔ kɛn naan̰ lee ɛɗ tɔtn kꞋdeepin̰ atak maakŋ *kɔɔpin̰ ki jeege tu se, naase kic ɛɗin̰ki tɔtn atak cir gɛn naan̰ se mɛt dio.
7 Aan gɔɔ naaɗe ɔŋo maala ɔɔ ɔŋo doɗe se, ɓɔrse naase Ꞌdabarɗeki makɔn̰ bin kici ɔɔ ɔn̰ɗeki kapin aɗen tɔɔlɔ, taa gɛgɛr se taaɗga taaɗ ute maakin̰ ɔɔ: ‹Maam se mꞋtɛɗga nɛɛlge do kaag dom ki se. MꞋmɛnd‑daay eyo ɔɔ mɔɔtn kapin lɛ am tɔɔl eyo.›
8 Taa naan̰ se ɓo, ɓii kalaŋ sum ɓo nakgen ɔɔn̰ se utu kaan don̰ ki, aan gɔɔ yoa, kɔl doa ɔɔ ɓoa. Ɔɔ naan̰ se jꞋutu jꞋan̰ tɔɔcɔ, taa Mɛljege Raa Sidburku se utu an̰ kɔjn̰ bɔɔrɔ don̰ ki.»
9 Num gaarin̰gen do naaŋ ki kɛn ɛndo maakŋ kusin̰ gɛgɛr kɛn ese se ɔɔ tɛɗo maala gɔtn ese se, kaaɗ kɛn naaɗe utu kaakŋ saa pooɗn gɛgɛr kɛn kꞋtɔɔcin̰ se, naaɗe utu tɔɔyɔ ɔɔ keem nɔɔ taarin̰a.
10 Naaɗe ɗaar dɔkɔ ɔɔ ɓeer ɔɔ sɔm dubar ese se koocn̰ doɗe ki ɔɔ gɔtn se naaɗe tɔɔyɔ ɔɔ keem nɔɔ: «Wɔɔy, wɔɔy nakage, aakki tu gɛgɛr Babilon, gɛgɛr magala, naan̰ ɔk maala se! Lɛr kalaŋ sum ɓo Raa tujin̰a.»
11 Jeegen ɔk nakŋ zogen do naaŋ ki paac eeme ɔɔ ɔl doa taa gɛgɛr se, taa nakŋ zoɗege se, nam tap ɓo dug ey sum.
12 Nakŋ zoɗege se: daab, pudda, kogen ute roɗe, meeɗgen ute roɗe, kalgen ute roɗege ɔɔ kɛn deer taac boŋ boŋ se, kalgen ute roɗege cɛɛpɛ ɔɔ aac dɛŋ dɛŋ; kaaggen oot nijimi, nakgen kꞋɗaapɗe ute naaŋ ceeɗge, kaaggen mɔŋgɔ, maal‑zɛɛrɛ ute maal‑kilimi, ute kogen raaŋ aak bɛɛ bɛɛ,
13 naagŋ kaagŋ nijimi, nakgen oot nijimi, itir, duɗgen oot nijimi ute kaaggen oot koot kici, tɔtn koojn̰ bin̰, uubu, ruju ute gɛmɛ, maraŋge ute bɛn̰ge, sɛndge ute puusɗege, ɓulge ute jee daŋgayge, nakgen se paac nam tap ɓo mɔɔtn Ꞌdug ey sum.
14 KꞋtaaɗ jeege tun maakŋ gɛgɛr kɛn ese jꞋɔɔ: «Nakŋ naase maakse Ꞌje paac se gɔtɔga. Maala ute nakgen tɛɗsen jaay jeege je se se, paac utga naatn. Nakgen bin se mɔɔtn jꞋan̰ kɔŋ maakŋ gɛgɛrse ki ey sum.»
15 Jee tɛɗn zogen lee ɓaaɗo tɛɗ maala maakŋ gɛgɛr kɛn ese se, naaɗe kic Ꞌɗaar dɔkɔ ɔɔ ɓeer ɔɔ sɔm dubar se koocn̰ doɗe ki. Gɔtn se naaɗe tɔɔyɔ ɔɔ eem nɔɔ:
16 «Wɔɔy, wɔɔy nakage, aakki tu gɛgɛr magal, aan gɔɔ mɛnd kɛn tuuso kalgen deer taac boŋ boŋ ute kɛngen cɛɛp taac dɛŋ dɛŋ ɔɔ tɔlo kɔɗɔkŋ bi gɛn daab ute meeɗge ɔɔ kogen ute roɗe se!
17 Maalin̰ ute dɛnin̰ se, maakŋ lɛr kɛn kalaŋ ki sum ɓo utga paac!» Gɔtn se, jee tuur markabgen magal magala ute jee tɛɗn naabɗege ɔɔ jeegen maak ki paac se, ute jeegen tɛɗ naaba do baar ki paac se, naaɗe kic ɗaar dɔkɔ.
18 Kɛn naaɗe jaay aak saa pooɗn iin̰ se, tɔɔɗ tɔɔy ɔɔ: «Gɛgɛr jaay magal aas te gɛgɛr se, ɓɛrɛ, gɔtɔga!»
19 Naaɗe tɔs naaŋa bɔɔy doɗege tu ɔɔ tɔɔɗ tɔɔyɔ ɔɔ eem nɔɔ: «Wɔɔy, wɔɔy nakage, aakki tu gɛgɛr magal ɗooc te maala ɔɔ jeegen ɔk markabgen magal magala do baar ki paac se, naaɗe ɔŋo maala paac gɔtin̰ ki, ɔɔ maakŋ lɛr kɛn kalaŋ ki sum ɓo, maalɗe se utga!»
20 Num naase, jee maakŋ raa kɛn jee Raage, naase *jee kaan̰ naabm Isage ute jee taaɗ taar teeco taar Raa ki se, Ꞌtɛɗki maak‑raapo! Ute dubar kɛn Raa ɓaano don̰ ki se naan̰ ɔgsenga sɛɛse.
21 Gɔtn se maam mꞋaak kɔɗn Raa tɔɔgɔ uuno ko deer aan gɔɔ ko tooto undin̰ maakŋ baar ki ɔɔ ɗeek ɔɔ: «Taa naan̰ se ɓo Babilon, gɛgɛr magal se, jꞋutu jꞋan̰ kund bin kici ɔɔ mɔɔtn nam an̰ kaak ey sum!
22 Jee kɔnd kurundge, jee kaage, jee tuuy kaage ute jee tuuy pulge mɔɔtn jꞋaɗen Ꞌbooy Ꞌtɛɗn kaa gɔti ki ey sum; jee tirɗge se mɔɔtn jꞋaɗen kɔŋ gɔti ki ey sum. Ɔɔ mɔɔtn nam Ꞌbooy keem tooto gɔti ki ey sum.
23 Nam tap ɓo kaakŋ pooɗn lɔɔmpɔ gɔti ki ey sum ɔɔ mɔɔtn nam tap ɓo taaɗn taa kɔkŋ mɛnda gɔti ki ey sum, taa jeegen ɔko nakŋ zo gɔti ki se, naaɗe ɓo jee maalgen cir jeegen do naaŋ ki se paac. Taa naai ute kɔrɗi kɛn Ꞌlee tɛɗ se, dɛrl mɛtjil jeegen do naaŋ ki paac.
24 Gɔtn naai ki se ɓo gɔtn kꞋtɔɔlo jee taaɗ taar teeco taar Raa ki, jee Raage ɔɔ jeegen paacn̰ kꞋtɔɔlɗe do naaŋ ki se.»