Psalm 90 in Boko
1 Lua gbɛ̃́ Mↄizi wabikɛa. Dii, wá ulɛkĩin n ũ wɛ̃ ń wɛ̃o.
2 E ǹyↄ̃ gɛ́ gbɛ̀sĩsĩↄ kɛi, e ǹyↄ̃ gɛ́ tↄↄlɛ ń dṹniao kálɛi, Luan n ũ za asĩnizĩ e gↄↄpii.
3 Ni dilɛ gbɛ̃nazĩnaɛ aà gɛ̃ tɛ̃́ɛnau, ni to aà ɛa gↄ̃ bùsuti ũ.
4 Wɛ̃̀ ↄ̀aa sↄo dɛnɛ lán gↄↄ dowa, ì gɛ̃nɛ lán gĩa ge gwãasĩnawa.
5 Ni to i dańla aai gaga, aa dɛ lán sɛ̃ pↄ́ ì bↄlɛ kↄↄwa,
6 ì bↄlɛ kↄↄ, i gbã́, ì i'o oosi, i giigaga.
7 N pↄkũma ì wá suumpa, n kòlokɛa ì gili gɛ̃wágu.
8 Wá yãvãiↄ kálɛa n aɛ, wá asiiyãↄ bↄ̀ gupuau n kuu.
9 Wá gↄↄ ì gɛ̃kↄ̃u n kpɛ̃nɛ yã́i, wá wɛ̃ni ì midɛ wá wea dóũdoũnau.
10 Wá wɛ̃ ì ka bàaↄ̃kwi taawa, tó wá gbãa sↄ̃, basiiↄ̃. Wɛ̃piↄ guu baa a pↄ́ pↄ́ na ì mↄ́ ń taasio ń pↄsiaoɛ, ì gɛ̃zɛa kpakpa, ↄ̃ wi kpagui.
11 Démɛ n pↄkũma gbãa lɛ́ dↄ̃i? Démɛ n kpɛ̃nɛ lɛ́ dↄ̃ à vĩakɛɛ̀i?
12 Dadawɛ̃ɛ wàↄ wá wɛ̃ni dↄ̃ màa, kɛ́ wà ↄ̃nↄ e wá sↄ̃ guu.
13 Dii, ńyↄ̃ ɛa wá wɛgwa bↄɛ ni? Wɛ̃nadↄ̃ n zↄ̀blenaↄnɛ.
14 Tó gu dↄ̀, to n gbɛ̃kɛ mↄ́wá, wíↄ pↄnakɛ ń gulakɛao gↄↄpii.
15 Wá gba pↄna ↄ pↄ́ ń tↄ̃̀wá gↄↄ lɛ́u, taasi pↄ́ wá kɛ̀ wɛ̃̀ lɛ́u.
16 Ǹ n yãkɛaↄ ↄlↄ n zↄ̀blenaↄnɛ, ní tó wá nɛ́ↄ n iko gbãa dↄ̃.
17 Dii wá Lua, báaadawágu nana, ɛ̀fãaida wá zĩu wàↄ kã́fĩakɛ, ao, ɛ̀fãaida wá zĩu wàↄ kã́fĩakɛ.