Job 38 in Boko

1 Ɔ̃ Dii yã́zãsì Yobuwa zàa'ĩana guu à mɛ̀:

2 Démɛ lɛ́ ↄ̃nↄ ↄ̃̀ↄkpa ń yãfaasai oaoi?

3 Sↄukɛ lán gↄ̃sawa, má n la yã́i, ní wea.

4 Kɛ́ ma dṹnia kàlɛ, ń kú má ni? Tó ń a dↄ̃a vĩ, omɛɛ.

5 Démɛ a kↄↄlɛ̀i? Démɛ ba yↄ̃̀wài? Ń dↄ̃ nolo?

6 Wà a gbá pɛ̀lɛ bↄ́wa ni? Démɛ a ɛ̃ dàalɛ,

7 gↄↄ pↄ́ gudↄlɛia saanaↄ lɛ́ gulakɛ, mɛ́ luabɛ gbãadeↄ kúkua dↄ píii?

8 Kɛ́ ísia bↄ̀ a da gbɛɛu, démɛ kaa lìai à a zùukɛ̀i?

9 Ma luabɛpuana dàɛ̀ pↄkasa ũ, ma sua fĩ̀wà ulada ũ.

10 Ma a zɛkĩi lɛ́ dàɛ̀, ma zɛtàɛ̀ ma gbã́a dàu.

11 Má òɛ̀: Nìli mↄ́ la, ńsu vĩao, n ikooa zↄ̃ↄↄ zɛ la.

12 N yãdìlɛ kↄↄɛ yãae? N bↄkĩi ↄ̀lↄ gudↄaɛa?

13 Gudↄa ì dṹnia kṹ a gola síiↄ̃wa, ì vãikɛnaↄ kpoɛ.

14 Ì dṹnia lilɛ lán oo pↄ́ wà seelakɛ̀wàwa, sĩ̀sĩↄ ì bↄ gupuau lán ula kpóũkpoũna kɛawa.

15 Ì gi vãikɛnaↄnɛ aa ń gusiayã kɛ, ì ń ↄ pↄ́ aa sɛ̀ musu ɛ́'ɛ.

16 N gɛ e za ísia nibↄnaↄ kĩ́ia? N bɛbɛ ísipi nↄnau yãae?

17 Wà ga gãmↄ ↄ̀lↄnɛa? N bɛda bĩ́ibↄlɛↄ èa?

18 N dṹnia yàasa lɛ́ tàasikàa? Tó ń yã́ beeↄ dↄ̃ píi, omɛɛ.

19 Gupua bɛn mái? Ń gusiakukĩi dↄ̃e?

20 Ńyↄ̃ fↄ̃ gɛ́ńnↄ ń bùsuua? Ń ń bɛ zɛ́ dↄ̃o lé?

21 Ń dↄ̃, asa wà n i gↄↄ bee nolo? N wɛ̃ lɛ́ vĩo nolo?

22 N gɛ̃ làasi pↄ́ ma guniɛ kàlɛua? N ma lougbɛ dↄ̃ èa?

23 Miↄ kũa taasikɛgↄↄ pↄ́ ũɛ, mi gbaɛ zĩkagↄↄ.

24 Gupua ì ligua kpelewa ni? Ĩana ì bↄ à li tↄↄlɛa kpelewa ni?

25 Démɛ ì loukwɛa dazɛwai? Démɛ ì zɛbↄ loupilɛaɛi?

26 Ì to lou ma tↄↄlɛ pↄ́ gbɛ̃e kuou, baa sɛ̃gbãu gu pↄ́ gbɛ̃nazĩna vĩo.

27 Ì bɛzia ń tàaao níni, ì to sɛ̃ bↄlɛ we.

28 Lou de'ia vĩe? Démɛ dɛ sua pↄ́ ì kpa mae ũi?

29 Dé nɛasakpɛ lougbɛ ì bↄui? Démɛ ì fíi i, ↄ̃ i gbasa kpai?

30 Démɛ ì to í fee lán gbɛwa à to ísia musu gbãakũi?

31 Ńyↄ̃ fↄ̃ saana pↄ́ kãaaoↄ kãaaa? Ńyↄ̃ fↄ̃ Saan kífɛ̃nɛnaↄ kɛ̃kↄ̃waa?

32 Ńyↄ̃ fↄ̃ Saan nↄ̀ↄ'imina bilɛ a gↄↄwaa? Ńyↄ̃ fↄ̃ bↄ ń Saan ko nɛadeo ń a nɛ́ↄa?

33 Ń musupↄↄ ikoyã dↄ̃a? Ńyↄ̃ fↄ̃ ǹ ń kpá kpalau tↄↄlɛa?

34 Ńyↄ̃ fↄ̃ lɛzu louzi à sisi à ibↄ à n gbɛ̃a?

35 Ni loupilɛaↄ gbaɛ aa dazɛu nɛe? Aaì mↄ onɛ wa làa yã̀?

36 Démɛ ↄ̃nↄ dà kpↄbↄ'ilɛnaɛi? Démɛ dↄ̃a kpà kosawai?

37 Dé ↄ̃nↄ mɛ́ kà à lounaaↄ naoi? Démɛ a fↄ̃ musu olaↄ yɛɛlɛi?

38 Tó a ibↄ̀lɛ, bùsu giina ì gↄ̃ bɛ̀lɛ ũ, bùsukↄ̃ↄtɛ̃ↄ ì nanakↄ̃wa.

39 Gↄↄ pↄ́ nↄ̀ↄmusuↄ naalɛa ń tòou, ge aalɛ nↄ̀ↄ kpakpa dào guu, ḿmɛ ni toekanɛ́a? Ḿmɛ ni to an nɛ́ↄ kãaa?

41 Tó gbagbaa nɛ́ↄ lɛ́ liaaliaa, aalɛ lɛzumazi blɛkɛ̃sãama yã́i, démɛ ì pↄblea kpámái?