Jeremiah 15 in Boko

1 Ɔ̃ Dii òmɛɛ à mɛ̀: Baa tó Mↄizi ge Samuɛli zɛ ma aɛ, Yudapiↄ yã́ a gɛ̃ ma sↄ̃uo. Ǹ ń yá aa go ma aɛ zã̀.

2 Tó aa n lá, má wa gɛ́ui, onɛ́ ma mɛ̀, gbɛ̃́ pↄ́ má dìlɛ aà ga, a gaɛ, gbɛ̃́ pↄ́ má dìlɛ wà dɛ ń fɛ̃ndao, fɛ̃nda wa dɛò, gbɛ̃́ pↄ́ má dìlɛ aà ga ń nↄanao, nↄana a gaò, gbɛ̃́ pↄ́ má dìlɛ wà kũ zĩ̀zↄ ũ, wa kũ zĩ̀zↄ ũɛ.

3 Ma Dii ma mɛ̀, má pↄkaalɛnaↄ gbaɛmá lɛɛ síiↄ̃ɛ. Fɛ̃nda a ń dɛdɛ, gbɛ̃ↄ i ń gálɛgalɛ táńnↄ, bãↄ ń wàiↄ i ń ble sã́asã.

4 Yã́ pↄ́ a ń le a to sↄ̃ kɛ̃ dṹnia bùsu gbɛ̃́piigu yã́ pↄ́ Yudaↄ kí Manase, Ezekia nɛ́ kɛ̀ Yelusalɛũ yã́i.

5 Yelusalɛũ, démɛ a wɛ̃nadↄ̃nɛi? Démɛ a waiyookɛnɛi? Démɛ a mↄ n aafia gbɛaii?

6 Ma Dii ma mɛ̀ n pãkpàmazi n bↄ ma kpɛ. A yã́i má ↄtↄ̃ma mà n dɛ, ma kpasa ń n wɛ̃nagwaao.

7 Má a gbɛ̃́ↄ zuzu musu ń saao lán ésewa an bùsu wɛ̃́lɛↄ guuɛ, má tó aa kua ń nɛ́ↄwa, mí ń midɛ, asa aai mikɛ̃ ń yãkɛaↄwao.

8 Má tó an gyaaↄ dasi aↄ dɛ ísialɛ ũfãaa. Má tó bùsudɛnaↄ mↄ lɛ́lɛ ń ɛ̀waasoↄ daↄwa fãanɛ gbãa zã́, gili ń bã̀abãaboao a gɛ̃ńgu kã́ndoɛ.

9 Nↄɛ pↄ́ nɛgↄ̃ɛ ì sopla yɛ̃̀ɛɛ i láa, wí i aà kṹ, aà gɛɛ i gↄ̃ kpa a wɛ́i. Aà gↄↄ a pa kpóoɛ, i tá. Má tó an ibɛɛↄ ń gbɛ̃́ kↄ̃naↄ dɛdɛ. Ma Dii mámɛ má ò.

10 Ma da, waiyoo mapi kɛ́ n ma i! Bùsudeↄ lɛ́ ma dilɛ ḿpii sòlede gudɛna ũɛ. Mi pↄ́ sɛ̃anɛ́o, mi pↄ́ sɛ̃amá sↄ̃o, kási sa bɛ̃̀ɛ ↄ̃ gbɛ̃́pii ìↄ omɛɛ.

11 Ɔ̃ Dii mɛ̀: Má tó ǹ bↄ aafiaɛ fá! Mí tó n ibɛɛↄ mↄ kulɛkɛnɛ taasi pãsĩ gↄↄ.

12 Gbɛ̃e a fↄ̃ mↄsi ɛ́e? Atɛ̃sa gugbãntoo oi mↄsi ge a mↄgotɛ̃.

13 Má á àizɛɛↄ ń á pↄ́ ↄdeↄ kpámá aa naaa fĩabosaiɛ duuna pↄ́ á kɛ̀ á bùsuuↄ píi yã́i.

14 Má tó à zↄble á ibɛɛↄnɛ bùsu pↄ́ á dↄ̃o guu, asa ma pↄfɛ̃ a fɛlɛ lán tɛ́waɛ, i kṹwá.

15 Dii, ń ma yã́ dↄ̃. To ma yã́ àↄ dↄngu, ní laaidↄa. Tↄ simɛɛ ma wɛtãnaↄwa, ńsu mɛnakɛńnↄ e aa gɛ ma dɛo. Ǹyↄ̃ dↄ̃ kɛ́ n yã́i wì ma láanikɛi.

16 Kɛ́ n yã́ sòso ń kàmɛɛ ma lɛ́u, má mↄ̀mↄ, ↄ̃mɛ ma pↄna ń ma yáalↄao ũ, asa n tↄ́ mɛ́ kua Dii Lua Zĩgↄ̃de.

17 Mili zↄ̃lɛ sãnu ń yaalↄnaↄo, mili pↄnakɛńnↄo. Miↄ zↄ̃lɛa madoɛ, asa ń kumanↄɛ, mɛ́ ń tò málɛ kpɛ̃nɛkɛ an yã́ musu.

18 Bↄ́yãi ma yã'ↄ̃ma lí láao ni? Ma bↄ pãsĩ, àlɛ gí láai. Ńyↄ̃ↄ dɛmɛɛ lán yiongo lɛ́baawa, lán nibↄna pↄ́ ì yɛ̀lɛdinɛ́wa yã̀?

19 A yã́i tò ma Dii ma mɛ̀: Tó n nↄ̀sɛlìlɛ, má ɛa n dilɛ n pá ziu, níↄ zĩkɛmɛɛ. Tó n yã́ gbia bↄ̀aa ń yã́ yãfũnao, ńyↄ̃ↄ dɛ ma lɛdↄɛkɛna ũɛ. To aa ɛa suma, ńsu támáo.

20 Má n kɛ gbɛ̃́piↄnɛ bĩ́i ũɛ, mↄgotɛ̃ bĩ́i pↄ́ wa fↄ̃ gbooo ũ. Aa sòlekɛnnↄ, kási aa n fuo, asa máↄ kunnↄɛ, má n suaba, mí n bↄ. Ma Dii mámɛ má ò.

21 Má n bↄ gbɛ̃vãiↄ ↄzĩɛ, mí n si nↄ̀sɛpãsĩdepiↄwa.