Isaiah 44 in Boko

1 Tiasa Yakↄbu bui ma zↄ̀blenaↄ, Isaili ma yenzideↄ, à ma yãma.

2 Ma Dii á Dↄnlɛde pↄ́ á kɛ́ ma á ikàsa nɛasakpɛu ma mɛ̀: Yakↄbu bui ma zↄ̀blenaↄ á bui maa pↄ́ má sɛ̀ↄ, ásu to vĩa á kũo.

3 Asa má í pisi gu'isaiɛ, má tó í da tↄↄlɛ giia, má a Nisĩna pisi á buiↄwa, má báaada á sↄ̃kpaɛↄgu.

4 Aa fɛlɛ lán sɛ̃̀bↄlↄwa, aa ↄtá lán swagbalawa.

5 Gbɛ̃́ bee a mɛ Dii pↄ́n a ũ, gbɛ̃do a Yakↄbu tↄ́ ble, ado a kɛ̃ a ↄwa, Dii pↄ́, ado a Isaili tↄ́ sɛ́.

6 Ma Dii Zĩgↄ̃de Isailiↄ Kía an Bona, ma mɛ̀, mámɛ má Dↄaana ń Gↄ̃zãnao ũ, ma bàasio diie kuo.

7 Démɛ kàmawai? Aà lɛ́si, aà yã'o. Aà yã́ pↄ́ lɛ́ mↄ́ dau siumɛɛ káau, aà yã́ pↄ́ a su kɛ o.

8 Ásu to vĩa á kũo, ásu gilikɛo. Mi a kpàwakɛɛ́, á mà za káauo lé? Ámɛ á ma seeladeↄ ũ. Diie ku lↄ ma bàasie? Má gbɛsi pãle dↄ̃o.

9 Tã́apinaↄá pↄe no, an zĩ pↄ́ ń pↄ dↄwàↄ ài vĩo. An seelamaakɛnaↄá vĩ̀aↄnɛ, an yãdↄ̃sai a widamá.

10 Tó gbɛ̃́ tã́a pì a kɛ̀ dii ũ, a àikɛɛ̀o.

11 Wí a gbɛ̃́ pↄ́ lɛ́ zↄblenɛ́ↄ kṹ píi, asa an pinaↄá gbɛ̃nazĩnaↄnɛ. Aa kãaa ḿpii aa bↄ gupuau, mí gili gɛ̃ńgu, mí widamá sãnu.

12 Sia ì mↄ da tɛ́u, ì gbɛ̃gbɛ̃ ń masanao, ìpi tã́a ũ ń a gã̀sa gbãao. Ɔ̃ nↄana ì aà dɛ, aà gbãa ì busa, tó i í e mìo, aà yɛ̃̀ɛɛ ì láa.

13 Li'ãna ì ba yↄ̃ líwa, ì a dↄ̀ↄda ń pↄ́ ia boolodabↄo, ì a seelakɛ ń sĩsĩↄnao, ì a tɛ̃ɛkɛ ń kpásagↄ̃nao. Ì ã́ lán gbɛ̃nazĩnawa kɛfɛũkɛfɛũ, kɛ́ àↄ ku a kpɛ́u tã́a ũ.

14 Wì sɛdɛ lí ge giali ge gbɛ̃́nɛli zↄ̃ likpɛu ń pↄeãwa, ge pɛ̃li pↄ́ wa bà, lou tò à zↄ̃ↄkũ̀.

15 Lí dɛ gbɛ̃nazĩnaↄnɛ yàa ũ. Wì sɛ wà tɛ́kpakpaò, wì tɛ́kaò wà pɛ̃ɛkɛò lↄ. Ɔ̃ wì ã tã́a ũ wàↄ kúlɛɛ̀, wì aà kɛ dii ũ wà misiilɛɛ̀ lↄ.

16 Wì a kĩni kátɛu wà blɛkɛò, wì nↄ̀ↄ kpaò tɛ́a wà so wà kã́. Wì tɛ́kpakpaò lↄ wà mɛ: Ũhũu! Ma tɛ́ è sa, ma mɛ kɛ̀ lↄ̀ↄlↄↄ.

17 Ɔ̃ ì a kĩni kɛ tã́a ũ a dii ũ, ì kúlɛɛ̀, ì misiilɛɛ̀, ì wabikɛwà ì mɛ: Ma suaba, asa ma diin n ũ.

18 Aa ↄ̃nↄ vĩo, aali yãmao, wà ↄkùnɛ́ ń wɛ́waɛ, aalɛ gu'eo, wà ń nↄ̀sɛ lìaa, ↄ̃ aa gↄ̃̀ faasai.

19 Aali làasookɛo, aa ↄ̃nↄo. Kɛ́ aa a kĩni kàtɛu, aa pɛ̃ɛkɛ̀ a yↄ̃wa, aa nↄ̀ↄ kpàò tɛ́a aa sò, ↄ̃ aa tã́a kɛ̀ ń a kĩnio, aa misìilɛli pↄ́ aa zↄ̃̀ɛ, aali yã́pi wàaipao.

20 Aalɛ kã́wã wɛɛlɛ tawa lɛ́'iuɛ, an sↄ̃̀ mↄafilide ì ń sã́sã. Aa fↄ̃ ńzĩa misi aa mɛ, pↄ́ pↄ́ wa kũaá pↄ́ ɛgɛnaɛo.

21 Yakↄbu buiↄ, à to yã́ beeↄ dↄágu, asa ma zↄ̀blenaↄn á ũ, Isailiↄ. Ma á kɛ́, ma zↄ̀blenaↄn á ũ, Isailiↄ, á yã́ a sãmaguo.

22 Ma á tàaeↄ bãdɛ̀, aa tà lán louwa, á duuna gɛ̃̀zɛa lán suawa. À ɛa sua, asa ma á bó.

23 Luabɛdeↄ, à gulakɛ, asa Dii kɛ̀, zĩ́lɛdeↄ, à kúkuakɛ. Gbɛ̀sĩsĩↄ à vĩvĩ ń wiitɛ̃nao, likpɛ ń a líↄ píi, asa Dii Yakↄbu buiↄ bò, à tↄbↄ̀ Isailiↄ yã́ musu.

24 Ma Dii á Bona pↄ́ ma á ikàsa nɛasakpɛu, ma mɛ̀ mámɛmaa Dii, ma pↄ́pii kɛ̀, ma musu kpàlɛ mado, ma dṹnia kàlɛ ń mazĩa ↄo.

25 Mi ãnabi ɛgɛnaↄ seela pã́lɛ, mi to màsokɛnaↄ gↄ̃ láanipↄ ũ, mi to ↄ̃nↄnaↄ kpɛkpa, mi ń dↄ̃a liaanɛ́.

26 Mi a zↄ̀blenaↄ yã́ sɛ́ lɛsĩ, mi to ma ìwaↄ lɛdama zĩkɛ, má ò Yelusalɛũ zia a vu, wi ɛa Yuda wɛ̃́lɛↄ kálɛ, wi ń kpɛ́ gbooaↄ kɛkɛ.

27 Mi o ísiɛ aà ba, mi o swaↄnɛ aa gↄ̃ gii.

28 Má ò Kilusi yã́ musu, àↄ dɛ ma sãdãna ũ, kɛ́ à ma pↄeã kɛmɛɛ, i o Yelusalɛũ yã́ musu, wa ɛa kálɛ, wi ma kpɛ́ dↄ.