Isaiah 30 in Boko

1 Ma Dii ma mɛ̀: Waiyoo nɛ́ swã́gbãadeↄ! Aaì yã́ pↄ́ ma lɛ́ kú a guuoↄ yá, aaì kↄ̃ yãma ń gbɛ̃́ↄ, ma Nisĩnali dↄaanɛ́o, aaì duuna kã́fĩ duunaa.

2 Aaì fɛlɛ gɛ́ Egipi, aali lɛzaao, aaì na Falaↄ̃ↄzi ń mìsina ũ, aaì mikpa Egipi uenai.

3 Kási naa Falaↄ̃ↄzi a widawá, mikpaa Egipi uenai a á tↄ́ ↄ̃̀ↄkpa.

4 Baa kɛ́ á gbãadeↄ ku Zoã, mɛ́ á zĩnaↄ kà Anɛsi,

5 wí a ń kṹ ḿpii bui àisaipi yã́i, aa dↄnlɛ ge kã́fĩa e weo, sema wí ń tↄ́ ĩ́io.

6 Nɛgɛvɛ nↄ̀bↄↄ yã́. Wàlɛ guwaiwai pↄ́ yã'ĩa ń taasio vĩ baa vĩ, nↄ̀ↄmusu saↄ ń nↄ̀ↄmusu daↄ ń sↄ̀gbalaↄ ń mlɛ̃̀ pãsĩnaↄ di weɛ. Zàa'ĩnaↄ ń àizɛɛↄ sɛ́sɛa, yiongoↄ lɛ́ kↄ̃́ↄ ɛ́'ɛ ń ń pↄmaaↄ, aalɛ gɛò bui àisaipiↄnɛ.

7 Aalɛ gɛò Egipi pↄ́ an dↄnlɛ gia lán lɛ́'ĩana gbawaɛ. A yã́i tò mi oɛ̀, Ílɛnↄbↄ zↄ̃ↄ pↄewonsai!

8 Dii mɛ̀ mà gɛ́ yã́pi kɛ̃́nɛ́ láu ge pↄ́ pɛpɛɛnawa, iↄ dɛnɛ́ gↄↄ pↄ́ lɛ́ mↄ́pi seela ũ gↄↄpii.

9 Buipiá lualɛwɛnaↄnɛ, nɛ́ sã́sãaↄnɛ, aaliↄ ye swã́sɛa Dii ikoyãizio.

10 Aaì o gu'enaↄnɛ aasu gu'e aai a yã'onɛ́ lↄo, aaì o ãnabiↄnɛ aasu yã́zɛde manɛ́ lↄo. Aaì mɛ: À yã́ nana owɛ̃ɛ, à ãnabikɛyã'òwɛ̃ɛ kpaanla.

11 À kɛ̃́ zɛ́piwa, à pã yãmaaa, à Isailiↄ Lua pↄ́ a kua adoa gáwɛ̃ɛ zɛ́u. Ayãmɛto Isailiↄ Lua pↄ́ a kua adoa yã́ɛ bee ò:

12 Lá a gi yã́pi mai, a gbɛ̃́ↄ bↄ́ↄ'imia náaikɛ̀, mɛ́ a zɛ ń kↄ̃nio,

13 Ayãmɛto duunapi aↄ dɛɛ́ lán gĩ̀ lɛsĩ paaa kↄ̃́ↄdↄa pↄ́ a kwɛ́ kpóokpoo kã́ndowa.

14 A wíwi kɛ́lɛkɛlɛ lán lo pↄ́ oobona gotↄ̃̀wàwa. Wa a kaso e a guu kɛ́ à ká tɛ́sibↄ ge idãbↄ ũo.

15 Dii Isailiↄ Lua pↄ́ a kua adoa yã́ɛ bee ò: Zↄ̃lɛa tɛɛɛ ń sↄ̃daadoũo mɛ́ a á bↄ, laaikpalɛa niɛniɛ mɛ́ á gbãa ũ, ↄ̃ i weio.

16 A mɛ̀: Beewa no! Wá di sↄ̃́ kpɛ wà bàalɛɛ! Á yã́ bee yã́i á bàalɛi sĩana. A mɛ̀: Wá di sↄ̃ wãa kpɛ! Á yã́ bee yã́i á gbɛ̀sɛlɛnaↄ wãa.

17 Tó á gbɛ̃ↄn ↄ̀aa sↄoↄ ń gbɛ̃́ mɛ̀ndo wɛpà, á tílɛɛ. Tó gbɛ̃ↄn sↄoɛ sa, á lɛ́kↄ̃wa píiɛ. Á gbɛ̃́ pↄ́ gↄ̃̀ↄ iↄ zɛ lán lí pↄ́ pɛ́lɛ gbɛ musuwa, lán dàlapoo pↄ́ kú sĩ̀sĩ musuwa.

18 Kási Dii lɛ́ á dã́ à e maakɛɛ́, i fɛlɛ à á wɛ̃nagwa, asa Dii Lua ì yãkɛ a zɛ́waɛ. Báaaden gbɛ̃́ pↄ́ sↄ̃́a Diizi ũ.

19 Á Siↄnadeↄ, á gbɛ̃́ pↄ́ á kú Yelusalɛũↄ, á ↄ́ↄlↄ bau lↄo. Tó Dii á ↄↄlↄ mà, a gbɛ̃kɛkɛɛ́, tó à á wii mà, a wewá.

20 Baa tó Dii taasi dàɛ́ á blɛ ũ, mɛ́ à á dá wɛ́tɛ̃au á imia ũ, á yãdanɛde aↄ ulɛaɛ́ lↄo, á wɛsiaàlɛ.

21 Tó a pãalɛ ↄplaa oi ge zɛɛ oin nò, á swã́lɛ yã́wa á kpɛ à ma, wàlɛ mɛ: Zɛ́n kɛ, àↄ bɛu.

22 I gbasa á tã́a pↄ́ wà ã́nusu lɛ̀wàↄ ń a pↄ́ pↄ́ wà vua lɛ̀wàↄ ↄ̃̀ↄkpa, í ↄzↄ̃i lán bↄlↄwa, í o pↄ́piↄnɛ: À gɛ́i!

23 A á gba lou pↄ́ pↄ́ álɛ tↄ̃́ bua yã́i, tↄↄlɛ a blɛkɛɛ́ maamaa zìtiũ. Gↄↄ bee á pↄtuoↄ sɛ̃ ble dã́dãkɛkĩi yàasau.

24 Zu ń zàa'ĩna pↄ́ aalɛ bua zĩkɛↄ sɛ̃la búuna ń tàaa wisideo ble, wa kálɛnɛ́ ń pɛ́ɛluo ge saa.

25 Gbɛ̃́ↄ dɛdɛa dasidasi gↄↄ, tó pↄ́ lɛsĩ pↄ́ wa bòↄ kwɛ̀, swa pↄ́ a í lí zↄ̃ɛo aↄ ku gbɛ̀sĩsĩↄ ń sĩ̀sĩ lɛsĩↄ musu píi.

26 Tó Dii a gbɛ̃́ↄ gu'ĩaↄ kɛ̀kɛnɛ́, mɛ́ à ń gbãgbã ń ĩa pↄ́ a kpàńzio, mↄvua í aↄ gbãa lán ĩatɛ̃ gupuawa, ĩatɛ̃ gupua a kã́fĩ lɛɛ sopla lán gↄↄ sopla gupuawa.

27 Dii bↄ̀ zã̀zã, àlɛ mↄ́ luabɛsianau, àlɛ pↄbↄ a níu, aà lɛ́baa lɛ́ lua ń kpɛ̃nɛo, aà lɛ́na dɛ tɛ́ pↄkaalɛna ũ.

28 Aà lɛ́'ĩana dɛ lán swa paa í pↄ́ kà ń nↄɛ ísↄ̃wa. Àlɛ buiↄ bobo ń tɛ̃mɛo à ń bãdɛ, àlɛ ã̀asĩna kánɛ à ń sã́sã.

29 Ápiↄ sↄ̃ áↄ lɛsi, lá álɛ dikpɛkɛ Diiɛ gwãasĩnawaɛ, á pↄ a kɛ na, lá álɛ Dii gbɛ̀sĩsĩkũ ń kulɛpɛao álɛ gɛ́ Isailiↄ gbɛsi kĩ́iwa.

30 Dii a to gbɛ̃́ↄ a lↄↄ gawide ma, a to aa a ↄ pↄ́ looańla e. Àlɛ pila ń pↄkũma zↄ̃ↄo ń tɛ́lɛpiↄ pↄkaalɛnao ń lou kwɛao ń zàa'ĩanao ń lougbɛo.

31 Dii lↄↄ a gili gɛ̃ Asiliↄgu, a ń wíwi ń a gopanao.

32 A ń lɛ́ dodo ń go pↄ́ a dìlɛnɛ́o ń gã̀a ↄ́o ń mↄↄna ↄ́o sãnu. A zĩkańnↄ ↄzɛsai.

33 À dↄ̀aa tɛkà à gɛ̃̀gɛ̃ an kía pↄ́ ũ, tɛ́pi kákĩi ɛ zã̀ a yàasa mɛ́ yàa mↄ̀wà. Ĩatɛ̃gbↄ̃ tɛ́sɛa a bↄ Dii lɛ́u a lɛ́'ĩana ũ, i kũwà.