Isaiah 20 in Boko

1 Asiliↄ kí Saagↄ̃ a zĩgↄ̃ↄ gbɛ̃zↄ̃ↄ zĩ̀, ↄ̃ à gɛ̀ lɛ̀lɛ Asedodawa a sì.

2 Wɛ̃ bee Dii yãdà Amↄzu nɛ́ Isaiaɛ à mɛ̀: Gɛ ǹ n zwã̀nkasaↄ woloma, ní n kyaleↄ bↄbↄ. Ɔ̃ a kɛ̀ màa, a bɛ bṹu kyalesai.

3 Ɔ̃ Dii mɛ̀: Lá ma zↄ̀blena Isaia gↄ̃̀ bɛ bṹu kyalesai wɛ̃̀ àaↄ̃ Egipiↄ ń Etiopiↄ yã'ea seela ũ,

4 màa Asiliↄ kía a Egipiↄ ń Etiopiↄ sɛ́lɛ zĩ̀zↄↄ ũ, nɛ́fɛ̃nɛn gbɛ̃zↄ̃ↄ, i táńnↄ bṹu kyalesai. An pↄ̀ↄ iↄ di, aa kpɛbↄ.

5 Gbɛ̃́ pↄ́ aa Etiopiↄ náaikɛ̀ aa Egipiↄ gbãa kɛ̀ↄ gↄ̃ ń bílio, an gɛɛ i gↄ̃ kpá ń wɛ́i.

6 Gↄↄ bee bùsuɛbeedeↄ mɛ: Gwa! Gbɛ̃́ pↄ́ wá ń náai vĩ wa nańzi aa dↄwálɛ aa wá sí Asiliↄ kíawaↄn we fá! Kpelewa wá kɛ wà pilimá sai?