Isaiah 2 in Boko

1 Yã́ pↄ́ Amↄzu nɛ́ Isaia è Yuda bùsu ń Yelusalɛũo musun kɛ:

2 Gↄↄgbɛzãzĩ Dii kpɛ́ gbɛ̀sĩsĩ a gↄ̃ gbɛ̀sĩsĩↄ mide ũ. Wa sɛ lɛsĩ dɛ sĩ̀sĩↄla, bui píi i siu we.

3 Dasi a gɛ́ we aai mɛ: À mↄ wà Dii gbɛ̀sĩsĩkũ, wà gɛ́ Yakↄbu buiↄ Lua kpɛ́u, i wá da a zɛ́wa, wíↄ bɛu. Dii yãdaanɛ́ a bↄ Siↄna, aà yã́ a bↄ Yelusalɛũ.

4 A yã́gↄ̃gↄ̃ buiↄnɛ, a yãkɛkɛ dasiↄnɛ, aai ń fɛ̃ndaↄ gbɛ̃gbɛ̃ lilɛ soona ũ, an sↄ̃naↄ sↄ̃ máaso limibobↄ ũ. Buie a fɛ̃nda sɛ a deezio, wa zĩkaa dada lↄo.

5 Yakↄbu buiↄ, à mↄ́, wàↄ bɛ Dii gupuau.

6 N n gbɛ̃́ Yakↄbu buiↄ vũ̀aa, asa gukpɛ oi yã́ tↄ̃̀máɛ. Aa ↄdìdi màso yã́wa lán Filitɛ̃ↄwaɛ, aa kↄ̃ ↄ kũ̀ ń buipãleↄ.

7 Ãnusu ń vuao di ń bùsuuɛ, an àizɛɛↄ lɛ́ vĩo. Sↄ̃́ di ń bùsuuɛ, an zĩkasↄ̃goↄ lɛ́ vĩo.

8 Pↄ́ pↄ́ aa kɛ̀ tã́aↄ ũ di ń bùsuuɛ, aaì kulɛkɛ ń ↄzĩpiↄnɛ.

9 Gbɛ̃nazĩnaↄ gↄ̃ suuunnↄ, aa gↄ̃ yɛ̀ɛɛ. Ńsu sùuukɛńnↄo!

10 Bàalɛ Dii zↄ̃ↄkɛ gawi pↄ́ ì to vĩa ń kũɛ, ní sↄlↄ gbɛu, ní ulɛ ɛu.

11 Waladeↄ mi a gↄ̃ pɛ́lɛa, gbɛ̃́ↄ ĩ́andãa a midɛ. Dii mɛ́ a tↄbↄ ado gↄↄ beezĩ.

12 Dii Zĩgↄ̃de gↄↄdìlɛ yↄ̃̀ↄdeↄnɛ ń waladeↄ píi ń ĩ́andãna pↄ́ aaì ńzĩa sɛ lɛsĩↄ,

13 Libã bùsu sɛdɛ lí gbã̀a zↄ̃ↄↄ ń Basana bùsu gbɛ̃́nɛliↄ píi,

14 gbɛ̀sĩsĩ misonaↄ ń sĩ̀sĩ lɛsĩlɛsĩↄ píi,

15 kalanga lɛsĩↄ ń bĩ́i gbãaↄ píi,

16 gó'ilɛna laatanaↄ ń gó'ilɛna bɛɛɛdeↄ píi.

17 Gbɛ̃nazĩna wala a kpálɛ, gbɛ̃́ↄ yↄ̃̀ↄkɛa a busa. Dii mɛ́ a tↄbↄ ado gↄↄbeezĩ,

18 tã́aↄ i gɛ̃lɛ míↄ.

19 Tó Dii fɛ̀lɛ ń dṹnia kpoɛao, wa bàalɛ aà zↄ̃ↄkɛ gawi pↄ́ ì to vĩa ń kũɛ, gbɛ̃́ↄ ta gbɛ̀'ɛↄ guu ń vukpɛ'ɛↄ.

20 Zĩbeezĩ aa ń tã́a pↄ́ wa pì ń ã́nusuo ń vuao wà kúlɛnɛ́ kↄ́lɛ ɛ̃́naↄnɛ ń sasiↄ.

21 Tó Dii fɛ̀lɛ ń dṹnia kpoɛao, wa bàalɛ aà zↄ̃ↄkɛ gawi pↄ́ ì to vĩa ń kũɛ, gbɛ̃́ↄ sↄlↄ gbɛ̀'ɛↄ ń gbɛ̀sↄↄↄ guu.

22 Ásu gbɛ̃nazĩna náaikɛo. Ĩana ì weò, bↄ́n aà ũi?