Isaiah 16 in Boko

1 À bùsu gbɛ̃zↄ̃ↄ gba sãↄ à kpã́sãɛ̀, bↄa Sela à ma guwaiwaia e à gɛ ka Siↄna gbɛ̀sĩsĩwa.

2 Mↄabu nↄɛↄ ku Aanↄ buakĩiↄ lán bã pↄ́ wà ń yá ń sakpɛu aalɛ liaaliaaↄwa.

3 Aaì mɛ: Lɛdawá! Lá wá kɛ owɛ̃ɛ! Ue dawála ĩatɛ̃ gbãa zã́ lán gwãasĩnawa. Lala'onaↄ ulɛ, ńsu bↄ ń bàalɛnapiↄo.

4 To Mↄabu lala'onapiↄ aaↄ kú ń bùsuu, ǹ ń ulɛ gbɛ̃́ pↄ́ ye ń kɛ kɛ́lɛkɛlɛɛ. Tó gbɛ̃́ pↄ́ lɛ́ ↄtↄ̃máↄ mìdɛ, mɛ́ an kɛa kɛ́lɛkɛlɛ làa, mɛ́ gbɛ̃́ pↄ́ lɛ́ ↄ̃zↄ̃máↄ sã̀alɛ bùsupiu,

5 kpala a zĩ́napɛlɛ gbɛ̃kɛ guu, Davidi buie a zↄ̃lɛu ń náaio. A kpálɛkɛ yã́zɛdei, aↄ wãa ń yã́gↄ̃gↄ̃anɛ a zɛ́wao.

6 Wa Mↄabuↄ yↄ̃̀ↄ yãmà, an kàamai ń ń zazao zↄ̃ↄ. Aa wala ń ĩ́andão vĩ, kási an yãbↄlɛa píi pãɛ.

7 Bee yã́i Mↄabuↄ lɛ́ ↄ́ↄlↄ, ampii, aalɛ ↄ́ↄlↄ ńzĩa yã́i, aalɛ ↄ́ↄlↄ, aalɛ kàa bɛɛkɛ, kàa pↄ́ wì kɛ ń vɛ̃ɛbɛo Kilalɛsɛ.

8 Asa Ɛsɛbↄ̃ buaↄ ń Sibema vɛ̃ɛbuↄ tↄↄlɛ gàɛ. Buipãle kiblenaↄ ↄ̃zↄ̃̀ ń vɛ̃ɛlipiↄwa. A bú kà yãa za Yazɛɛ e guwaiwai lɛ́wa, aa ↄtà e à gɛ̀ nà ísiawa.

9 A yã́i málɛ ↄ́ↄlↄ Sibema vɛ̃ɛbuↄnɛ lá Yazɛɛdeↄ a ↄ́ↄlↄ̀wa. Ɛsɛbↄ̃deↄ! Ɛlealedeↄ! Ma wɛ́'ikàwá, asa gula pↄ́ ìↄ dↄ yãa saɛ pↄkɛkɛgↄↄ làaɛ.

10 Wà pↄna ń yaalↄo bↄ̀ á kaaↄu, gula ń pↄna wiio dↄ á vɛ̃ɛbuↄ guuo. Gbɛ̃e lɛ́ ↄ̃zↄ̃ vɛ̃ɛwa a ífɛ̃kĩiu lↄo, ma á pↄna súu mìdɛ.

11 Ma nↄ̀sɛ lɛ́ ↄ́ↄlↄ Mↄabuↄnɛ lán mↄↄnawa, ma pↄ yaa Kilalɛsɛ yã́ musu.

12 Tó Mↄabuↄ bↄ̀ gɛ̀ ń sa'okĩi, aaì ĩada ńzĩawaɛ. Tó aa gɛ̀ wabikɛi ń tã́akpɛu, aa ma nao.

13 Yã́ pↄ́ Dii dↄ̀aa ò Mↄabuↄ musun we.

14 Ãma tiasa Dii mɛ̀: Wɛ̃̀ àaↄ̃ lɛ́u lán gbɛ̀wina zĩgↄↄ lɛdilɛawa Mↄabuↄ gawi a láa, an gbɛ̃́ daside a yãfũkũ, an gbɛ̃́ kĩninaↄ fɛ̃́nɛũ a kɛ zài, aaↄ dasio.