Isaiah 13 in Boko
1 Yã́ pↄ́ Amↄzu nɛ́ Isaia è Babɛli musun kɛ:
2 À gilili pɛ́lɛ sĩ̀sĩ wáiwai musu, à kúkua dↄmá à ↄkɛnɛ́ aa si Wɛ̃́ɛↄ bↄlɛↄu.
3 Ma yãdìlɛ ma gbɛ̃́ↄnɛ, ma a gↄ̃sapiↄ sìsi aa mↄ gɛ pↄkũmabↄbↄmámɛɛ, ↄ̃ aalɛ pↄnakɛ ń ma tidↄańlao.
4 Kↄ̃fĩ lòo gbɛ̀sĩsĩↄ musu lán bíla kↄ̃fĩwa, zↄa dↄ buipãleↄ guu lán bui dasiↄ kãaaawa. Dii Zĩgↄ̃de mɛ́ lɛ́ a zĩgↄ̃ↄ kãaa.
5 Aa bↄ̀ bùsu zã̀zãↄu za dṹnia lɛ́wa, Dii ń gbɛ̃́ pↄ́ aaì pↄkũmabↄbↄmáɛpiↄ lɛ́ mↄ́ dṹnia kɛi kɛ́lɛkɛlɛ píi.
6 À búbuapɛ, asa Dii gↄↄ kãikũ̀ɛ, Gbãapiide mɛ́ a ń kaalɛ.
7 A yã́i baade ↄ a gↄ̃ dↄ̀lↄlↄ, sↄ̃ a kɛ̃ gbɛ̃́piigu.
8 Gili a gɛ̃ńgu, wãwã ń gu'ↄ̃amáo a tↄ̃́má. Aaↄ pelembo lán nɛ'inawa, yã́ a dimá, an wɛ́ i tã, aaiↄ kↄ̃ gwa.
9 Gwa! Dii yã́kpalɛkɛgↄↄ lɛ́ mↄ́, aↄ pãsĩ, pↄbↄnniu ń fɛ̃́nkpaao aↄ ku, a dṹnia kɛ kɛ́lɛkɛlɛ, i duunkɛnaↄ dɛdɛu.
10 Saan tↄdeↄ ń a kĩniↄ ikɛ lↄo, ĩatɛ̃ a siakũ za a bilɛkĩi, mↄvua a gupu lↄo.
11 Má ĩada dṹniawa a vãikɛa yã́i, má gotↄ̃ duunkɛnaↄwa ń tàaeↄ yã́iɛ, má waladeↄ yↄ̃̀ↄkɛa midɛ, má gbɛ̃́ pãsĩↄ ĩ́andãa kpálɛ.
12 Má tó gbɛ̃nazĩnaↄ gↄ̃ kálaũkalaũ lán vua tɛ̃ɛtɛ̃ɛwa, gbɛ̃nazĩnaↄ gↄ̃ kásakasa lán Ofii vuawa.
13 A yã́i tò ma Dii Zĩgↄ̃de má musu dee ma pↄkũma yã́i, tↄↄlɛ i lualua za a zĩ́nau ma pↄpaa zↄ̃ↄ gↄↄ.
14 Baade a ta a gbɛ̃́ↄ guu lán tue pↄ́ wàlɛ wɛwa, gbɛ̃́pii a bàalɛ ta a bùsuu lán sã pↄ́ dãna vĩoↄwa.
15 Wa gbɛ̃́ pↄ́ wà kpàaũńnↄↄ zↄ̃, wa gbɛ̃́ pↄ́ wà ń kṹↄ dɛdɛ ń fɛ̃ndao.
16 Wa ń nɛ́ↄ wíwi ń wáa, wa ń kpɛ́ↄ yↄɛ, wi kɛ ń naↄnɛ ń gbãao.
17 Gwa! Má Mɛdɛↄ sóikɛmá. An laai ku ã́nusuwao, an bàa aↄ kú ń vuaoo.
18 Aa ɛ̀waasoↄ dɛdɛ ń kao, aa nɛ́tɛ̃naↄ wɛ̃na boo, aa nɛ́ↄ sósobi vĩo.
19 Babɛliá kpalaↄ mideɛ, Kaladeↄ ĩ́andãbↄ gawideɛ. Ń beeo wa a suumpaɛ lán Sↄdↄũ ń Gↄmↄↄo suumpaawa.
20 Aↄ da bɛzia ũ gↄↄpiiɛ, waↄ ku we bau lↄo. Laalubue a bòokpa weo, pↄdãnae a i weo.
21 Gbáa nↄ̀bↄↄ mɛ́ aaↄ kálɛa we, a kpɛ́ↄ gↄ̃ gbɛ̃gbonaↄ tòo ũɛ. Koohũhũnaↄ zↄ̃zↄ̃ we, tã́aↄ i kìlimpau.
22 Maiↄ wiilɛ a bĩ́iↄ sↄ̀ↄu, gbɛ̃gbonaↄ gbokɛ a namablekĩiↄu. A gↄↄ kãikũ̀, a gↄↄ ga lↄo.