Ezekiel 28 in Boko

1 Dii yã'òmɛɛ à mɛ̀:

2 Gbɛ̃nazĩn nɛ́, o Tii kíaɛ ma Dii Lua ma mɛ̀: Kɛ́ n nzĩa sɛ̀ lɛsĩ yã́i, ni mɛ n kamawa, ń zↄ̃lɛa ma kpalabaawa ísia guo. Gbɛ̃nazĩnan n ũ, Lua no, baa tó ńlɛ e n ↄ̃nↄ kàmawa.

3 N ↄ̃nↄ kà Daniɛliwaa? Asiiyãe ulɛanɛoa?

4 N àizɛɛ kã̀aanzi n ↄ̃nↄ ń n wɛzɛ̃o yã́i, n vua ń ã́nusuo nↄ̀nↄaa n làasiu.

5 N tágɛa ↄ̃nↄ zↄ̃ↄ yã́i n àizɛɛ kã̀fĩi ↄ̃ n nzĩa sɛ̀ lɛsĩ àizɛɛpi yã́i.

6 A yã́i ma Dii Lua ma mɛ̀, lá ńlɛ e n ↄ̃nↄ kàmawaɛ,

7 a yã́i má tó bui zĩ̀loↄ lɛ́lɛma, bui pↄ́ aali gbɛ̃́ wɛ̃nagwaoↄ. Aa fɛ̃nda wo n kɛfɛnkɛ ń n ↄ̃nↄozi, aa n gawi pípia ↄ̃̀ↄkpanɛ.

8 Aa n kpa bɛdau, n gaa aↄ pãsĩ ísia guo.

9 Ńyↄ̃ e o gbɛ̃́ pↄ́ lɛ́ n dɛↄ wáa n kamawae? Gbɛ̃nazĩnan n ũ gbɛ̃́piↄnɛ, Lua no.

10 Gyafↄↄde gaa ńyↄ̃ ga a ũ bui zĩ̀loↄ ↄzĩ, asa ma yã'ò. Ma Dii Lua mámɛ má ò.

11 Dii yã́ ɛ̀a dɛ̀dɛa à mɛ̀:

12 Gbɛ̃nazĩn nɛ́, wɛ̃nalɛɛ bee da ń Tii kíao, ní mɛɛ̀ ma Dii Lua ma mɛ̀: Gbɛ̃́ wásawasa sãasain n ũ, n ↄ̃nↄ pɛ̀ɛma, n kɛfɛnkɛ lɛ́so.

13 Ń kú ma swalu guu Edɛni, gbɛ̀ bɛɛɛde píi dɛ n pↄnanzi ũ: Lubii, topaza, ɛmɛlodi, kisoliti, onisi, diamaa, safii, tiikↄazi ń yasepeo. Vua wà gbɛ̀ bɛɛɛdepiↄ kũ̀kũò zãblebↄↄ ũ. Gↄↄ doũ zĩ wà n kɛ ń pↄ́piↄ.

14 Ń dɛ malaika gã̀sĩade pↄ́ má dìlɛ àↄ ku ma kúkĩi ũ. Ń kú ma gbɛ̀sĩsĩ pↄ́ a kua adoa musu, n táa'ò gbɛ̀ bɛɛɛde tɛkɛaↄ guu.

15 Zaa wà n kɛ ń tàae vĩ n yãkɛauo, e gↄↄ pↄ́ wà dↄ̀ↄsaikɛ èma.

16 N tágɛa zã̀zã guu pãsĩ pɛ̀ɛma, n duunakɛ̀, ↄ̃ ma a gbɛ̀sĩsĩ zↄ̃̀nɛ. Malaika gã̀sĩade pↄ́ kú ma kúkĩia, ma n ya n bↄ gbɛ̀ bɛɛɛde tɛkɛaↄu.

17 N nzĩa sɛ̀ lɛsĩ n kɛfɛnkɛ yã́i, n ↄ̃nↄ kɛ̀ búi, ↄ̃ ma n zu dṹniau, ma n kɛ pↄgwagwaa ũ kíaↄ aɛ.

18 N duun dasiↄ ń n tágɛa dↄ̀ↄsaiↄ yã́i n gbãsĩsaikɛ ↄ̃̀ↄkpà, ↄ̃ má tò tɛ́ bↄ̀ n guu, à kũ̀ma, ↄ̃ n gↄ̃ túfu ũ tↄↄlɛ gbɛ̃́ pↄ́ lɛ́ n gwaↄ aɛ.

19 Yã́pi dì bui pↄ́ n dↄ̃ↄwa píi, n kaalɛa vãi, ńyↄ̃ↄ ku bau lↄo.

20 Dii yã'òmɛɛ à mɛ̀:

21 Gbɛ̃nazĩn nɛ́, wɛbiibii Sidↄ̃ oi, ní ãnabikɛkɛ a yã́ musu

22 ǹ mɛ ma Dii Lua ma mɛ̀, má fɛlɛ ń Sidↄ̃o saɛ, wi ma kpɛla aà yã́i. Tó ma yã́kpalɛkɛ̀aànↄ, mɛ́ ma tↄbↄ̀ aà yã́ musu, wi dↄ̃ kɛ́ mámɛmaa Dii.

23 Má gagyã zĩwàɛ, au i bàalɛ aà zɛaↄu. Wa liaaàzi, wi zĩkaaànↄ, gbɛ̃́ↄ i kwɛ aà guu gɛↄ ũ, aai dↄ̃ kɛ́ mámɛmaa Dii.

24 Bui pↄ́ liaa Isailiↄzi, aaì sakańgupiↄ aaↄ dɛnɛ́ lɛ pↄ́ ì ń zↄ̃ à ń wãwã ũ lↄo, wiↄ dↄ̃ kɛ́ mámɛmaa Dii Lua.

25 Ma Dii Lua ma mɛ̀, tó ma Isailiↄ bↄ̀lɛ bùsu pↄ́ aa fãaaaↄ guu ma ń kãaa, mɛ́ ma tↄbↄ̀ ń yã́ musu buiↄ wáa, aaↄ ku bùsu pↄ́ má kpà ma zↄ̀blena Yakↄbuwau.

26 Tó ma yã́kpalɛkɛ̀ ń bui pↄ́ liaańzi aa sakàńgupiↄ, Isailiↄ iↄ ku bùsupi guu dↄdↄa, aai kpɛdↄdↄu, aai vɛ̃ɛbuↄ kɛu, aai dↄ̃ kɛ́ mámɛmaa Dii ń Lua.