1 Chronicles 29 in Boko

1 Ɔ̃ kí Davidi ò gbɛ̃́ pↄ́ kãaaaↄnɛ píi: Ma nɛ́ Salomↄↄ pↄ́ Lua aà sɛ̀piá ɛ̀waason bↄlↄnaɛ. Zĩpi zↄ̃ↄ, asa uapiá gbɛ̃nazĩna pↄ́ no, Dii Lua pↄ́ɛ.

2 Ma Lua kpɛ́pi dↄa sↄukɛ̀ maamaa ma gbãa lɛ́uɛ, ma vua kpà vua zĩ pↄ́ ũ ń ã́nusuo ã́nusu zĩ pↄ́ ũ ń mↄgotɛ̃o mↄgotɛ̃ zĩ pↄ́ ũ ń mↄsio mↄsi zĩ pↄ́ ũ ń lío lí zĩ pↄ́ ũ ń gbɛo gbɛ̀ zĩ pↄ́ ũ ń onisio ń tiikↄazio ń gbɛ̀ bɛɛɛde bui píio ń gbɛpuao.

3 Bee gbɛa lá ma Lua kpɛ́ yã́ kàmagu, vua ń ã́nusu àizɛɛ pↄ́ má vĩↄ, ↄ̃ má kpá ma Lua kpɛ́ pↄ́ ũ pↄ́ pↄ́ ma a sↄukɛ̀ↄ bàasi:

4 Ofii bùsu vua tↄnu basↄo ń ã́nusu tɛ̃ɛtɛ̃ɛo tↄnu ↄ̀aa do ń blao, kɛ́ wà kpa kpɛ́pi gĩↄwa a guu.

5 Vuaá vua zĩ pↄ́ɛ, ã́nusuá ã́nusu zĩ pↄ́ɛ ń zĩ pↄ́ gↄ̃ideↄ kɛↄ píi. Á démɛ zɛ̀ò gbã à kpa Diiwa sↄũsↄũi?

6 Ɔ̃ uabeleↄ ń Isaili bui kíaↄ ń zĩgↄ̃ gbɛ̃ↄn ↄ̀aasↄsↄoↄ dↄaanaↄ ń gbɛ̃ↄn basↄobasↄoↄ dↄaanaↄ ń kíapi ziiaↄ vua ń ã́nusuo kpà.

7 Aa vua kpà tↄnu baswaaↄ̃kwi (170) wà Lua kpɛ́pi zĩ kɛò ń ã́nusuo tↄnu ↄ̀aa do ń basoplao (340) ń mↄgotɛ̃o tↄnu ↄ̀aa àaↄ̃ ń kwio (610) ń mↄsio tↄnu ↄ̀aa gɛ̃o ń plao (3.400).

8 Gbɛ̃́ pↄ́ gbɛ̀ bɛɛɛdeↄ vĩↄ nà Geesↄ̃ bui Yeiɛliɛ a ↄzĩ Dii kpɛ́ làasiu.

9 Gbɛ̃́pii pↄ kɛ̀na pↄ́ pↄ́ wa kpàpi yã́ musu, asa aa kpà Diiwa ń nↄ̀sɛmɛndooɛ. Kí Davidi pↄ kɛ̀na maamaa,

10 ↄ̃ à Dii sáaukpà gbɛ̃́ pↄ́ kãaaa weↄ wáa à mɛ̀: Ɛ̀fãaide Dii wá dezi Isaili Lua za asĩnizĩ e gↄↄpii!

11 Dii, ḿmɛ ń zↄ̃ↄkɛ ń gbãao ń bɛɛɛo ń dɛnlao ń gawio vĩ, asa pↄ́ pↄ́ kú musu ń zĩ́lɛoↄá n pↄ́ɛ píi. Ḿmɛ ń kía ũ, ḿmɛ ń pↄ́pii mide ũ.

12 Àizɛɛ ń bɛɛɛo ì bↄ n kĩ́iɛ, ni kible pↄ́piiwa. Iko ń gbãao ku n ↄzĩɛ, ń gbɛ̃́pii kã́fĩa zɛ́ vĩ, mɛ́ ń ń gbaa gbãa zɛ́ vĩ lↄ.

13 Tiasa wá Lua, wálɛ n sáaukpa, wálɛ n tↄ́ bɛɛɛde bↄ.

14 Ée, dén ma ũ ge ma gbɛ̃́ↄ, kɛ́ wà gbasa pↄ́ kpama màai? Pↄ́pii ì bↄ n kĩ́iɛ. Pↄ́ pↄ́ wa kpàma bↄ̀ n ↄzĩɛ.

15 Wá dɛnɛ bↄ̀mↄↄ ũ, nibↄↄ ũ lán wá deziↄwaɛ. Wá kua dṹniau dɛ lán uenawa tãmaasaiɛ.

16 Dii wá Lua, pↄzↄ̃ↄ pↄ́ wá kpà n kpɛ́ dↄa yã́i, kɛ́ n tↄ́ pↄ́ a kua adoa e àↄ kuwà, apii bↄ̀ n ↄzĩɛ, n pↄ́ɛ.

17 Ma Lua, má dↄ̃ kɛ́ sↄ̃̀ tàasikanan n ũ, yãkɛa a zɛ́wa mɛ́ ì kangu. Ma pↄ́piↄ kpàma píi ń nↄ̀sɛpuaoɛ, ↄ̃ má è n gbɛ̃́ pↄ́ kú laↄ pↄ́ kpàma ń pↄnao sↄ̃.

18 Dii wá deziↄ Ablahaũ ń Izaakio ń Isailio Lua, to n gbɛ̃́ↄ lí zɛò beewa ń sↄ̃ guu, ní tó an sↄ̃ àↄ kuma gↄↄpii.

19 Ma nɛ́ Salomↄↄ gba zɛ́ aàↄ n yãdilɛaↄ ń n ikoyãↄ kũa ń nↄ̀sɛmɛndoo, i n ↄtondↄkĩi gwa à zĩkɛwà píi, i n kpɛ́ pↄ́ ma a sↄukɛ̀ dↄ.

20 Ɔ̃ Davidi ò gbɛ̃́ pↄ́ kãaaa weↄnɛ: À Dii á Lua sáaukpa! Ɔ̃ gbɛ̃́ pↄ́ kãaaa weↄ Dii ń deziↄ Lua sáaukpà, aa mipɛ̀lɛ aa kùlɛ Diiɛ, aa kùlɛ kíaɛ lↄ.

21 Kɛ́ gu dↄ̀ aa sa'ò Diiwa. Aa sa pↄ́ wì a pↄ́ kátɛu à tɛ́kũ òwà ń zuswanaↄ mɛ̀n ↄ̀aa sↄo ń sãsakaoↄ mɛ̀n ↄ̀aa sↄo ń sãsa bↄlↄnaↄ mɛ̀n ↄ̀aa sↄo. Aa vɛ̃ɛ ɛ̀lɛwà aa sáaukpa sa'òwà dúuduu Isaili píi pↄ́ ũ.

22 Gↄↄ bee aa pↄblè aa vɛ̃ɛmì Dii aɛ ń pↄna zↄ̃ↄo. Ɔ̃ aa Davidi nɛ́ Salomↄↄ kpaa kía ũ gbãa kã̀fĩ. Aa aà kpà kía ũ Dii aɛ sa, ↄ̃ aa Zadoki dìlɛ sa'onkia ũ.

23 Ɔ̃ Salomↄↄ zↄ̃̀lɛ kpalau a mae gbɛu kía pↄ́ Dii kpà ũ. À gwea è mɛ́ Isaili bui píi misìilɛɛ̀.

24 Kíaↄ ń nɛgↄ̃naↄ ń kí Davidi nɛgↄ̃ɛↄ píi mikpà kí Salomↄↄwa.

25 Dii tò Salomↄↄ zↄ̃ↄkɛ kã̀fĩ maamaa, Isaili bui píi wɛ́ è. Dii kíakɛgawi kpàwà, Isailiↄ kía pↄ́ dↄaaaɛ̀ↄ, an kee i kaaàwao.

26 Yɛse nɛ́ Davidiá Isaili buiↄ píi kíaɛ.

27 À kɛ̀ kpalau wɛ̃̀ blaɛ, Hɛblↄ̃ wɛ̃̀ sopla, Yelusalɛũ sↄ̃ wɛ̃̀ baakwi ń àaↄ̃o.

28 À zikũ̀ táotaoɛ, ↄ̃ à gà. Ɔdeɛ mɛ́ a bɛɛɛ vĩ. Ɔ̃ aà nɛ́ Salomↄↄ zↄ̃̀lɛ aà gbɛu.

29 Kí Davidi yãkɛaↄ ku gu'ena Samuɛli taalau ń ãnabi Natã láo ń gu'ena Gada láo za a daalɛawa e a midɛawa,

30 aà kpalablea yã́ↄ ń aà nɛgↄ̃nkɛyãↄ ń yã́ pↄ́ aà lèↄ ń yã́ pↄ́ Isailiↄ ń bùsu pↄ́ liaai kíaↄ lèↄ.