Revelation 16 in Algonquin
1 Ick8a dac ii, nigi noda8a a8iag pidigamig kitci aiamiemigi8amikag e kitci kiji8edj. Odinabanin ini8e ka nij8atcindjin ajenin: “A8i siginamokon akikag ini onaganan ka kicponebigin Kije Manido onickadizi8in. Mi iji siginamokon midjinij8atcin.”
2 Nitam dac aa8e ajeni ogi a8i siginan odonagan akikag. A8iagog dac madji a8esizan okikina8adjibiigani ka aiamo8apan acitc ka icpenima8apanin omanidokanimini, madji omigi8inan e kitci 8isagendamigo8apanin ogi odji aiana8an.
3 Mina8adj kodag ajeni ogi a8i siginan odonagan kitcigamikag. Ki ani misk8i8agamise dac kitcigami. Mi maia a8iag ka nibodj omisk8i ejinag8anigiban. Midac kakina kegonan anamidim kitcigamig ka iji nibomagagin.
4 Mina8adj kodag ajeni ogi a8i siginan odonagan, mi aja nisin ajenig egi siginamo8adjin. Ogi siginan dac sibikag acitc mokidji8anobikag, mi acitc ka ani iji misk8i8agaminigin.
5 Nigi noda8a dac aa ajeni ka nagadjitodj nibini e taji icpenimadjin Kije Manidon e ikidodj: “Kin eta kikitcit8a8izinan. 8eckadj kigi te acitc nogom kiabadj kipimadizinan. K8aiak kigi tibakonige.
6 Igi a8iagog ogi nisa8an niganadjimo8innin acitc kidanicinabeman, nogom dac kigi minag misk8ini kidji minik8e8adj. 8ina8a ka todadizo8adj, 8edji ijise8adj,” ki ikido.
7 Midac kitcit8a 8isini8aganikag taji ka iji icpenimagani8idj Kije Manido nigi odji noda8a a8iag e ikidodj: “Kije Manido, ka Tibendjigean, kin ma8adji ka kitci macka8izian! Kabena k8aiak kitibakonige. Pajacte8agani8i8ag adi kagi ijitcige8adj.”
8 Mina8adj kodag ajeni ogi a8i siginan odonagan, mi aja ni8in ajenig egi siginamo8adjin. Kizisokag ogi iji siginan. Na8adj ki ani kijizo kizis kidji gi ick8az8adjin a8iagon.
9 Apitc kagi kitci ick8azo8adj iidi, ka8in misa8adj odji an8endizosi8ag acitc ka8in ododji icpenimasi8a8an Kije Manidon. Tiegodj ogi manazoma8an Kije Manidon, 8in mega ka pidjinijaagin ini kodagito8inan.
10 Mina8adj kodag ajeni ogi a8i siginan odonagan, mi aja nanan ajenig egi siginamo8adjin. Madji a8esizan okitci ogima8i tesabi8aganikag ogi iji siginan. Ki kacki tibikani taji ka iji ogima8idj. Ogi kitci mag8adana8an odenana8an a8iagog, epitci kitci 8isagendamo8apan.
11 Ogi manazoma8an Kije Manidon 8ak8ig ka ogima8indjin, okodagito8ini8an acitc odomigi8ini8an odji. Ka8in dac odji an8endizosi8ag egi madji ijitcige8adj.
12 Mina8adj kodag ajeni ogi a8i siginan odonagan, mi aja nigod8atcin ajenig egi siginamo8adjin. Ka kitci kinotig8eag sibi Iopinat (Euphrate) ka ijinikadeg ogi iji siginan. Ki ani iskate ii sibi, kidji gi ajo8agame8adj ogimag 8abanog ka odose8adj.
13 Midac nisin madji manidog nigi 8abamag, mi maia omakakig ejinagozi8apan. Pejig dac kitci kikadanak odonikag odji sagidjise8an, kodag madji a8esiz odonikag odji sagidjise8an, acitc kodag ini8e ka in8ekazonipanin “niniganadjimo8inni8inan” odonikag odji sagidjise8an.
14 Igi8e dac madji manidog mamada8izi8ag. Kakina dac ogiman mizi8ekamig onazika8a8an. Oma8adjia8an dac kidji ijandjin ke iji migadinani8anig apitc odjitcisenig okitci kijigom Kije Manido ma8adji ka kitci macka8izidj.
15 Ka Tibendjigedj ikido: “Ndotamok, niga pija apitc ega piijieg, tabickotc kimodi8inni ka kimodji pijadj. Ca8endagozi aa8e ega ka nibadj e piijidj, acitc kijadj ka ijiodj, ega kidji paba moceckadedj kidji agazinagozidj apitc 8abamagani8idj.”
16 Igi dac nisin madji manidog, ogi ma8adjia8an ogiman mizi8e akikag ka odjindjin, 8edi Armageddon ka ijinikadenig, Coda8inni ijigij8e8in.
17 Midac kodag ajeni ogi a8i siginan odonagan, mi aja nij8atcin ajenig egi siginamo8adjin. Anodj ka iji nodinig ogi iji sig8ebinan. A8iag kitci ogima8i tesabi8aganikag, kitci aiamiemigi8amikag ka iji tag8ag, ki odji kiji8e e ikidodj oo8e: “Mi aja ki kijitcigade!”
18 Ki kitci 8a8asakonese, kegon ki kitci nodag8an, ki nodagozi inimiki, acitc ki kitci k8ig8an. Ka ako kijenimadjin a8iagon Kije Manido, ka8in 8ikad ki apitci kitci k8ig8asinon.
19 Nisin ki iji tackise ii kitci odena, Babilon ka ijinikadeg, acitc kakina odenan mizi8ekamig ki nici8anadjiomaganon. Ka8in odji 8anikesi Kije Manido ii kitci odenani. Ogi kitci kiji8aigon mega. Panima dac ki tcagadjigadenig ka kitci macka8agaminig cominaboni Kije Manidon kagi siginamindjin odonaganikag, ii cominaboni tabickotc onickadizi8ini ka apitendag8anig.
20 Kakina minitigon acitc pik8adinan kaiezigotc ka8in ki odji nag8asino8an.
21 Kitci mik8amig paba pagicinobanig a8iagokag, pepejig dac igi mik8amig midasomidana tibabadjigan apitanicibanig. A8iagog dac omanazoma8abanin Kije Manidon, osa mega okodagiigona8a e miziganig. Maiagotc ki kitci kotadendag8an ii kodagito8in.