Psalm 69 in Maale

1 ማኣዶ ዴንቃኒ ሺኢቂንቴ ሺኢጲሢ ፆኦሲዮ! ታና ዓውሴ፤ ዋኣፃ ታኣኮ ቆርጮ ሄሌኔ።

2 ቶኪ ዔቃ ቤሲባኣ ዔቴ ቶኦጶይዳ ታኣኒ ጌሊ ዔኤዺንቴኔ፤ ዔታዻ ቁልቤ ዋኣሢዳ ታ ጌሌኔ፤ ዋኣፆ ጉዳሢያ ታና ዔኤዼኔ።

3 ዒላቲና ታ ላቤኔ፤ ቆርጫኣ ታኣኮ ፃኣዼኔ፤ ታ ፆኦዛሢኮ ጎይፆ ታ ዛጋንቴ ዓኣፓ ታኣኮ ታይሬኔ።

4 ታኣኒ ማዼ ባኣዚባኣንቴ ታና ዒፃ ዓሳ ታ ቶኦኮ ጋፓናፓ ባሼ ሚርጌኔ፤ ሼምፓሢ ታኣኮ ባይዛኒ ኮዓ ዓሳ ጉሪ ታና ዒፃ ዓሳ ሚርጌ ማዔኔ፤ ዉኡቂ ታኣኒ ዔኪባኣ ባኣዚ «ማሂ ዔኪ ዬዔ» ጌይንቴኔ።

5 ፆኦሲዮ! ኔኤኒ ታኣኮ ዔኤያቶ ዔራኔ፤ ታ ዻቢንታ ኔኤም ዓኣሺንቴያቱዋሴ።

6 ቢያ ባኮ ዎይሣ ጎዳሢዮ! ኔና ዎዛ ማሂ ካፓ ዓሳ ታ ጊዳ ማዺንታ ባኮ ዛጊ ቦርሲንቶፓ፤ ናንጊና ናንጋ ጎዳ ማዔ ዒስራዔኤሌ ፆኦዛሢዮ! ኮሺ ኔና ኮዓ ዓሳ ታ ጊዳ ማዺንታ ባኮ ዛጊ ዻውሲንቶፓ።

7 ኔ ጋይቴ ጌዒ ጫሺ ታ ጊቤኔ፤ ቦርሲንቲና ዓኣፖ ካራ ታኣኮ ቦኦሬኔ።

8 ታ ጌርሲንሢም ዓዳ ፃንጎ ዓሲጉዲ ታኣኮ ዒንዶ ናኣቶማኣ ሾኦቺ ታ ማዔኔ።

9 ኔ ማኣሮ ዛሎ ባካ ታና ሻላኔ፤ ኔና ጫሽኮ ጫዣ ታ ዑፃ ማዔኔ።

10 ሼምፓሢ ታኣኮ ታ ሙዖ ሃሾ ዳምቦና ሜታሴኔ፤ ዬያሮዋ ዔያታ ታና ፓሴኔ።

11 ሲዮ ፓቲሎ ታ ማይንቴ ዎዶና ዔያታ ታና ዓማሊ ማሂ ሚኢጬኔ።

12 ዲሮ ካራ ዴዓ ዓሶም ጌኤሲ ጌስቶያ ማሢንቴ ዓሶማኣ ኮሢ ኮርጎያ ታ ማዔኔ።

13 ናንጊና ናንጋ ጎዳሢዮ! ኔ ናሽካ ዎዶና ታ ኔና ሺኢቃንዳኔ፤ ፆኦሲዮ! ኔኤኮ ዼኤፖ ማኣሪፆና ኔኤኮ ዓውሲፆ ጎኑሞና ታኣም ዋይዜ።

14 ቶኦጳሢዳፓ ታና ኬሴ፤ ዔኤዺንታንዳጉዲ ታና ሃሺፖ፤ ዋኣፆ ዔታፓ ዬያቶንታ ታና ዒፃዞንሢናፓ ሄሊ ዓውሴ።

15 ዲጳ ኩሚ ዔኪ ታና ዓኣዾፓ፤ ዋኣፆ ዔታኣ ታና ዔኤዾፓ፤ ዔታ ዶዒ ካሮ ታኣኮ ባይዞፓ።

16 ናንጊና ናንጋ ጎዳሢዮ! ማኣሪፃ ኔኤኮ ሚርጌ ማዔሢሮ ታኣም ዋይዜ፤ ኔኤኮ ሚጪንቶ ሚርጉሞና ታ ባንሢ ሺሬ።

17 ታና ኔ ዓይላሢዳፓ ዓኣፖ ኔኤሲ ሺርሺፖ፤ ታኣኒ ሜቶይዳታሢሮ ዑኬና ታኣም ዋይዜ።

18 ታ ባንሢ ሙኪጋፓ ታና ዓውሴ፤ ታ ሞርኮ ኩጫፓኣ ታና ጊንሣ ማሂ ሻንቂ ዓይሴ።

19 ታና ሄሌ ጫዦንታ ቦርሲንቶንታ ዻውሲንቶዋ ኔ ዔራኔ፤ ታኣኮ ሞርኮዋ ፔቴ ፔቴ ኔ ዔራኔ።

20 ጫዣ ዒኖ ታኣኮ ሜንሤኔ፤ ዎዛ ባይቂ ታኣኮ ጋፔኔ፤ ታኣም ሚጪንታ ዓሲ ታ ኮዔኔ፤ ጋዓንቴ ታ ዴንቂባኣሴ። ታና ዶዲሻ ዓሲያ ታ ኮዔንቴ ፔቴታዖ ባኣሴ።

21 ዔያታ ሙዖ ታኣኮ ጪሼና ሲኢሬኔ፤ ታ ዼኤቢንታዛ ሶልኪ ዑሺ ታኣም ዒንጌኔ።

22 ዔያቶም ሺኢሾና ካፃ ፒሮ ዔያቶም ማዖንጎ፤ ዔያቶኮ ሙዖሮ ቡኪንቲፃኣ ባይሲንታ ካራ ማዖንጎ።

23 ዓኣፓ ዔያቶሲ ዛጉዋጉዲ ዹሞንጎ፤ ጊኢራ ቢያ ዎዴ ዎቦንጎ።

24 ዱማ ዱማ ኔኤኮ ዎዻ ባኮ ዔያቶ ዑፃ ኬይሴ፤ ዔያታ ዔሪባኣንቴ ኔ ዻጎ ዔያቶ ዑፃ ጮኦሽኬ።

25 ጉርዳ ዔያቶሲ ዳውሌ ማዖንጎ፤ ዓፒሎና ማዦና ማኣራ ዔያቶኮ ዓሲ ናንጎፓ።

26 ኔ ጳርቄ ዓሶ ዔያታ ዳውሴኔ፤ ኔ ኪፃሴ ዓሶኮ ሜታሢ ዔያታ ዳልጊሼኔ።

27 ዻቢንቶይዳ ዔያቶኮ ዻቢንቲ ቃሴ፤ ኔ ፂሉሞ ባንሢያ ዑኮፓ።

28 ናንጎ ማፃኣፓፓ ዔያታ ቃኣጪንቶንጎ፤ ፂሎ ዓሶና ዎላ ፃኣፒንቶፓ።

29 ጋዓንቴ ታኣኒ ሜቶ ዋኣዪሢዳ ዓኣኔ፤ ፆኦሲዮ! ኔኤኮ ዓውሲፃ ኬልቂ ታና ዓርቆንጎ።

30 ፆኦሲኮ ሱንፆ ጋላቲሢና ታ ዓይናዻንዳኔ፤ ጋላቲሢና ታኣኒ ዼግ ዼጊዳንዳኔ።

31 ዬይያ ጌማይዳፓ ባሼ ጉራኒንታ ሹቁሊንታ ኬሴ ዚያ ጌማይ ዒዛም ዒንጊሢዳፓ ባሼ ናንጊና ናንጋ ጎዳ ዎዛሳኔ።

32 ማንቆ ዓሳ ዬያ ዛጋዖ ዎዛዻንዳኔ፤ ዒንሢ ፆኦሲ ኮዓ ዓሳ ዒና ዒንሢኮ ዶዶንጎ።

33 ናንጊና ናንጋ ጎዳ ሜታዼ ዓሶኮ ዒላቶ ዋይዛኔ፤ ቱኡቲ ዓኣ ዓሶዋ ዒዚ ቶኦዛዺ ዛጉዋሴ።

34 ጫሪንጮንታ ሳዖንታ ባዞንታ ዬያኮ ጋሮይዳ ዓጊፃ ባካ ቢያ ፆኦሲ ጋላቶንጎ።

35 ፆኦሲ ፂዮኔ ዓውሳንዳኔ፤ ዪሁዳ ካታሞዋ ማሂ ጊንሣ ማዣንዳኔ፤ ዬካፓ ዴራ ዒዛኮ ዒኢካ ናንጋንዳኔ፤ ሳዔሎዋ ዔያታ ፔኤሮ ማሃንዳኔ።

36 ዒዛ ዓይሎ ዜርፃ ዬኖ ዻካላንዳኔ፤ ዒዛ ናሽካዞንሢያ ቢያ ዒኢካ ናንጋንዳኔ።