Psalm 135 in Maale

1 ናንጊና ናንጋ ጎዳ ጋላቱዋቴ! ዒንሢ፥ ናንጊና ናንጋ ጎዳኮ ዓይላ ዒዛኮ ሱንፆ ቦንቺ ጋላቱዋቴ።

2 ኑ ፆኦዛሢኮ ጌኤዦ ማኣሮይዳ ናንጊና ናንጋ ጎዳኮ ማኣሮ ጋሮይዳ ሙኪ ዔቂ ማዾ ማዻ ዓሳ ዒዛ ጋላቱዋቴ።

3 ዒዚ ኮሺ ማዔሢሮ ናንጊና ናንጋ ጎዳ ጋላቱዋቴ፤ ዒዚ ሚጪንታያ ማዔሢሮዋ ሱንፆ ዒዛሲ ቦንቺ ዓይናዹዋቴ።

4 ዒዚ ያይቆኦቤ ፔኤም ማሂ ዒስራዔኤሌ ፔ ሚኢሼ ማሂ ዶኦሬኔ።

5 ናንጊና ናንጋ ጎዳ ዼኤፒታሢ ኑ ጎዳ ሜሌ ፆኦዞፓ ቢያ ባሻያ ዼኤፒ ፆኦሲ ማዔሢ ታ ዔራኔ።

6 ናንጊና ናንጋ ጎዳ ጫሪንጮይዳ ሳዖይዳ ዬያጉዲ ዼኤፖ ባዞይዳ ኮይሴ ባኣዚ ቢያ ዒ ማማዻያኬ።

7 ዒርዚና ዓኣ ሻኣሬ ሳዖኮ ጋፓፓ ዔኪ ዬዓኔ፤ ዒራ ዋርቃኣና ዜኤሊንሢ ዒዚ ዜኤሊንሢሳኔ፤ ዢባሮዋ ፔ ኮናፓ ኬሲ ዳካኔ።

8 ጊብፄ ዓጮይዳ ዓሶንታ ቆሎንታኮ ቶይዶ ናኣቶ ዎዼሢ ዒዛኬ።

9 ጊብፄ! ኔ ጊዳ ኔኤኮ ካኣቲንታ ዒዛም ማዻ ዓሶ ቢያሢዳ ሜቶ ዓጋኒ ፔ ዎልቆና ማዺንታ ባኣዚንታ ዲቃሢ ሄርሺሳ ባኣዚ ናንጊና ናንጋ ጎዳ ዳኬኔ።

10 ዒዚ ሜሌ ሚርጌ ዴሬ ዎዺ ኩርሴኔ፤ ዼኤፖ ዼኤፖ ካኣቶዋ ዎዼኔ።

11 ዓሞራ ዓሶ ካኣቲ ሲሆኔ ባኣሳኣኔ ዓሶ ካኣቲ ዖኦጌ ካኣናኔ ዓጮ ካኣቶዋ ቢያ ዒዚ ዎዼኔ።

12 ዬያቶ ዓሶኮ ሳዖ ፔ ዴሮ ዒስራዔኤሌም ዴኔ ማሂ ዒዚ ዒንጌኔ።

13 ናንጊና ናንጋ ጎዳሢዮ! ሱንፃ ኔኤኮ ናንጊና ናንጋያኬ፤ ዎዶና ዎዶና ኬስካ ዓሳ ቢያ ኔና ዋሉዋ ጶቂሣንዳኔ።

14 ናንጊና ናንጋ ጎዳ ፔ ዴሮም ፒዜ ዎጌ ዎጋኔ፤ ዒዛም ማዻ ዓይሎማኣ ሚጪንታኔ።

15 ሜሌ ዴሮኮ ፆኦዛ ቢራ ዓንጊና ዎርቄናይዳፓ ዹይ ኮሾናያኬ።

16 ዬያ ፆኦዞኮ ዻንጋ ዓኣዖ ጌስቱዋያ ዓኣፒ ዓኣዖዋ ዴንቁዋያኬ።

17 ዋይዚያ ዓኣኔ፥ ጋዓንቴ ዋይዙዋሴ፤ ፔ ሲኢዾና ዑኡሲ ዔካኒ ዳንዳዑዋያኬ።

18 ዬያቶ ኮሼ ዓሶንታ ጉሙርቃ ዓሳኣ ቢያ ዬያቶ ፆኦዞጉዲ ማዒ ዓቶንጎ።

19 ዒስራዔኤሌ ዴሬዮቴ! ናንጊና ናንጋ ጎዳ ጋላቱዋቴ፤ ዒንሢ፥ ናንጊና ናንጋ ጎዳም ማዻ ቄኤሳ! ናንጊና ናንጋ ጎዳሢ ጋላቱዋቴ።

20 ዒንሢ ሌዊ ፃጶ ማዔ ዓሳ! ናንጊና ናንጋ ጎዳ ጋላቱዋቴ፤ ዒንሢ፥ ናንጊና ናንጋ ጎዳሢ ቦንቻ ዓሳ ቢያ ዒዛ ጋላቱዋቴ።

21 ናንጊና ናንጋ ጎዳ ፂዮኔይዳ ጋላቱዋቴ፤ ዒዚ ናንጋ፥ ዬሩሳላሜይዳኣ ጋላቱዋቴ። ናንጊና ናንጋ ጎዳ ጋላቱዋቴ!