Job 7 in Boko

1 Gbɛ̃nazĩna kua dṹniauá dɛ̃ɛɛ. Aà kua dɛ lán gbɛ̀wina kuawaɛ,

2 lán zↄ pↄ́ lɛ́ ue nidɛ kuawa, ge gbɛ̀wina pↄ́ a wɛ́ ìↄ dↄ a aseai.

3 Ma luakpama mɛ́ kua pã ũ mↄ ń mↄo, Lua ma da taasiu gwã́ ń gwã́o.

4 Tó ma wulɛ, mi mɛ má fɛlɛ bↄɛ ni? Gwãasĩna ìↄ gbã̀a, miↄ pelembo e gu gɛ dↄò.

5 Kↄ̀ↄ ń bↄtɛɛo fĩ̀fĩ ma mɛwa, ma mɛbaa kàsaakũ̀, ìↄ ibↄ.

6 Ma gↄↄↄ ìↄ gɛ̃ ń bao lán zwã̀atãna kↄↄzuawa, ìↄ gɛ̃zɛa wɛdↄa pↄ́i sai.

7 Lua, dↄ̃ kɛ́ ma wɛ̃ni dɛ lán lɛ́'ĩanawaɛ, má aafiaʼe bau lↄo.

8 Lá ńlɛ ma e, ńyↄ̃ ma e lↄo. Ńyↄ̃ wɛ́kpalɛmazi, kási máↄ ku lↄo.

9 Lá luabɛpuana ì gusikɛ à gɛ̃zɛa, màa gbɛ̃́ pↄ́ tà bɛdau lí fɛlɛo.

10 Ìli ɛa su a bɛ lↄo, aà yã́ lí dↄ aà bɛdeↄgu lↄo.

11 Ayãmɛto má a lɛ́ kpaaũo, má yã'o ma yeelɛa guu, má zↄaka ma nↄ̀sɛ ↄ̃̀ↄkpaa yã́i.

12 Ísia ge kpↄ̀ gbɛ̃̀nɛn ma ũ kɛ́ ni ma dↄ̃́aa?

13 Tó ma mɛ̀ ma lii a ma sↄ̃ dadoũ, ge ma wúlɛbↄ a ma nↄ̀sɛ nínimɛɛ,

14 ↄ̃ ni to vĩa ma kũ nana guu, ni to gili gɛ̃magu wɛ́pungu'eau.

15 Ma waa fĩa a kɛmɛɛ na dɛ kɛ́ beea, ga maamɛɛ dɛ ma wãwãɛ beea.

16 Mi saka ma wɛ̃nigu, má ye màↄ ku gↄↄpiio. Ma tó tɛɛɛ, asa ma kua ku pↄe lɛ́io.

17 Bↄ́n gbɛ̃nazĩna ũ kɛ́ niↄ aà kã́fĩ, niↄ làasookɛ aà yã́wai?

18 Niↄ aà tàasika lá gu lɛ́ dↄ, niↄ aà lɛ ǹ aà gwa gↄↄpii.

19 Ńyↄ̃ n wɛ́ woa baa yↄↄ mà e lɛ́'i mↄ́ yá?

20 Ma duunakɛ̀ yã̀? Bↄ́ má kɛ̀nɛi? Gbɛ̃nazĩngwana, àkɛa n ma kɛ n pↄdɛa ũi? Ma gↄ̃nɛ aso ũ yã̀?

21 Bↄ́yãi nili ma tàaeↄ kɛ̃a ǹ ma duuna woloao ni? Asa má gɛ̃ tɛ̃́ɛnau tia, máↄ ku lↄo, ńyↄ̃ kpálɛkɛmazi, ńyↄ̃ ma eo.