Job 6 in Boko

1 Yobu yã́zãsìwà à mɛ̀:

2 Tó wa fↄ̃ zaada ma yã'ↄ̃mau wà yↄ̃, tó wa fↄ̃ músi pↄ́ ma le yↄ̃ lé,

3 a gbia aↄ dɛ ísialɛ ũfãala. A yã́i tò ma yãyaaa'ò.

4 Gbãapiide kaↄ ma kũ, a sɛwɛ lɛ́ taalɛ ma nisĩnau. Pↄ́ pↄ́ Lua ì ĩadaomáↄ lìamazi.

5 Tó zàa'ĩna sɛ̃ è lɛ́ ble, ì wiilɛe? Tó zu lɛ́ pɛ̀lɛ tàaau, ì ↄ́ↄlↄe?

6 Wì pↄ́ sùusuu ble wisisaie? Kogbepuana í ìↄ nae?

7 Ma nisĩna ye blɛ bee taaio, ì to ma gua àↄ ye kpaaaɛ.

8 Tó ma yã́ pↄ́ má gbɛ̀a è lé! Lua ma ka yã́ pↄ́ ma wɛ́ dↄipiwa.

9 Lua ma suumpa lé! Aà ↄtↄ̃a aà ma gyawi!

10 Ma nↄ̀sɛ i gbasa níni, ma pↄ iↄ na, baa kɛ́ ma wãwã gi ku, asa mi lelekpa Lua pↄ́ a kua adoazio.

11 Ma yɛ̃̀ɛɛ kà mà gi màↄ kue? Ma wɛ̃ni gↄ̃a kà mà mɛnakɛe?

12 Ma gbãa kà gbɛwa yã̀? Ma mɛ á mↄgotɛ̃ yã̀?

13 Má fↄ̃ kaakaanakɛ lↄo, wà ma bↄa maa zɛ́ tà.

14 À kũ̀ pↄsiade gbɛ̃naↄ gbɛ̃kɛkɛɛ̀, kɛ́ asu vĩakɛa Gbãapiideɛ too yã́i.

15 Ma gbɛ̃́ↄ náai dɛ lán swa pↄ́ a í ì bawa, lán swa'ↄna pↄ́ a í ì gɛ̃zɛawa.

16 Ì pa buziɛ, a í ì kɛ dùuduu lougbɛ ń nɛɛzio yↄa yã́i,

17 ↄ̃ a í ì ba saɛ, a ɛ ì tɛ́kũ, a í ì sãalɛ ĩatɛ̃ gbãa zã́.

18 Tágɛnaↄ ì kɛ̃ zɛ́wa, aaì si guwaiwaiu aa ga we.

19 Tema tagɛnaↄ ì í wɛɛlɛ swapiu, Seba laatanaↄ wɛ́ ìↄ dↄ ípizi.

20 Tó aa kà, an gɛɛ ì gↄ̃ kpá ń wɛ́i, aa í'ea náai vĩ we, ↄ̃ tãmaa ń nɛ́.

21 Màa ápiↄ sↄ̃, mi pↄe ewáo, kɛ́ a yãpãsĩ pↄ́ ma le è, vĩa á kṹ.

22 Ma pↄe gbɛ̀awá yã̀? Má òɛ́ à ma gba pↄ́ á gbãa lɛ́u yã̀?

23 Ma mɛ̀ à ma bↄ ibɛɛↄ ↄzĩ yã̀? Má òɛ́ à ma si gbɛ̃́ pãsĩↄwae?

24 À yã́ pↄ́ ma zãwà ↄlↄmɛɛ, í ma wɛ́ kɛ̃́mɛɛ, mí nílɛ.

25 Yã́zɛde oanɛ́ mɛ́ zɛvĩ, ãma ma bɛ̃̀ɛ pↄ́ á bò zɛvĩo.

26 Á ye yáasi pↄ́ má kɛ̀ↄ bɛ̃̀ɛbo yã̀? I tãmaasaide yã́ gwa yãbↄlɛ ũ yã̀?

27 Á líkpa nɛtonɛ sɛa yã́ musu, á á gbɛ̃na kpámá ↄda'ea yã́i.

28 Á yã́ na, à lili à ma gwa. Ma wɛ́ aↄ pɛ á wɛ́u, míↄ ɛɛtoɛ́a?

29 À suɛ! Ásu ma yã́ gwa koleao. À ɛa làasookɛ, ma yã́ mɛ́ zɛvĩ.

30 Ma lɛdà yãkpaanlau yãae? Má yãvãi dↄ̃ noa?