Job 40 in Boko

1 Ɔ̃ Dii ɛ̀a ò Yobuɛ:

2 Ma Gbãapiide, ńyↄ̃ ma tàae e ǹ ma gba laaia? Luabɛ̃ɛbona, yã́zãsia sa.

3 Ɔ̃ Yobu wèwà à mɛ̀:

4 Má pↄe ũo, kpelewa má wemai? Sema mà ↄku ma lɛ́wa bàasio.

5 Ma yã'ò gɛ̃n doɛ, má ɛa o lↄo, má ò gɛ̃n pla se, má a zã́si lↄo.

6 Ɔ̃ Dii ɛ̀a yã'ò Yobuɛ zàa'ĩana guu à mɛ̀:

7 Sↄukɛ lán gↄ̃sawa, má yãlalama, ní wea.

8 Ńyↄ̃ láka ma yãkɛa a zɛ́waa yã̀? Ń ye ǹ yã́'ĩikpaa, n yãna bↄ yã̀?

9 N gã̀sa gbãa kàmawaa? N lↄↄ a fↄ̃ gu dee lamawaa?

10 Zↄ̃ↄkɛ ń kíakɛo da nↄamblebↄↄ ũ, gawi ń bɛɛɛo da ulada ũ.

11 Ǹ n pↄfɛ̃bↄbↄmá, waladeↄ gwa ń wɛpãsĩo, widamá.

12 Waladeↄ gwa ń wɛpãsĩo, ní ń lao, ↄ̃zↄ̃má gu pↄ́ aa kuu,

13 ní ń vĩlɛ tɛ̃́ɛnau píi, ní pↄ́ fĩ ń oawa miau,

14 mí gbasa mà n sáaukpa, kɛ́ n fↄ̃ n zĩblè ń n ↄplaao yã́i.

15 Dalagↄ̃ↄ gwa, mámɛ ma aà kɛ̀ lá ma n kɛwa. Ì sɛ̃ ble lán zuwaɛ.

16 Aà yɛ̃̀ɛɛ ku aà wokpɛɛ, aà gbãa ku aà kutɛlɛnawaɛ.

17 Ì a vlã́ poo lán sɛdɛ líwa, aà gbala kĩ dɛ lán bataɛawaɛ.

18 Aà wáↄ dɛ lán mↄgotɛ̃wa, aà mɛguↄ dɛ lán mↄ̀ gowa.

19 Aà zↄ̃ↄ mɛ́ dɛ pↄ́ bɛ̃́ɛ pↄ́ má kɛ̀ↄla, mapi aà Kɛna ma fɛ̃nda kɛ̀ɛ̀.

20 Gbɛ̀sĩsĩↄ mɛ́ aà blɛ'ekĩi ũ, we sɛ̃̀anↄbↄↄ ì kↄ̃̀ↄ'ou píi.

21 Ì wúlɛ íu kↄ̀lↄwɛɛ zíɛ, ìↄ ye feeu dã̀na guu.

22 Kↄ̀lↄwɛɛ ue ì daaàla, swagbalalaↄ ì kákaaàla.

23 Baa tó swa gbakàka, ìli leelekɛo, tó Yuudɛ̃ isukaa lɛ́ aà lɛ́ lé, ìli deeo.

24 Ńlɛ e wa fↄ̃ wà aà wɛ́ wíwi, wi aà kũ nɛe? Ńlɛ e wa e kↄ̃nikɛɛ̀, wi aà ní fↄ̃́ yã̀?

25 Ńyↄ̃ fↄ̃ kwãsa kṹ ń kokoao ǹ gálɛ ǹ bↄòe? Ńyↄ̃ fↄ̃ ba dↄ aà lɛ́nawae?

26 Ńyↄ̃ fↄ̃ bà lɛɛna ká aà níue? Ńyↄ̃ fↄ̃ ǹ aà lɛtã zíɛ fↄ̃́ ń kúlaoe?

27 A awakpakpanɛe? A yã́ nana onɛe?

28 A lɛdoũkɛnnↄ ǹ a sɛ n zↄ ũ e a wɛ̃ni lɛ́u nɛe?

29 Ńyↄ̃ kↄ̃̀ↄ'oò lá wì o ń bãowae? Ńyↄ̃ ba dↄwà ǹ kpa n nɛnↄɛnaↄwae?

30 Laatanaↄ kwãsapi tↄɛmáe? Laayianaↄ aa aà tↄ̃nↄnakɛkↄ̃ɛe?

31 Ńyↄ̃ fↄ̃ ǹ aà pápa ń saao ǹ aà báa fↄ̃́e? Ńyↄ̃ fↄ̃ ǹ aà mi kɛ yáiyai ń sↄ̃naoe?

32 Wɛɛlɛ ↄkãwà ǹ gwa! Dɛ̃ɛpi a sãnguo, ńyↄ̃ si a sìawa lↄo.