Job 41 in Boko

1 Tó ńlɛ e ńyↄ̃ aà kũɛ, ńlɛ nzĩa sãsãɛ, tó n wɛsìaàlɛ, ńyↄ̃ gↄ̃ zɛ sã̀iiɛ.

2 Lá gbɛ̃e wↄ́ↄ i ka à to aà go a tíao, démɛ a fↄ̃ zɛ ma aɛ sↄ̃i?

3 Démɛ a fↄ̃ ma le à o ma fĩaboɛi? Pↄ́ pↄ́ kú dṹniau píiá ma pↄ́ɛ.

4 Má gí kwãsapi gbáↄ yã'oio ge aà gↄ̃sakɛ ge aà kɛfɛnkɛ.

5 Démɛ a fↄ̃ à aà tɛɛ woloi? Démɛ a we ã̀asĩna kaɛ̀i?

6 Démɛ a we à aà lɛ́ wɛ̃aai? Aà swaa aà lɛ́ pà mɛ́ a kai vĩ.

7 Aà tɛɛ dɛ lán sɛ̀ngbaoↄwa aà kpɛsɛa, a daaĩa sàlala fòonasai dↄ̀ↄdↄↄ.

8 Aà tɛɛpiↄ nanaakↄ̃waɛ, baa ĩ́ana lí gɛ̃kĩi euo.

9 Aa pɛ́pɛakↄ̃wa gíũgiũɛ, aa kɛ̃aaakↄ̃wa vĩo.

10 Tó à nisã̀, gu ì puɛ, aà wɛ́ dɛ lán ĩatɛ̃ bilɛa kↄↄkↄↄwa.

11 Tɛ́vua ì pípi aà lɛ́u, tɛkↄna ìↄ bↄlɛu.

12 Súɛlɛ ìↄ bↄlɛ aà níu lán lá ísi tɛ́ pↄ́ wà oo dìwà súɛlɛwa.

13 Aà lɛ́'ĩana ì to sĩsĩↄna tɛ́sɛ, tɛ́lɛpiↄ ì bↄ aà lɛ́u.

14 Aà gbãa ku aà waauɛ, gbɛ̃́ pↄ́ kpàaũaànↄ píi ì tolootolooboɛ.

15 Aà báasi ì didikↄ̃a, ì nawà gbã́ugbãu, ìli deeo.

16 Aà kùa gbãa lán gbɛwa, lán wísilↄgbɛdawa.

17 Tó à fɛ̀lɛ, sↄ̃ ì kɛ̃ nɛgↄ̃naↄguɛ, aaì kpákpakↄ̃a aaìↄ kua gɛ́kĩiwa.

18 Fɛ̃nda pↄ́ wa lɛ̀ò píi, ìli bↄwào ge sↄ̃na ge ka ge saa.

19 Ì mↄsi dilɛ lán gàwatonawaɛ, mↄgotɛ̃ ìↄ dɛɛ̀ lán lí mùaawa.

20 Ìli bàalɛ kaɛo, gbɛma gbɛ ìↄ dɛɛ̀ lán ésemisinawaɛ.

21 Ìↄ go gwa lán sɛ̃̀ giiwaɛ, sↄ̃na kↄ̃fĩ ìↄ dɛɛ̀ yaalↄyã ũɛ.

22 Aà gbɛɛ tɛɛ dɛ lán zàkologbawaɛ, a ia ìↄ tɛ bɛ̀lɛau lán zusoon guwibↄwa.

23 Ì í bilɛ títiu lán í piaoouwa, ì ísipi ya lán nísi ikpaawa.

24 Í seena ìↄ tɛ aà kpɛɛ, ísipi ì ya aà kpɛ púuu.

25 Aà sáa kú dṹnia guuo, ma pↄkɛaↄ guu ↄ̃mɛ vĩa vĩo.

26 Ì pↄ́ pↄ́ aalɛ e wa kaↄ dilɛ pãɛ, ↄ̃mɛ nↄ̀ↄ tↄdeↄ kía ũ.