Job 39 in Boko

1 Ń tue nɛ'igↄↄ dↄ̃e? N bana è gↄↄ pↄ́ àlɛ nɛ'ia?

2 Ni ń nↄ mↄ dↄdↄe? Ni ń nɛ'igↄↄ dↄ̃e?

3 Aaì kúlɛ aa nɛ'iɛ, ↄ̃ an nɛ'iwãwã ì kpálɛ.

4 An nɛ́ↄ ì gbãakũ sɛ̃u, aaì pɛ́lɛ, aaì gɛ̃zɛa, aali su ń daↄwa lↄo.

5 Démɛ tò sɛ̃̀a zàa'ĩna gↄ̃̀ azĩaɛi? Démɛ aà pòlo gbàɛi?

6 Ma sɛ̃sao dìlɛɛ̀ aà bɛ ũɛ, ma tↄↄlɛ wiside kɛ̀ɛ̀ aà kúkĩi ũ.

7 Ì wɛ̃́lɛ súu kɛ pↄ́ↄpↄↄɛ, ìli gbãamↄnɛdeↄ zↄa mao.

8 Ìↄ sĩ̀sĩↄ kɛɛlɛ àↄ sɛ̃ wɛɛlɛ, ìↄ kpálɛkɛ pↄ́ ísinaↄi píi.

9 Zùsɛ̃lɛ a we zĩkɛnɛe? A we i n tàaakalɛkĩie?

10 Ńyↄ̃ ba dↄwà aà sa panɛe? Ńyↄ̃ zuudaɛ̀ aà kpase kɛ̃nɛe?

11 Ńyↄ̃ aà náaikɛ aà gbãa zↄ̃ↄ yã́ie? Ńyↄ̃ wei ǹ n zĩ toɛ̀e?

12 Ńyↄ̃ aà náaikɛ, aà n pↄ́wɛna sɛ́sɛ suonɛ zɛue?

13 Taataa ì a gã̀sĩa poo ń pↄnao, a muaa ń wàaliana gã̀sĩa kã́oo.

14 Ì gbeda zĩ́lɛ, ì to ũfãa gbepiↄ wã à pipi.

15 Kɛ́ wa su kɛ̀sɛpɛlɛwà à wíwi, ge sɛ̃̀anↄbↄↄ ↄ̃zↄ̃wà líↄ dↄaàguo.

16 Ìↄ pãsĩ ń a nɛ́ↄ, ńyↄ̃ↄ dↄ̃ se aàzĩa nɛ́ↄ no, zĩ pã kɛa lí kɛɛ̀ yãe ũo.

17 Asa mi aà gba ↄ̃nↄo, mi aà baa da faadeↄ guuo.

18 Ãma tó à pòo à bↄ̀ ń bao, ì sↄ̃́ kɛ̃ɛ, ↄ̃ ì sↄ̃́pi dikpɛna yáalↄ.

19 Ḿmɛ ni to sↄ̃́ àↄ gbãaa? Ḿmɛ n bã́ngasa pɛ̀pɛɛ̀ aà waawaa?

20 Ḿmɛ ni to aàↄ vĩvĩ lán kwawaa? Aà pↄbↄa a níu kↄ̃fĩ ì to vĩa ń kṹ.

21 Ì a gbá pã́lɛpãlɛ guzulɛu, ì pↄnakɛ a gbãa yã́ musu, ↄ̃ ì gɛ́ dai zĩgↄ̃ↄlɛ.

22 Ì pↄ́ pↄ́ wì vĩakɛɛ̀ yáalↄɛ, sↄ̃ lí kɛ̃aàguo, ìli pↄ̀ↄbↄzãkɛ fɛ̃ndaɛo.

23 Ka ìↄ kↄ̃fĩkɛ gbàlau aà musu, sↄ̃mpɛpɛɛ ń sↄ̃n gésedeo ì tɛkɛ.

24 Tó wà zĩ̀mↄ pɛ̀, ìliↄ azĩa dakĩi dↄ̃o, ìↄ tↄↄlɛ gbɛ̃ ìↄ vĩvĩ, ìↄ kɛ sɛ̀ɛsɛɛsɛɛ.

25 Tó wà kuupɛ̀, ì pↄbↄ a níu à mɛ̀ ɛ̃hɛ̃ɛ! Ìↄ zĩ ĩ́anasɛsɛ za zã̀zã ń dↄaanaↄ kↄ̃fĩ gbãao ń kúkuakɛao.

26 N ↄ̃nↄ mɛ́ tò bleaa ì vua à a gã̀sĩa poo à gɛ́ gɛↄmidↄkĩi oia?

27 Ḿmɛ ń dìlɛ yãamusuɛ aàli yàakpa, i a sakpɛ da musua?

28 Ìↄ ku gbɛ musu, we ì iu, ì pɛ gbɛ̀ misonawa a aafia'ekĩi ũ.

29 Za we ìↄ pↄblea gwagwau, ì pↄ́ↄ wɛ́pa kãaa.

30 Au mɛ́ aà nɛ́ↄ pↄblea ũ, gu pↄ́ pↄgɛ kuu, ìↄ ku weɛ.