Amos 8 in Boko

1 Yã́ pↄ́ Dii Lua ↄ̀lↄmɛɛn kɛ: Ma libɛ mài è ká gbí guu.

2 Ɔ̃ Dii ma la à mɛ̀: Amↄsi, bↄ́ ń èi? Ɔ̃ má wèwà ma mɛ̀: Libɛ mài má è ká gbí guu. Ɔ̃ à ɛ̀a òmɛɛ: Ma wɛmà ma gbɛ̃́ Isailiↄwaɛ, má sùuukɛńnↄ lↄo.

3 Ma Dii Lua ma mɛ̀, gↄↄ bee ma kpɛ́ lɛsia a li ↄ́ↄlↄa ũɛ, gɛↄ gↄ̃ kpálɛ gupiiu kpɛ̃̀nɛnɛ. Gu a kɛ kílikili!

4 À yã́ɛ bee ma, á gbɛ̃́ pↄ́ i gbãable taasideↄwa, i wɛ̃nadeↄ midɛ á bùsuu.

5 I mɛ: Mↄ dafu dikpɛ a láa wà e wá pↄ́wɛna yía bↄɛ ni? Gↄↄ kpele kã́mabogↄↄ a gɛ̃ wà e wá dↄ̃ↄ wɛ̃i? Wá zaa nɛ́na dauɛ, wí a ↄ̃a kã́fĩ, wá wá kilooↄ lilɛ, wíↄ gbɛ̃ble.

6 Wá wɛ̃nadeↄ lú ń ã́nusuo, wí taasideↄ sɛ zↄↄ ũ, kɛ́ baa wá kyale fĩa aai e bòwɛ̃ɛo yã́i. Wá pↄ́wɛna yía ń a bìsaoɛ.

7 Ma Dii Yakↄbu buiↄ Lua gawide, ma lɛgbɛ̃̀ ń ma kuao ma mɛ̀, an yãkɛae a sãmagu bauo.

8 A yã́i tↄↄlɛ a lualua, gbɛ̃́ pↄ́ kálɛwàↄ i búbuapɛ ḿpii. Bùsu a loo lán Niili í gbakakaawa, a ya i ɛa kpálɛ lán Egipi swapi íwa.

9 Ma Dii Lua ma mɛ̀, gↄↄ bee má tó ĩatɛ̃ gɛ̃ kpɛ́u gↄↄ pↄ́ à kà minanguo, má tó gu si fãanɛ gbãa zã́.

10 Má á dikpɛↄ lilɛɛ́ búbuapɛgↄↄ ũ, á lɛsiaↄ i gↄ̃ wɛ̃nalɛↄ ũ. Má tó à zwã̀nkasaↄ kákaála, á baade i a mi wa gbáigbai. Má tó gↄↄpi àↄ dɛ lán nɛgↄ̃ɛ mɛ̀ndona gaa ↄↄlↄwa, gↄↄpi i midɛ ń pↄsiao.

11 Ma Dii Lua ma mɛ̀, a gↄↄ lɛ́ mↄ́ má tó nↄana ká á bùsuu. I kɛ blɛ ge í nↄana no, swã́kpaa ma yã́ ni mɛ́ aↄ á dɛ.

12 Wa bã̀abãabo ísia baa ń ísia baao, wa bɛbɛ za gukpɛ e bɛ'aɛ. Aa kpálɛkɛ ma yãmaai, kási aa mao.

13 Gↄↄ bee wɛ̃́ndia maaↄ ń gↄ̃sa gbãaↄ yɛ̃̀ɛɛ a láa imi yã́i.

14 Gbɛ̃́ pↄ́ aaì lɛgbɛ̃ ń Samali tã́a tↄ́oↄ ń gbɛ̃́ pↄ́ aaì mɛ ń Dã dii kuaoↄ, ń gbɛ̃́ pↄ́ aaì mɛ ń gɛa sa'oi Bɛɛsɛba gbãaoↄ, aa kpaguaɛ, aa fɛlɛ bau lↄo.