Amos 9 in Boko

1 Ma Dii è zɛa a gbagbakĩi saɛ à mɛ̀: Gbɛ̀pɛlɛ misona lɛ́, kpɛɛlɛ gĩ i dee, ma kpɛ́pi i kwɛ ká gbɛ̃́piia, mí gbɛ̃́ pↄ́ bↄ̀ↄ dɛdɛ ń fɛ̃ndao. An kee a e bↄo, baa mɛ̀ndo a e piliao.

2 Baa tó aa ɛyↄ̃̀ aa tà e bɛdau, má ↄpɛlɛmá weɛ. Baa tó aa gɛ̀ za musumusu, má ń bua weɛ.

3 Tó aa gɛ̀ ùlɛ Kaamɛli gbɛ̀ misonau, má ń gbɛsɛlɛ mà gɛ́ mà ń kṹkũ weɛ. Tó aa sↄ̀lↄmɛɛ ísia zíɛ, má o ísia mlɛ̃ɛ aà ń só weɛ.

4 Tó an wɛ̀lɛↄ ń kũkũ aa tàńnↄ zĩ̀zↄↄ ũ, we má tó wà ń dɛdɛu ń fɛ̃ndao. Má wɛ́tɛńzi ĩadaama yã́iɛ, i kɛ maakɛanɛ́ yã́i no.

5 Ma Dii Lua Zĩgↄ̃de, mi ↄkã tↄↄlɛwa, i yↄ́, gbɛ̃́ pↄ́ kú weↄ i búbuapɛ píi. Mi to bùsu loo lán Niili í gbakakaawa, i ɛa kpálɛ lán Egipi swapi íwa.

6 Ma a kúkĩi kɛ̀, má dìdikↄ̃a musu, ma a ɛ̃ kpàlɛ dṹniawa. Mi ísia kãaa musu, mí tó à ma lou ũ dṹnia guu, ma tↄ́n Dii.

7 Ma Dii ma mɛ̀, á Isailiↄ, a kɛmɛɛ doũ ń Etiopiↄɛ. Lá ma á bↄ́lɛ Egipi, mi Filitɛ̃ↄ bↄlɛ Kɛlɛti, ma Siliↄ bↄ̀lɛ Kiio lé?

8 À ma! Ma Dii Lua, ma wɛmà á bùsu duundewa mà á kpalapi midɛ dṹniau, ãma má Yakↄbu buiↄ kaalɛ míↄmiↄo. Ma Dii mámɛ má ò.

9 Má yãdilɛ, mí tó wà Isailiↄ fã́fã buipãleↄ guu píi lá wì pↄ́wɛna ká gbaana guu wà fã́fãwaɛ, baa a wɛ́n do a lɛ́lɛ zĩ́lɛo.

10 Duunkɛna pↄ́ kú ma gbɛ̃́ↄ guu, aaì mɛ vãi a sↄ̃ńzi à gbasa ń leoↄ, wa ń dɛdɛ ń fɛ̃ndao ḿpiiɛ.

11 Gↄↄ bee má ɛa Davidi bɛzĩ bo, mí a gufooↄ kɛkɛ. Má aà ua pↄ́ gàpi vu, mí uapi fɛlɛ lá a dɛ yãawa,

12 aai gↄ̃ Ɛdↄũ bui kↄ̃naↄ vĩ ń buipãle pↄ́ ma tↄ́ kúmáↄ píi. Ma Dii pↄ́ má yã́pi kɛ, mámɛ má ò.

13 Ma Dii má mɛ̀ gↄↄ lɛ́ mↄ́ kɛ́ sàpanaↄ aaↄ bɛ pↄkɛkɛnaↄ iau, wàli pↄ́tↄ̃ e vɛ̃ɛkɛkɛa àↄ láa. Baa gbɛ̀sĩsĩↄ vɛ̃ɛ kɛ, vɛ̃ɛ na iↄ di sĩ̀sĩpↄlɛ píiu.

14 Má su ń ma gbɛ̃́ Isailiↄ ń pá ziu, aa ɛa ń wɛ̃́lɛ ziaↄ kálɛ aa zↄ̃lɛu. Aali vɛ̃ɛbu kɛ, aai a imi, aali kaaↄ da, aai a libɛ ble.

15 Má Isailiↄ pɛ ń bùsuu, gbɛ̃e a ń wo bùsu pↄ́ má kpàmápiu bau lↄo. Ma Dii á Lua mámɛ má ò.