Luke 1 in Yucuna

1 Eco palá pijló, Teófilojlo: Cajrú ina'uqué maárohua huátaño Jesucristo yucuna lana'acana papera chojé. Maárohua hue'iyohuá ri'imajica huacajé yucuna nahuata lana'acana papera chojé palá.

2 Piyuqueja nacaje rila'ajícare caje amájeño, necá i'imaqueño riyucuna najló i'imajica. Aú nalana'á papera chojé riyucuna i'imacá. Jesucristo queño'ocá risápaca'ala la'acana huacajé ne'emá rijhua'até. Piyuque nacaje rehuíña'atajicare nacú necá nema'aqué ra'apiyá. Necá penájenami ja'apátaqueño riyucuna ajopánajlo, ajopánajlo que. Huajló hua'ató piyuqueja na'apátaque riyucuna.

3 Eyá nucá piño quejá'ari palá riyucuna ajopana ina'uqué liyá i'imacá. Piyuqueja riyucuna nuquejá'a palá, rijyuhuacami yucuna hua'ató.

4 Ñaquele, Teófilo, nuhuata riyucuna lana'acana piyuqueja palá pijló, pihue'epícaloje palá quehuácaje puráca'aloji nacojé raú penaje. Caja nohuíña'ata picá rinacu i'imacá, pihue'epícaloje rinacojé palá raú penaje.

5 Herodes i'imacá judíona i'imacana huacajé, apú sacerdote i'imari. Rií i'imari Zacarías. Sacerdótena ií i'imari Abías. Nanaquiyana caja ri'imacá. Riyajalo ií i'imari Elisabet. Júpimi que Aaronmi chu i'imacá sacerdote. Rilaquénami naquiyana ru'umacá.

6 Palá Tupana pechu i'imajica Zacarías nacú riyajalo nacú hua'até. Nema'aqué Tupana ja'apiyá palá. Piyuque ripuráca'alo lana'aquéjami quemacá que nala'ajícano i'imajica. Aú calé uncá meño'ojó ajopana ina'uqué quemalá nanacu: “Pu'uhuaré la'ajeño necá”, que.

7 Uncá nayani i'imalá, mehuacú riyajalo i'imacale. Rihuacajé caja peñahuilana huani ne'emacá.

8 Zacarías i'imari sacerdote. Risápaca'ala rila'aqué Tupánajlo. Pajehuémichaca nala'ajica ricá ajopana hua'até. Ñaquele rihuacajé ricá, rijhuáque'ena, quele la'añó ricá.

9 Tupana ñacaré chu ne'emá. E caja nahuacára'a rimujlúca'aca ucapú chojé, ricára'acaloje a'ahuaná icá reyá i'imajemi penaje.

10 Ricára'aca a'ahuaná icá quetánaja ajopana ina'uqué pura'acó Tupana hua'até apalá ucapú chu.

11 E'iyohuá queja Tupana hua'atéjeri, je'echú chiyaje, ya'atacó Zacaríasjlo i'imacá. Re mesa caje i'imari. Jipa naquiyá la'acanami ri'imacá. Ricá nacú nacára'aque a'ahuaná icá. Ca'añá chojó pitá mesa nacojé, Tupana hua'atéjeri, je'echú chiyaje, iphari.

12 E Zacarías amari ritára'aco. Rinacojé ripechu capicháñari risápaca'ala, cajrú huani riquero'ocole.

13 Ejéchami Tupana hua'atéjeri, je'echú chiyaje, pura'acó rijhua'até. Rimá rijló: —Zacarías, piquero'oniyo, Tupana jema'arí pipura'acó rijhua'até. Chuhua ra'ajica piñaté. Marí que ri'imajica pijló: Ilerú piyajalo huá'ajeyo ru'urí. Ñaquele pa'ajé rií Juan.

14 Pu'ují huani pipechu i'imajica rimoto'ojica aú. Ñaqué caja cajrú ajopana pechu i'imajica pu'ují raú.

15 Palá huani Tupana pechu i'imajica pi'irí nacú. Uncá ri'iralaje nacaje jalá amúra'atacanami. Tupana Pechu i'imajeri re'iyá rimoto'ojica ejéchami.

16 Ri'imajé Tupana yucuna cajrú Israelmi chu laquénamijlo, napajno'otácaloje napéchuhua Tupana ejo raú penaje, nahue'epícaloje piño Tupana raú penaje. Iná huacára'ajeri huani ricá.

17 Ricá Tupana huacára'ajicare ina'uqué i'imatájeri penaje, tucumá ra'apátaje Tupana puráca'alo ina'uquejlo. Caphí Elíasmi chu pechu i'imajica Tupana puráca'alo ja'apátacana nacú ina'uquejlo. Ricá pechu i'imacá que caja pi'irí pechu i'imajica ra'apátacana nacú. Ra'apátaje ina'uquejlo Tupana puráca'alo, nayani pechu pala'acóloje nachi'iná hua'até raú penaje. Uncá jema'alaño Tupana ja'apiyá, jema'acáloje Tupana ja'apiyá penaje ri'imajé ina'uquejlo riyucuna —que Tupana hua'atéjeri, je'echú chiyaje, quemacá Zacaríasjlo i'imacá.

18 E Zacarías quemari rijló: —¿Na aú chi nuhue'epeje quele pimíchaca nojló? Phíyu'uque huani nucá, phíyu'uqueru caja nuyajalo. Uncá meño'ojó huayani i'imalá.

19 Aú Tupana hua'atéjeri quemari rijló: —Gabriel, Tupana hua'atéjeri nucá. Ricá huacári'ichari nucá majó pichaje, nu'umacáloje pijló riyucuna penaje. Palani huani riyucuna.

20 Uncá pachá pema'alá nupuráca'alo no'opiyá, pi'imajé manumarú a'ajná pi'irí moto'ojica ejená. Numíchaca pijló queja pi'irí i'imajica. Riphájica rená chojé huacajé pi'irí moto'ojeri —que Tupana hua'atéjeri, je'echú chiyaje, quemacá rijló.

21 Je'echú chiyaje pura'acó Zacarías hua'até quetana ajopana ina'uqué huátaca ricá. Apalá chu ne'emá. Napechu i'imá: “¿Na rila'alá júpija huani richu.”

22 E caja ehuaja Zacarías jácho'oro richiyá. Reyá a'ajná ño'ojó uncá meño'ojó ripura'aló. Riyáte'ela aú ja ripura'ó najhua'até, manumarú ri'imacale. Raú nemá rinacu: —Nápaja ca'ajná ya'achíyaro rijló ucapú chu, li'ichari ricá ají que —que nemacá.

23 E caja riphá rená chojé, apú sápacaloje Tupana ñacaré chu rapumí chojé penaje. Aú ripa'ó riñacaré ejo.

24 E caja riyajalo i'imayo canupá. Aú caja uncá rócho'olo nañacaré chiyá pajluhua té'ela queta queri quetana.

25 Pu'ují rupechu i'imacá, canupá ru'umacale. Rumá: “Caja marí que Tupana la'acá nucá palá, ajopana ina'uqué iphácaloje no'opí raú penaje. Uncá nephala no'opí mehuacú nu'umaqué huacajé.”

26 Elisabet i'imacá canupá pajluhua cuhuá'ata queta queri quetana huacajé, Tupana huacára'ari ricaja caja Gabriel je'echú chiyá pajimila Nazaret ejo. Galilea te'eré nacú ricá pajimila.

27 Rejo Tupana huacára'ari ricá María chaje. Inaya jo'ó María i'imacá rihuacajé. Uncá jo'ó ruhuá'acalo rihuacajé i'imacá. Napura'ó rinacu José hua'até, nahuá'acacoloje pajhua'atéchaca penaje. José i'imari Davidmi chu laquénami naquiyana. Júpimi que Davidmi chu i'imacá ne'emacana.

28 E caja Tupana hua'atéjeri, je'echú chiyaje, iphari María nacú. Rimá rojló: —Pajalácaje nu'ujichá majó. Palá huani Tupana pechu pinacu. Piñaté a'ajeri ricá. Palá huani caja Tupana la'ajica picá. Ajopana inaana chaje huani rila'acá picá palá —que rimacá Maríajlo.

29 Marí que rimacá aú rojló rupechu i'imá: “¿Meque chi caji rimíchaca nacú nojló? ¿Naje chi rimicha nojló a'ajná que huani?”

30 E Tupana hua'atéjeri quemari piño rojló: —María, pihue'epíniya pijluhua, palá Tupana pechu pinacu.

31 Chuhuaca canupá pi'imajica, pi'irí i'imajeri achiñá. Eco pa'á rií Jesús.

32 Palá huani rila'ajica íqui'iruna ina'uqué nacú. Nemaje rinacu: “Tupana I'irí ricá” que. “Ajopana chaje huani huacára'ajeri i'irí ricá”, que nemájica rinacu. Tupana a'ajeri ricá ne'emacana penaje, Davidmi chu i'imacá ne'emacana, que caja ri'imacáloje penaje.

33 Israelmi chu laquénami huacára'ajeri ri'imajica. Uncá ritajnálajo i'imajica, uncá rácho'olajo richiyá —que rimacá rojló.

34 Eyá rumá rijló: —¿Meque ca'ajná pimíchaca nojló? Uncá jo'ó nu'umalá achiñá hua'até.

35 Rimá rojló: —Tupana Pechu i'imajeri pijhua'até. Ricá queñótajeri pi'irí pihuó chu. Marí caje aú pi'irí i'imajeri Tupana I'irí.

36 Ñaqué caja pe'ehueló Elizabet i'irí i'imajica. “Mehuacú rucá” que nemacá runacu i'imacá. E'iyonaja caja canupá rucá. Pajluhua cuhuá'ata queta queri cha rucá me'etení. Phíyu'uqueru huani rucá, e'iyonaja canupá rucá Tupana palamane.

37 Tupana hue'epiri piyuque huani nacaje la'acana —que rimacá rojló.

38 —Ñaqué ricá —que María quemacá rijló—. Pimíchaca que nojló queja ri'imajica nojló. Tupana huátaca que la'ajeyo nucá. Marí cajé aú Tupana hua'atéjeri, je'echú chiyaje, pa'aró piño je'echú chojé.

39 E caja María i'ijnayo tu'ujné ají que apú pajimila ejo. Judea te'eré nacú, yenuri e'iyohuá pajimila i'imacá, ejo ru'ujná.

40 Ruphá rejo, rumujlúca'a Zacarías ñacaré chojé. E rojalaca Elisabet.

41 Raú ru'urí ñani cahuitari rohuó chu. Tupana Pechu i'imari rujhua'até cajrú i'imacá.

42 Raú caphí rumacá Maríajlo: —Tupana la'arí picá palá. Ajopana inaana chaje huani rila'acá picá palá. Ñaqué caja rila'ajica pi'irí i'imajícare palá huani.

43 Nuhuacára'ajeri jaló penájeru picá. ¡Meque palá huani pili'ichaca nucá majó nuchaje i'ijnacana aú!

44 Pajaláquichaca nucá aú, nu'urí ñani cahuichíyari nohuó chu, pu'ují ripechu i'imichácale —que Elisabet quemacá Maríajlo.

45 Rumá piño rojló: —Pa'acale pinacojó Tupana puráca'alo, rimacare pinacu i'imacá, pu'ují pipechu la'acó raú. Huahuacára'ajeri Tupana quemacá pinacu queja ri'imajica pijló.

46 María quemayo rojló: —Pu'ují huani nupechu Tupana nacú,

47 ri'imatájicale nucá capichácajo liyá.

48 Palá nupechu, rihue'epícale nucá. Majopéjaru queja nucá. Rijló sápajeyo nucá. Chuhua ina'uqué quemájica nunacu: “Meque palá huani Tupana la'acá rucá” que.

49 Palá huani jo'ó Tupana la'acá nucá. Tupana hue'epiri piyuqueja nacaje la'acana palá. Palani huani ricá. Uncá meño'ojó rila'alá pu'uhuaré.

50 Rihue'epí piyuque ra'apí iphájeño mu'ují ñaqueja.

51 Piyuque huani la'ajeri ricá. Re ina'uqué naquiyana, íqui'i nala'acá necó hue'epiño que huani. Necá pechu rapichata, nala'acá piyá nahuátaca que —que rumacá—.

52 Nahuacára'ajeño huani rácho'otaje ne'emacana caje chiyá. Ajopana ja'apejé i'imajícaño rila'ajé palá.

53 Ña'ajeño me'epejí panácujlo ra'ajé nacaje palani. Cajrú le'ejepeláruna rihuacára'aje a'ajná ño'ojó majopeja. Uncá na i'imalaje nacapi.

54 Tupana le'ejena ina'uqué Israelmi chu laquénami. Necá ñaté ra'ajé, rihue'epícale namu'ují.

55 Tupana hue'epiri namu'ují rimacá que najló i'imacá. Uncá riyurila Abrahami chu mu'ují hue'epícana i'imacá. Ñaqué caja rihue'epíjica rilaquénami mu'ují piño —que María quemacá Tupana nacú.

56 María yuriyo Elisabet hua'até hueji queta queri quetana. Quéchami rupa'acó piño ropumí chuhuá.

57 E caja Elisabet iphayo roná chojé, ru'urí moto'ocáloje penaje. Ejéchami caja ruhuá'a ru'urí.

58 Pu'ují nañacaré ahua'á i'imacaño, nejena, cajena pechu la'acó raú, Tupana la'acale palá huani rucá. Aú ne'ejná ruchaje ruyájlepana la'ajé.

59 E caja hueji que cuhuá'ata que cala i'imajemi rimoto'ocá ejomi ne'ejná queráco'ope chu'uhuere chinuma mata'ajé. Nahuata rií a'acana rara'apá ií que caja.

60 E'iyonaja raló quemayo najló: —Uncá hua'alaje rara'apá ií rií. Hua'ajé rií Juan.

61 E nemá rojló: —¿Naje chi pa'á rií Juan? Uncá pejena naquiyana ií i'imalá Juan —que nemacá rojló.

62 Ejéchami naca'acá nayáte'ela queráco'ope jara'apajlo, namácaloje naca ra'acá rií penaje.

63 Raú riquejá'a naliyá papera, riyá'atacaloje najló rií richojé penaje. E caja riyá'ata najló: rií Juan. Aú ajopana pechu i'imá: “¿Meque chi ricá caje?”

64 Ejéchami Zacarías lená huicho'ocó, ripura'acóloje penaje. E palá huani ripura'acó Tupana nacú.

65 Raú rahua'á ñacaré i'imacaño quero'oñó. Marí caje ejomi Juan moto'ocá yucuna jema'aró cajrú rehuá. Judea te'eré ehuájena, yenuri e'iyohuá i'imacaño, necá piyuqueja jema'añó caja riyucuna.

66 Piyuque riyucuna jema'ajeño i'ijnataño napéchuhua rinacu cajrú. Nemá pajlocaca: “¿Méqueca penaje rimoto'ó quele queráco'ope?” Que nemacá rinacu, nahue'epícale Tupana a'ajica riñaté cajrú huani.

67 Tupana Pechu i'imari queráco'ope jara'apá, Zacarías hua'até cajrú. Tupana huacára'aca ripuráca'alo que ripura'acó. Aú marí que rimacá:

68 Palani Tupana. Israelmi chu laquénami huacára'ajeri ricá. Rile'ejena ina'uqué caja huecá. Huachi'ináricana caja ricá. Chuhua ri'imatájica huecá capichácajo liyá.

69 Ra'ajé huajló pajluhuaja ina'uqué hue'ematájeri penaje. Piyuque la'ajeri ri'imajica. Davidmi chu la'aqueri Tupana huátajica que. Rilaquemi ri'imajica.

70 Riyucuna Tupana i'imaqueri ripuráca'alo ja'apátajeñomi chúnajlo júpimi que.

71 Rimá najló huanacu marí que i'imacá: “Nu'umataje necá napinana liyá. Chapú péchuruna nanacu liyá hua'ató nu'umataje necá,” que rimacá huanacu i'imacá.

72 Rimá caja huachi'inami chuna nacú marí que i'imacá: “Nuhue'epeje imu'ují. Uncá mapéchuru calé nucá numacare ijló nacú. No'ojé iñaté,” que rimacá najló.

73 Rimá caja hua'ajútami chu, Abrahami chujlo nacaje rila'ajícare nacú.

74 Rijló rimá huanacu i'imacá, ri'imatácaloje huecá huapinana liyá penaje. Raú huala'ajé nacaje rijló. Uncá hue'emalaje quero'ocajo nacú raú.

75 Marí que rila'ajica huecá palá, rihuátaca que la'acaño hue'emacáloje raú penaje. Palá la'ajeño hue'emajica raú, hue'emajica quetana. Marí que la'ajícaño hue'emajica palá raú, que Zacarías quemacá Tupana nacú.

76 Ejomi Zacarías quemari marí que ri'irí ñanijlo i'imacá: —Nu'urí ñani, picá i'imajeri Tupana puráca'alo ja'apátajeri penaje. Ajopana huacára'ajeño huacára'ajeri, Tupana. Ricá puráca'alo ja'apátajeri pi'imajé. Picá i'ijnajeri Huahuacára'ajeri huani tucumá riyucuna i'imajé ina'uquejlo, napala'atácaloje napéchuhua pu'uhuaré nala'acare liyá ripé penaje.

77 Pi'imajé riyucuna ina'uquejlo, huahue'epícaloje Tupana amaco huachaje pu'uhuaré huala'acare, huamanaicho huala'acare liyá penaje. Marí caje aú hue'emacóloje capichácajo liyá penaje.

78 Tupana huajhuena huani ina'uqué piyuqueja. Ñaquele rihue'epí huamu'ují. Ñaqué i'imacale huajé chuhuá hue'emajica maare eyá a'ajná ño'ojó.

79 Uncá meño'ojó ina'uqué i'imatala necó capichácajo liyá. Chuhua nahue'epíjica re apú Ne'ematájeri penaje. Ricá caja la'ajeri huapechu palá, hue'emacáloje palá pajhua'atéchaca ripalamane aú penaje —que Zacarías quemacá Tupana Pechu ja'apiyá que.

80 Eyá ricá queráco'ope tahuá'aro i'imacá. Ehuá riñapaca tahuá'acajo. Cajrú ripechu i'imacá rijluhua. Pu'uteni meñaru chuja ri'imaqué. Ehuá riphaca rená chojé i'imacá, ra'apátacaloje Tupana puráca'alo yucuna ajopana ina'uquejlo penaje. Quetánaja ri'imacá pu'uteni meñaru chu.