Hebrews 3 in Yucuna
1 Nojena, Jesucristo ja'apiyá i'imacaño icá. Tupana a'arí icá, i'imacáloje rile'ejena ina'uqué penaje. Chuhua i'ijnatá ipéchuhua Jesucristo nacú. Tupana huacára'ari ricá majó i'imacá ripuráca'alo ja'apátajeri penaje. Eyá chuhua puráca'aloji lamá'atajeri ricá me'etení huajló. Huachaya rilamá'ata puráca'aloji Tupana hua'até. Caphí huapechu ripuráca'alo chojé, raú rilamá'ata huecá Tupánajlo.
2 Tupana a'arí Moisesmi chu rile'ejena ina'uqué amájeri penaje i'imacá. Palá ramájica necá. Moisesmi chu la'ajica que caja Jesucristo la'ajica palá nacaje ina'uquéjloje penaje. Tupana huacára'aca que rila'ajica najló nacaje.
3 Moisesmi chu chaje huapechu i'imacá palá Jesucristo nacú, hue'emacale Tupana le'ejena ina'uqué Jesucristo palamane aú. Namájeri chaje ricá, a'arí ina'uqué Tupana le'ejena penaje.
4 Re cajrú ina'uqué que'iyapejena ajopana, ajopana que necá. Nachi'inami chuna palamane i'imacaño necá. Tupana palamáneja calé piyuqueja nacaje eja'ahuá chu, je'echú chu hua'até. Ñaquele Paminá huani ricá, Tupana.
5 Moisesmi chu amari Tupana le'ejena ina'uqué palá. Namájerija ri'imacá Tupánajlo. Rijhua'até sápajeri ri'imacá. Nacaje rila'acare aú nahue'epí isama queja méqueca nacaje i'imajica a'ajná ño'ojó chami.
6 Jesucristo a'arí rile'ejena ina'uqué rinacojó palá, Tupana I'irí ri'imacale. Huecá, Jesucristo ja'apiyá jema'ajeño, i'imano rile'ejena ina'uqué. Caja queja hue'emajica rile'ejena, huapechu i'imajica ee richojé caphí huataca'ajica ejená.
7 Tupana Pechu quemari marí que i'imacá: Chuhua na'apátajica ee Tupana puráca'alo ijló,
8 ijnúcha'aniyo na'apiyá. Júpimi a'ajútayami chuna i'imaño pu'uteni chu i'imacá. I'imaniya ne'emacá que caja. Necá ijnúcha'aqueño no'opiyá i'imajica. Namanaicho nala'ajica quehuá nuyúcha'aco nachá.
9 A'ajútayami chuna la'aqueño namanaicho, namácaloje méqueca nula'acá necá richona penaje. Nala'aqué nucá mapéchuru queja najluhua, uncale no'olá najló nacaje nahuátacare caje. Iyamá ina'uqué le'ejé quele jarechí quetana nula'ajica nacaje palani ne'iyohuá. Namájicare ri'imajica. E'iyonaja calé nala'aqué namanaicho.
10 Marí que nala'ajica pachá, nuyúcha'aco najló i'imajica. Aú numá nanacu: Apu cajé ta puráca'aloji chuhuaja ne'ejnatá napéchuhua hua'ajini huani. Uncá huani nahuátaque napéchuhua i'ijnatácana nupuráca'alo chuhuá.
11 Namanaicho nala'ajícare pachá nuyúcha'aco najhua'até. Aú numá nanacu: Uncá huani ne'ejnalaje te'erí, norucácare najló ejo. Marí caje aú uncá caja nahuatána'alaje nujhua'até. Marí que numacá nanacu, caja queja ri'imacáloje najló penaje, que Tupana quemacá nanacu i'imacá.
12 Nojena, i'imá u'upejlú ñaqué la'acana liyá, e'iyajena ijnúcha'aco piyá Tupana ja'apiyá jema'acana nacú. Apala e'iyajena pechu i'imá pu'uhuaré, aú ipechu pajno'oró Tupana liyá. Cajmuni, capechuni Tupana. Ipechu pajno'oniyo riliyá. Uncá pachá iná pechu i'imalá caphí richojé, iná pechu pajno'oró riliyá.
13 Ila'á caja papechúhuaca caphí Tupana puráca'alo aú. Hue'echú ca'alá queja ila'ajica caphí papechúhuaca raú, a'ajná Jesucristo iphájica majó ejená. Marí que ca'ajná inaquiyana pechu i'imajica: “Palá hue'emajica huamanaicho la'acana nacú.” Uncá quehuaca calé ricá. Marí que la'acana aú iná pechu pajno'oró Tupana liyá. I'imá pajlocaca Tupana puráca'alo yucuna, ipechu i'imacáloje richojé caphí penaje. Raú uncá ijnúcha'alajo Tupana ja'apiyá jema'acana nacú.
14 Jesucristo hua'atéjena huecá, uncaja que huayurí hualiyó richojé i'imacana caphí. Huaqueño'ó richojé i'imacana caphí júpimi. Ñaqué caja huapechu i'imajica ee caphí richojé huataca'ajica ejená, hue'emajé rijhua'atéjena huani reyá a'ajná ño'ojó.
15 Marí que Tupana puráca'alo lana'aquéjami quemacá: Chuhua ne'emajica ee Tupana puráca'alo yucuna ijló, ijnúcha'aniyo na'apiyá rema'acana nacú. Júpimi a'ajútayami chuna i'imaqueño pu'uteni chu. I'imaniya ne'emacá que caja. Necá ijnúcha'aqueño no'opiyá jema'acana nacú, que Tupana puráca'alo lana'aquéjami quemacá.
16 Necá, Moisesmi chu huá'acarena Egipto te'eré eyá i'imacá, jema'añó Tupana puráca'alo i'imacá. Nema'á ricá. E'iyonaja calé nejnúcha'o ra'apiyá jema'acana nacú.
17 Pu'uteni chu ne'emacá huacajé, ne'iyajena la'añó namanaicho i'imacá. Pachá calé nataca'ató i'imacá. Nachá Tupana yúcha'aro i'imacá. Iyamá ina'uqué le'ejé quele jarechí quetana riyúcha'aco nachá.
18 Uncá jema'alaño ra'apiyajlo rimá: Uncá i'ijnalaje te'erí, norucácare ijló ejo. Uncá caja huatána'acaje i'imalaje ijló, ihuatána'acaloje chira'acajo liyá penaje. Caja queja ri'imacáloje najló penaje, rimá najló marí que i'imacá.
19 Uncá pachá napechu i'imalá caphí richojé, uncá riyurila ne'ejnacá te'erí rarucácare najló i'imacá ejo.