Song of Solomon 2 in Yalunka
1 N luxi nɛn alo se fuge faɲin naxanye Sarɔn yamanani, gabala fugene mɛrɛmɛrɛne yi.
2 N nafan ɲaxanla luxi sungutunne tagi nɛn alo gabala fugen sɛxɛ ɲali kanne tagi.
3 N nafan xɛmɛn luxi banxulanne tagi nɛn alo mangon binla fɔtɔn yi wudine tagi. A rafan n ma n dɔxɔ a nininna ra, a rafan n ma alo wudi bogi ɲaxumɛna n dɛ.
4 A bata n xali sumun yireni. A xanuntenyaan luxi nɛn n xa alo taxamasenna.
5 Ɛ n sɛnbɛ so se bogine ra, ɛ yi n bɔɲɛn maxunbeli mangon bogine ra, bayo xanuntenyaan furena n ma.
6 A kɔmɛn ma yiina n xunna bun, a yi a yiifanna rabilin n ma.
7 Yerusalɛn sungutunne, n bata ɛ rakɔlɔ bolene nun burunna xɛnle yi, ɛ nama xanuntenyaan nakeli, ɛ nama a raxulun, benun a waxatin xa a li.
8 N bata n xanuntenna xuiin mɛ! A fama tuganɲɛ ayi geyane xun tagi, a a gima yire matexine xun tagi.
9 N xanuntenna a gima alo bolena hanma xɛli sɛnbɛmana. A mato, a tixi en konna sansanna xanbi ra. A yɛɛn nasoma banxin foyesoden na, a yɛɛ masama wure sansanna yinle ra.
10 N xanuntenna falan tima n xa, a naxa, “Keli, n xanunten tofaɲina, fa en siga!
11 Bayo ɲɛmɛn ɲanmatɔɔn ni i ra, tulen bata ɲan, a bata siga.
12 Se fuge faɲine bata wara ayi bɔxɔni, sigi sa waxatin bata a li, kolokondene xuiin minima burunna ra.
13 Xɔdɛ binla bata a bogi singene ramini fɔlɔ, manpa binle bata fuga, e xiri faɲin naminima. N xanuntenna, keli, fa en siga.”
14 N ma ɲaxanla, i nama i luxun alo ganbana gɛmɛ yinle ra geyaan kanke. I yɛtagin yita n na, i xuiin namini n xa a mɛ, amasɔtɔ i xuiin ɲaxun, i tofan.
15 Ɛ xulumaseene suxu nxu xa, xulumase xurin naxanye nxɔ manpa bili fugaxine kalama.
16 N gbeen nan n xanuntenna ra, a fan gbeen nan n na, a nɛma a xuruseene rabama sansi fugaxine tagi.
17 N xanuntenna, benun kuye xa yiba, dimin yi siga, xɛtɛ, i i gi alo bolena alo xɛli sɛnbɛmaan gɛmɛ geyane fari.